13
ይሁዳ ካዋ አብያ
(1 ካዎ 15:1-8)
1 ካዎይ እዮርባም ካዎትዳ ታማነ ሆስፑንꬆ ላይꬃን አብይ ይሁዳን ካዎትስ።
2 አብይ የሩሳላመን ሄꬑ ላይꬅ ካዎትስ። እያ አየ ሱንꬃይ ምካዮ፤ እያ ግብአ አድያ ኡርኤላ ናአ።
አብይነ እዮርባም ኦለትሸ ደእዶሶና።
3 አብይ ዶረትዳ ኦይዱ ፄቱ ሙኩሉ ምኖ ኦላንቾታ ኤክድ ኦላስ ከይስ። እዮርባም ዶረትዳ ሆስፑን ፄቱ ሙኩሉ ምኖ ኦላንቾታ ኤክድ አብያራ ኦለታናዉ ከይስ።
4 ሄሳፈ ጉየ፥ አብይ ደረይ ዳርያ ኤፍሬማ ቢታን ደእያ ፃማራይማ ደርያ ሁጰን ኤቅድ፥ ሀይሳዳ ያግስ፤ “ነኖ፥ እዮርባማ፥ ህንተኖ፥ እስራኤለ አሳዉ፥ ኡባይ ታ ግያባ ስእተ!
5 ጎዳይ እስራኤለ ፆሳይ ዳዊታነ እያ ኮቻይ እስራኤለ ቦላ መርናዉ ካዎታና መላ ዳዊታራ ማፅነን ጫቅዳይሳ ኤረከትዬ?
6 ግዶሽን፥ ዳዊታ ናኣ ሶሎሞነ አይለይ፥ ናባፃ ናአይ እዮርባም ደንድድ ባ ጎዳ ቦላ ማካልስ።
7 ሮብኣም ዮጋ፥ ኤር ባይናይሳነ ኤንታራ ኤቀታናዉ ዳንዳኦና ዎደ ፓꬆና ላፋ አሳት እዮርባማኮ ሺቅድ ሶሎሞነ ናኣ ሮብኣማ ቦላ ደንድዶሶና።
8 “ጎዳይ ዳዊታ ኮቻስ እምዳ ካዎተꬃራ ህንተ ኤቀታናዉ ቆፔታ። ህንተ ሄሳ ቆፕዳይ ህንተ ዳሮ ግድያ ግሾነ ፆሳታ ግዳና መላ እዮርባም ዎርቃፈ መꬍዳ ማራት ህንተራ ደእያ ግሾሳ።
9 ጎዳስ ኦꬅያ አሮና ኮቸ ግድዳ ኦꬅያ ካህነታነ ሌወታ ህንተ የደꬅደታ። ሀራ ቢታ አሳይ ኦይሳዳ ህንተዉ ሀራ ካህነታ ሹምደታ። ባና ዱማያናዉ እስ ዎፋኖነ ላፑን ማራዘ ኤክድ ያ ኦናካ ዎርዶ ፆሳታስ ካህነ ኦꬅድ ሹማታ።
10 “ግዶሽን፥ ኑስ ጎዳይ ኑ ፆሳ፤ ኑኒ እያ አግቦኮ። ካህነ ግድድ ኦꬅያ አሮና ኮቻት ኑስ ደኦሶና፤ ሌወት ኤንታ ማዶሶና።
11 ኤንቲ ኡባ ጋላስ ዎንታነ ኦማርስ ጎዳስ ፁሳ ያርሾ ያርሾሶናነ ሳውያ እፃነ ጩይሶሶና። ጎዳ ስንꬃን ዎꬅያ ኡይꬃ ጌሻ ፃርጴዛ ቦላ ዎꬆሶና። ኦማርስ ኦማርስ ፆምፐ ዎꬅያ ኮጫ ቦላ ታማ ኦይꬆሶና። ኑኒ ጎዳ ኑ ፆሳ ኪታ ናጎስ፤ ሽን ህንተ እያ አግደታ።
12 ፆሳይ ኑራ ደኤስ፤ እ ኑና ካለꬄስ። ኦላ ሞይዘ ፑንያ እያ ካህነት ኑራ ደኦሶና፤ ኑኒ ህንተራ ኦላ ዶማናዉ ሞይዘ ፑናና። እስራኤለ አሳዉ፥ ጎዳራ ህንተ አዋታ ፆሳራ ኦለቶፍተ! ህንተ እያ ፆናናዉ ዳንዳኤከታ” ያግስ።
13 ሄ ዎደ እዮርባም ባ ኦላንቾታፐ እስ ጩጋ ኤንታፈ ጉየራ ዙግድ ናጋና መላ የድስ። አትዳ እስራኤለ ኦላንቾት ይሁዳ ኦላንቾታ ስንꬃን ደእያ ዎደ ዙግድ ናግያ ኦላንቾት ኤንታፈ ጉየራ ደኦሶና።
14 ይሁዳ ኦላንቾት ጉየ ስሚድ ፄልያ ዎደ ኤንታ ኦላናዉ ይዳይሳት ጉየራነ ስንꬃራ ደኤይሳ በእዳ ዎደ ጎዳኮ ዋስዶሶና፤ ካህነት ሞይዘ ፑንዶሶና።
15 ይሁዳ ኦላንቾት ኦላ ዋሶ ዋስዳ ዎደ ጎዳይ እዮርባማነ እስራኤለ አሳ ኡባ አብያ ስንꬃንነ ይሁዳ ስንꬃን ፆንስ።
16 እስራኤለ ኦላንቾት ይሁዳ ኦላንቾታ ስንꬃፈ ባቃትን ፆሳይ ኤንታ ይሁዳ ኦላንቾታ ኩሸን አꬅድ እሚስ።
17 አብይነ እያ ኦላንቾት ኤንታ ዲፍ ኦꬅድ ዉርስዶሶና። ሄ ኦላን 500,000 ዶረትዳ እስራኤለ ኦላንቾት ሀይቅዶሶና።
18 እስራኤለ አሳይ ሄ ዎደ ፆነትዶሶና፤ ይሁዳ አሳይ ጎዳን ባንታ አዋታ ፆሳን አማነትዳ ግሾ ኤንታ ፆንዶሶና።
19 አብይ እዮርባማ የደꬅድ እያፐ ቤተለ፥ ይሻናነ ኤፍሮና ኤንታ ጉታታራ ኦይክስ።
20 አብይ ደእዳ ላይꬃን እዮርባም ስሚድ ምንቤና። ጎዳይ እዮርባማ ሾጭን ሀይቅስ።
21 ግዶሽን፥ አብይ ምን ምን ብስ። አብይ ታማነ ኦይዱ ማቾ ኤክድ ላታማነ ናምኡ አደ ናይታነ ታማነ ኡሱፑን ማጫ ናይታ የልስ።
22 አትዳ አብይ ታርከይ፥ እ ኦꬅዳባይነ እ ኦድዳባይ ናብያ እዶ ታርከ ማፃፋን ፃፈትስ።