12
ሽሻቅ የሩሳላመ ቦላ ደንድስ
(1 ካዎ 14:25-28)
ሮብኣማ ካዎተꬃይ ምንድ ኤቅዳ ዎደ እነ እስራኤለ አሳ ኡባይ ጎዳ ህግያ አጋግዶሶና። ኤንቲ ጎዳስ አማነቶና እፅዳ ግሾ ሮብኣም ካዎትዳ እቻሻንꬆ ላይꬃን ግብፀ ካዎይ ሽሻቅ የሩሳላመ ቦላ ደንድስ። እያዉ እስ ሙኩሉነ ናምኡ ፄቱ ፓራ ጋረት፥ ኡሱፑን ታሙ ሙኩሉ ፓራ አሳትነ ታይቦይ ባይና ሊበ፥ ሱካነ ቶጰ ኦላንቾት ደኦሶና። ካዎይ ሽሻቅ ግምበትዳ ይሁዳ ካታማታ ኦይክድ የሩሳላመ ጋካናዉ ይስ።
ሄሳፈ ጉየ፥ ናበይ ሻማየይ ሮብኣማነ ሽሻቃ ያይድ የሩሳላመን ሺቅድ ደእያ ይሁዳ ሀላቃታኮ ይድ፥ “ጎዳይ፥ ‘ህንተ ታና አግዳ ግሾ፥ ታ ህንተና ሽሻቃ ኩሸን የጋስ’ ” ያግስ።
እስራኤለ ሀላቃትነ ካዎይ ሮብኣም፥ ባንታና ካዉሽድ፥ “ጎዳይ ፅሎ” ያግዶሶና።
ኤንቲ ባንታና ካዉሽዳይሳ ጎዳይ በእዳ ዎደ ሻማያኮ ሀይሳዳ ያግስ፤ “ኤንቲ ባንታና ካዉሽዳ ግሾ ታ ኤንታ ꬋይስከ፤ ታ ኤንታ አሻና። ታ ሀንቆይ ሽሻቃ ባጋራ የሩሳላመ ቦላ ጉከና። ግዶሽን፥ ታዉ ሃረተይሳንነ ሀራ ካዎታስ ሃረተይሳን ደእያ ዱማተꬃ ኤንቲ ኤራና መላ ሽሻቃስ ሃረታና” ያግስ።
ግብፀ ካዎይ ሽሻቅ የሩሳላመ ኦልድ፥ ፆሳ ኬꬃንነ ካዎ ጋꬎን ደእያ ሻሎ ኡባ ኤክስ። ሶሎሞነይ ዎርቃፈ ኦስስዳ ጎንዳለታ ቦንቅስ። 10 እ ኤፍዳ ዎርቃ ጎንዳለታ ግሾ ካዎይ ሮብኣም ናሰ ብራታፐ ሀራ ጎንዳለታ ኦስስድ ካዎ ጋꬎ ፐንገ ናገይሳታ ሀላቃታ ኩሸን ዎꬅስ። 11 ካዎይ ፆሳ ኬꬅ ገልያ ዎደ ኡባን ፐንግያ ናገይሳት ሄ ጎንዳለታ ኦይክድ እያ ካሎሶና። ካዎይ ስምኮ ኤንቲ ዛሪድ ናገይሳታ ኬꬃን ዎꬆሶና። 12 ሮብኣም ባና ካዉሽዳ ግሾ እ ꬋዮና መላ ጎዳ ሀንቆይ እያፐ ስምስ። ይሁዳ ቢታ ኡባን ቃስ ሳእ እንጀትስ።
13 ካዎይ ሮብኣም ባና ምንꬅድ የሩሳላመን ካዎትስ፤ ሮብኣም ካዎትዳ ዎደ እያዉ ላይꬅ ኦይታማነ እስኖ። ጎዳይ ባ ሱንꬃይ ያን ፄገታና መላ እስራኤለ ቢታ ኡባን ዶርዳ፥ የሩሳላመን ታማነ ላፑን ላይꬅ ካዎትስ። ሮብኣማ አይያ አሞነ ማጫስ ናእሞ። 14 ሮብኣም ጎዳ ዎዛናፐ ጎይናናዉ ኮይቦና ግሾ ኢታባ ኦꬅስ።
15 ሮብኣም ባ ካዎተꬃ ዎድያን ኦꬅዳባይ ኮይሮፐ ዉርሰꬅ ጋካናዉነ እያ የለታ ማራይ፥ ናብያ ሻማያ ታርከ ማፃፋንነ ቆንጨꬅ በእያ እዶ ታርከ ማፃፋን ፃፈትስ ግደኔ? ሮብኣም ነ እዮርባም ኡባ ዎደ ኦለትሸ ደእዶሶና። 16 ሮብኣም ሀይቅድ ባ ማይዛታ ጋክስ፤ እ ዳዊታ ካታማን ሞገትስ። እያ በሳን እያ ናአይ አብይ ካዎትስ።