34
ሴከማነ ዲና
1 ልያ ያይቆባስ የልዳ ናእያ ዲና፥ ሄ ዎደ ካናነ ማጫሳታ በአናዉ ከያሱ።
2 ሄ ቢታ ሃርያ ህወ አድያ ሀሞራ ናአ ሴከም እዮ በእድ፥ ዳፍድ ኢስስ።
3 እያ ዎዛናይ ያይቆባ ናእዉ ዲናስ ቃትስ። እ እዉ ምሸትዳ ግሾ ሎኦ ቃላራ እዮ ኦድስስ።
4 ሴከም ባ አዋ ሀሞራ፥ “ታዉ ሀ ናእዉ ማቾ ኦይቻርክ” ያግስ።
5 ያይቆብ ባ ናእዉ፥ ዲና፥ አዝን ዳፍዳይሳ ስእዳ ዎደ እያ አደ ናይት መሄራ ባዞን ደኦሶና። ሄሳ ግሾ፥ ኤንቲ ያና ጋካናስ ስእ ግስ።
6 ሄሳፈ ጉየ፥ ሴከማ አዋ ሀሞር ያይቆባ ኦድሳናዉ ይስ።
7 ያይቆባ አደ ናይት ባዞፈ ይድ ሄሳ ስእዶሶና። ኤንቲ ሴከም ያይቆባ ናእዉ ዳፍድ፥ ኢስድ እስራኤለ ዬላይዳ ግሾ ዳሮ ይሎትዶሶና።
8 ሽን ሀሞር ኤንታኮ፥ “ታ ናአይ ሴከም ህንተ ናኤስ ዳሮ ምሸቴስ፥ ሀያና እዮ እያዉ ማቾ እመርከት።
9 ኑራ ኤከትተነ ገለትተ፥ ህንተ ማጫ ናይታ ኑስ እምተ፥ ኑ ማጫ ናይታካ ህንተዉ ኤክተ።
10 ህንተ ኑ ግዶን ዳናዉ ዳንዳኤታ። ቢታይ ዳሮ ዳልጋ፥ እያ ኦꬅድ ዛልእድ ህንተዉ አቆ ደማናዉ ዳንዳኤታ” ያግስ።
11 ሄ ዎደ ሴከም ዲና አዋነ እ እሻታ፥ “ታኒ ህንተ ስንꬃን ሳበትኮ፥ ህንተ ኮይያባ አይብባ ግድኮካ እማና።
12 ህንተ ምሽራ ናኤስ እሞታነ ኮይታ ህንተ ኮይዳ መላ ታና ኦይችተ። ታኒ ህንተ ታና ኦይችዳባ ኡባ እማና። ሽን ታኒ ማቻናዉ ናእዉ ታዉ እመርከት” ያግስ።
13 ባንታ ምችዉ ዲና ሴከም ቱንስዳ ግሾ፥ ያይቆባ አደ ናይት ሴከማስነ እያ አዋ ሀሞራስ ዎርዶትዶሶና።
14 ኤንታኮ፥ “ኑኒ ሄሳ መላ ፓላባ ኦꬃናዉ ዳንዳኦኮ፥ ኑኒ ኑ ምችዉ ቃፃረትቦና አሳስ እሞኮ፥ ሄስ ኑና ካዉሽያባ።
15 ህንተ ኑስ እስባ ኤሮ ጊኮ ኑ ህንተዉ ኤሮ ጋና። ሄስካ፥ ህንተ ቢታ አደ አሳ ኡባይ ቃፃረትድ ኑዳ ሀንኮ፥
16 ኑኒ ኑ ማጫ ናይታ ህንተዉ እማናዉ ኤሮ ጋና። ህንተ ማጫ ናይታካ ኑስ ኤካና። ኑኒ ህንተ ግዶን ደእድ ህንተራ እስ አሰ ግዳና።
17 ሽን ህንተ ቃፃረታናዉ ኤሮ ጎና እፅኮ፥ ኑኒ ኑ ምችዉ ኤክ ባና” ያግዶሶና።
18 ያትን ሀ ኤንቲ ግዳባይ ሀሞራስነ እያ ናአ ሴከማስ ሎኦ ዳንስ።
19 ሄ ፓንꬃይ ባ አዋ ኬꬃን ደእያ ኡባፈ አꬍድ ቦንቸትዳ ግሾ ኮይዳባ ኦꬃናዉ እያዉ ማት ደኤስ። ያይቆባ ናእዉ ዳሮ ዶስዳ ግሾ፥ ኤንቲ ግዳባ ኦꬃናዉ ጉየ ግቤና።
20 ሄ ዎደ ሀሞርነ እያ ናአይ ሴከም ባንታ ካታማ ዳባባ ብድ፥ ባንታ ካታማ አሳስ ሀይሳዳ ያግድ ኦድዶሶና።
21 “ሀ አሳት ኑራ ስጋ ደኦሶና። ቢታይ ዳሮ ዳልጋ ግድያ ግሾ ኤንቲ ሀ ቢታን ጎዮ ዛልኦ። ኤንታ ማጫ ናይታካ ኑኒ ኤካና፥ ኤንትካ ኑ ማጫ ናይታ ኤኮና።
22 ሽን ኑራ ኤንቲ እስ አሳዳ ደአናዉ ኑኒ እስባ ኤሮ ጋናዉ ኮሼስ። ሄስካ፥ ኤንቲ ቃፃረትዳይሳዳ ኑ አደ አሳ ኡባይ ቃፃረታናይሳ።
23 ኑኒ ሄሳዳ ኦꬅኮ፥ ኤንታ መሄይነ፥ ኤንታ አቆ ኡባይ ኑባ ግደኔ? ሄሳ ግሾ፥ አነ ኑኒ ኤንቲ ገይሳ ኤሮ ጎስ። ኤንትካ ኑ ግዶን ደአና” ያግዶሶና።
24 ካታማ ዳባባ ሺቅዳ አሳት ኡባይ ሀሞራስነ እያ ናአ ሴከማስ፥ “ኤሮ” ግዶሶና። ያትን ሄ ካታማ አደ አሳት ኡባይ ቃፃረትዶሶና።
25 ሄꬓንꬆ ጋላስ፥ ኤንቲ ኡባይ ባንታ ቃፃራ ማዱንꬃ ሳከትሽን፥ ያይቆባ አደ ናይታፐ ናምአይ፥ ዲና እሻት፥ ስሞናራነ ሌወራ ባንታ ማሻ ኤክድ ኦንካ ኤሮና ካታማ ገልድ አደ አሳ ኡባ ዎꬍዶሶና።
26 ሀሞራነ እያ ናአ ሴከማ ማሻን ዎꬍድ፥ ባንታ ምችዉ ዲና ሴከማ ኬꬃፈ ኤክ ብዶሶና።
27 ያይቆባ ሀራ አደ ናይት አሀታ ቦላ ገልድ ባንታ ምችዉ ዲና ቱንስዳ ካታማ ኡባ ቦንቅዶሶና።
28 ኤንታ ዶርሳ ዉድያ፥ ሚዛ ዉድያ፥ ሀርያ፥ ካታማ ግዶን ደእያባነ ጋፃን ደእያባ ኡባ ኤክዶሶና።
29 ኤንታ ኬꬃን ደእያ አቁዋ ኡባ፥ ኤንታ ናይታ ኡባነ ማጫሳታ ኡባ ድእዶሶና።
30 ያይቆብ ስሞናነ ሌወ፥ “ህንተ ታ ቦላ ግታ መቶ ኤህደታ። ሀ ቢታን ደእያ ካናነትነ ፓርዘት ታና እፃና። ኑኒ ታይቦን ጉꬃ፥ ኤንቲ እስፈ ግድድ ታ ቦላ ደንድኮ፥ ታንነ ታ ሶ አሳይ ꬋያና” ያግስ።
31 ሽን ኤንቲ፥ “ያትን፥ እ ኑ ምችዉ ላይማ ማጫሳዳ ኦꬃናዉ በሲ?” ያግዶሶና።