33
ያይቆብ ኤሳዌራ ጋሄተꬃ
1 ያይቆብ ꬎቁ ግድ ፄልያ ዎደ ኤሳዌይ ባ ኦይዱ ፄቱ አሳራ የይሳ በእስ። ሄሳ ግሾ፥ ናይታ ልያስ፥ ራሄልስነ ናምኡ አይለታስ ሻክ እሚስ።
2 አይለታነ ኤንታ ናይታ ስንꬃን፥ ልያነ እ ናይታ ኤንታ ጌዶን፥ ራሄሎነ ዮሰፋ ዉርሰꬃን ዎꬅስ።
3 ሽን እ ባዉ ስን አꬍድ ባ እሻኮ ማትሸ ሳአ ጋክ ጋክ ላፑንቶሆ ዝግስ።
4 ሽን ኤሳዌይ እያራ ጋሄታናዉ ዎፅ ይድ እያ ቆꬍያ ቆምድ ዬርስ። ናምአይካ ዬክዶሶና።
5 ኤሳዌይ ꬎቁ ግድ ፄልድ ማጫሳታነ ናይታ በእድ፥ “ሀ ኔራ ደኤይሳት ኦናንቴ?” ያግድ ኦይችስ።
ያይቆብ፥ “ታ ጎዳዉ፥ ሀይሳቲ ፆሳይ ነ አይልያስ ባ ኬሀተꬃን እምዳ ናይታ” ያግስ።
6 አይለት ባንታ ናይታራ ሺቅድ እያዉ ዝግዶሶና።
7 ካልድ ልያራነ እ ናይታራ ይድ ዝግዶሶና። ዉርሰꬃን ዮሰፋራነ ራሄልራ ይድ ዝግዶሶና።
8 ኤሳዌይ፥ “ሀ ስንꬃን ብሸ ታራ ጋሄትዳ ዉደይ ኡባይ አይቤ?” ያግድ ኦይችስ።
ያይቆብ፥ “ታ ጎዳዉ፥ ሄስ ታኒ ነ ስንꬃን ሳባ ደማናዉ የድዳይሳታ” ያግስ።
9 ሽን ኤሳዌይ፥ “ታ እሻዉ፥ ታዉ ግድያ ሻሎይ ደኤስ፥ ነባይ ነዉ ግዶ” ያግስ።
10 ያይቆብ፥ “ሀያና፥ ሀእ ታኒ ነ ስንꬃን ሳባ ደምዳባ ግድኮ፥ ሀ ታኒ እመይሳ ኤካ። ኔኒ ታና ሞካ ኤክዳ ግሾ፥ ታ ነ ሶምኡዋ በኤይስ ፆሳ ሶምኦ በኤይሳ መላ።
11 ታኒ ነዉ ኤህዳ ሀ እሞታ ኤካ። ፆሳይ ታዉ ኬህ እምዳ ግሾ ኩምስ” ያግስ። ያይቆብ ዎስድ አጎና እፅዳ ግሾ፥ ኤሳዌይ እያ እሞታ ኤክስ።
12 ኤሳዌይ፥ “አነ የꬋ፥ ታኒ ኔራ እስፈ ባና” ያግስ።
13 ሽን ያይቆብ፥ “ታ ጎዳዉ፥ ናይት ሹጎ ግደይሳ ኤራሳ። ቃስ ታኒ ጋሎ ማራታ ꬋንꬅያ ዶርሳታነ ሚዛ ናጋናዉ ኮሼስ። አሳይ ኤንታ ሀር አቶሽን፥ እስ ጋላስ ምንꬅ ላግኮ፥ መሄ ኡባይ ሀይቃና።
14 ሄሳ ግሾ፥ ታ ጎዳዉ፥ ነ አይለታፐ ስንꬃታዳ ባ። ታኒ ሳይረን ታ ጎዳ ጋካናስ፥ ታ ስንꬃን ደእያ መህያነ ናይታ ሄመꬃ መላ ሎዳን ካላዳ ታ ጎዳ ታኒ ኤዶመን ጋካና” ያግስ።
15 ኤሳዌይ፥ “ያንኮ፥ ታኒ ታ አሳፐ ጉꬃራ ነዉ አሾ” ያግስ።
ሽን ያይቆብ፥ “ኮሸና፤ ታኒ ታ ጎዳ ስንꬃን ሳበትዳይስ ታዉ ግዳና” ያግስ።
16 ሄሳ ግሾ፥ ኤሳዌይ ሄ ጋላስ ኦገን ዎꬍድ ሳይረ ስምስ።
17 ሽን ያይቆብ ሱኮታ ብስ። ያን ባዉ ኬ ኬፅስ፥ ባ መሄታስ ሻቃራ ሻቃርስ። ሄሳ ግሾ፥ ሄ በሳ ሱኮታ (ኩያ ዎይኮ ጋባ) ግድ ሱንꬅስ።
18 ያይቆብ ማሰጰፆመፐ ስሚድ ካናነ ቢታን ደእያ ሴከማ ካታማ ሳሮን ጋክስ። እ ሄ ካታማስ ስንꬃ ባጋራ ዱንካነ ቶክድ ኡትስ።
19 ባ ዱንካንያ ቶክዲ ኡትዳ ጋድያ ሴከማ አዋ ሀሞራ ናይታፐ እስ ፄቱ ብራ ሳንትመን ሻምስ።
20 ያን ያርሾ በሲ ጊግስድ፥ “ጎዳ፥ እስራኤለ ፆሳ” ግድ ሱንꬅስ።