32
ያይቆባነ ኤሳዌ
1 ያይቆብ ደንድድ ባ ኦግያ ብሽን ፆሳ ኪታንቾት እያራ ጋሄትዶሶና።
2 ያይቆብ ኤንታ በእዳ ዎደ “ሀይሳቲ ፆሳ ኦላንቾታ” ያግድ፥ ሄ በሳ ማሀናይማ (ናምኡ ጉታ) ግድ ሱንꬅስ።
3 ያይቆብ ኤዶመ ቢታን ሳይረ ግያ በሳን ደእያ ባ እሻ ኤሳዌኮ ኪታ ባፐ ስን ኪትስ።
4 እ ኤንታ፥ “ህንተ ታ ጎዳ ኤሳዌስ ጋናባይ ሀይሳ፥ ‘ታኒ ነ አይለይ ያይቆብ ሀእ ጋካናው ላባ ማታን ጋምአስ።
5 ታዉ ሚዝ፥ ሀረይ፥ ዶርስነ ዴሽ፥ አደ አይለትነ ማጫ አይለት ደኦሶና። ሀእ ታኒ ሀ ኪታ ታ ጎዳ ስንꬃን ሳባ ደማንድናሻ ጋዳ ኪታስ ያግስ’ ያግተ” ያግድ ኪትስ።
6 ኪተትዳይሳት ያይቆባኮ ስሚድ፥ “ኑኒ ነ እሻ ኤሳዌኮ ብዳ። እካ ቃስ ኔራ ጋሄታናዉ ዬስ። እያራ ኦይዱ ፄቱ አሳይ ደኦሶና” ያግዶሶና።
7 ያይቆብ ዳሮ ባብድ ባራ ደእያ አሳ ናምኡ ጩጋን ሻክስ። ባ ዶርሳ፥ ዴሻ፥ ሚዛነ ግማለታ ናምኡ ጩጋን ሻክስ።
8 እ፥ “ኤሳዌይ ይድ እስ ጩጋ ኦልያባ ግድኮ፥ አትዳ ጩጋይ ከስ ኤካና” ግድ ቆፕስ።
9 ሄ ዎደ ያይቆብ ሀይሳዳ ያግድ ዎስስ፥ “አቤት ጎዳዉ፥ ታ አዋ አብራሃመ ፆሳዉ፥ ታ አዋ ይሳቃ ፆሳዉ፥ ታና፥ ‘ነ ቢታ፥ ነ ዳቦታኮ ስማ፥ ታኒ ነዉ ሎኦባ ኦꬃና ግዳይሶ፥ ታና ስአርክ’፥
10 ኔኒ ነ አይልያስ ኬህዳባስነ አማነተꬃ ኡባስ ታኒ በሶና አስ። ታኒ ዮርዳኖሰ ሻፋ ፕንያ ዎደ ታዉ እስ ፃምአ ፃላል ደኤስ፤ ሽን ሀእ ታኒ ናምኡ ጩጋ ጎዳ ግዳስ።
11 ታኒ ነና ዎሳይስ ታ እሻ ኤሳዌ ኩሸፐ ታና አሻ። እ ይድ፥ ታናነ አየታ ኤንታ ናይታራ ꬋይሶና አገና ጋዳ ያያይስ።
12 ሽን ኔኒ ታና፥ ‘ታኒ ነዉ ቱማ ሎኦባ ኦꬃና። ታኒ ነ ሼሻ ታይባናዉ ዳንዳኤቶና አባ ሻፈዳ ኦꬃና’ ግዳይሳ ቆፓ” ያግስ።
13 ሄ ጋላስ ቃማ እ ያን አቅስ። ባዉ ደእያባ ኡባፈ ባ እሻ ኤሳዌስ እማናባ ቆርድ ከስስ።
14-15 እ፥ ናምኡ ፄቱ ማጫ ዴሻታነ ላታሙ ዴሻ ማራዘታ፥ ናምኡ ፄቱ ማጫ ዶርሳታነ ላታሙ ዶርሳ ማራዘታ፥ ሀስታሙ ꬋንꬅያ ግማለታ ኤንታ ማራታራ፥ ኦይታሙ ማጫ ሚዛታ፥ ታሙ ኮርማ ቦራታ፥ ላታሙ ማጫ ሀረታነ ታሙ አደ ሀረታ ቆርድ ከስስ።
16 ሄሳታ ዉደን ዉደን ሻክድ ባ አይለታስ እምድ፥ “ታፐ ስን ብድ ዉድያ ዉድያፐ ሃሆን ሃሆን ላግተ” ያግስ።
17 ስንꬃን ካለይሳ፥ “ታ እሻይ ኤሳዌይ ኔራ ጋሄትድ፥ ‘ኔኒ ኦደሴ? ኔኒ አዉ ባይ? ነ ስንꬃን ደእያ መሄ ኡባይ ኦደባዬ?’ ያግድ ኦይችኮ፥
18 ነ እያኮ፥ ‘ሀይሳቲ ነ አይልያ ያይቆባሳ፥ እ ታ ጎዳ ኤሳዌስ እማናዉ የድዳይሳታ። እካ ኑፐ ጉየራ ዬስ’ ያጋ” ያግድ ኪትስ።
19 ቃስ ናምአንꬁዋ፥ ሄꬓንꬁዋነ ዉድያ ካልያ ሀራታ ኡባ፥ “ህንተ ኤሳዌራ ጋሄትያ ዎደ ሀይሳዳ ጌታ፤
20 ‘ነ አይልያ ያይቆብ ኑፐ ጉየራ ዬስ’ ጎና አጎፍተ” ያግድ ኪትስ። እ፥ “ታኒ እማናዉ ስን የድዳይሳን እያ እርፅሳና። ኦን ኤር ሄሳፈ ጉየ፥ ታኒ እያራ ጋሄትያ ዎደ እ ታና ሞክ ኤካና” ያግድ ቆፕስ።
21 ሄሳ ግሾ፥ ባ እማናባ ባፐ ስን የድስ። ሽን እ ባ ሁጰን ሄ ጋላስ ቃማ ያን አቅስ።
ያይቆብ ፆሳራ ባፀቱዋ
22 ሄ ቃማ ያይቆብ ደንድድ፥ ባ ናምኡ ማቸታ፥ ባ ናምኡ አይለታ፥ ባ ናይታ ታማነ እሶታ ኤክድ፥ ያቦቃ ሻፋ ፕንስ።
23 እ ኤንታ ሻፋ ፕንꬅ ስሚድ ባዉ ደእያባ ኡባ ፕንꬅድ የድስ።
24 ሽን ያይቆብ ባርካ ጉየ አትስ።
ሄ ዎደ እስ አስ ሳእ ዎንታና ጋካናስ እያራ ባፀትሸ አቅስ።
25 ሄ ኡራይ እያ ፆናናዉ ዳንዳኦናይሳ በእዳ ዎደ ያይቆባስ ቡልፅያ መቀꬃ ቦችን፥ እያ ቡልፀይ ከሱዋፐ ከይስ።
26 ያትን ኡራይ እያ፥ “ሳእ ዎንታና ሀንያ ግሾ፥ ታና የዳ” ያግስ።
ሽን ያይቆብ፥ “ኔኒ ታና አንጆና ነና የድከ” ያግስ።
27 ኡራይ፥ “ነ ሱንꬃይ ኦኔ?” ያግድ ኦይችስ።
እ ዛሪድ፥ “ያይቆባ” ያግስ።
28 ኡራይ፥ “ኔኒ ፆሳራነ አሳራ ባፀታዳ ፆንዳ ግሾ፥ ህዛፐ ነ ሱንꬃይ ያይቆባ ጌተቶፎ፥ እስራኤለ (ፆሳራ ባፀትስ) ጌተቶ” ያግስ።
29 ያይቆብ ኡራ፥ “ነ ሱንꬃይ ኦኔ?” ያግድ ኦይችስ።
ሽን ኡራይ፥ “ኔኒ ታ ሱንꬃ አይስ ኦይቻይ?” ያግድ እያ አንጅስ።
30 ሄሳ ግሾ፥ ያይቆብ፥ “ታኒ ፆሳ ሶምኦን በአስ ሽን ፓፃ ደአይስ” ያግድ፥ ሄ በሳ ጵንኤላ (ፆሳ ሶምኦ) ግድ ሱንꬅስ።
31 እ ጵንኤላፐ ደንድያ ዎደ እያ ቦላ ፃልቀይ ዶልስ። እያ ቡልፀ ከሳይ ሳክያ ግሾ ዶጌስ።
32 ያይቆባ ቡልፀይ ዎድረ አሹዋ ማታን ቦሸትዳ ግሾ፥ እስራኤለ አሳይ መሄስ ቡልፀ አሾ ሀች ጋካናዉ ሞኮና።