14
ይሁዳ ካዋ አሳ
1 አብይ ሀይቅድ ባ ማይዛታ ጋክስ፤ እ ዳዊታ ካታማን ሞገትስ። እያ በሳን እያ ናአይ አስ ካዎትስ። እ ካዎትዳ ዎደ ቢታይ ታሙ ላይꬅ ዎፑ ግድ ደእስ።
2 አስ ጎዳ ባ ፆሳ ስንꬃን ሎኦባነ ሱረባ ኦꬅስ።
3 አስ አላጋ ፆሳታስ ያርሽያ በሳታነ ꬎቃ ጎይኖ በሳታ ꬋይስስ። ጎይናናዉ ሹቻፈ ኦሰትዳ ቱሳታ መንረꬅስ። አሼራ ጌተትያ ፆሳ ምስለታ ቃንፀረꬅድ የግስ።
4 ይሁዳ አሳይ ጎዳ ባንታ አዋታ ፆሳ ኮያና መላ፥ እያ ህግያነ እያ ዎጋ ናጋና መላ አስ ኪትስ።
5 ꬎቃ ጎይኖ በሳታነ እፃነ ጩይስያ በሳታ ይሁዳ ካታማታፐ ꬋይስዳ ግሾ እያ ካዎተꬃ ላይꬃን ቢታይ ዎፑ ግድ ደእስ።
6 ካዎይ አስ ይሁዳ ካታማታስ ሚፃታ ኬፅስ። ጎዳይ እያ ሸምፕስዳ ግሾ ቢታይ ሸምፕስ፤ እያ ላይꬃን እያራ ኦንካ ኦለትቤና።
7 አስ ይሁዳ አሳኮ፥ “አነ ኑኒ ሀ ካታማታ ኤሶስ፤ ኤንታ ዩሾን ሚፃታ ኬፆስ፤ አዱሳ ሻኮ፥ ፐንገታነ ጎርደታ ጊግሶስ። ኑኒ ጎዳ ኑ ፆሳ ኮይዳ ግሾ ቢታይ ሀእካ ኑባ። ኑኒ እያ ኮይዳ፤ እ ኑስ ኡባ ባጋራ ሸምፖ እሚስ” ያግስ። ሄሳ ግሾ፥ ኤንቲ ካታማታ ኬፅድ ፖልዶሶና።
8 አሳስ ይሁዳ ኮቻፈ ዎጋ ጎንዳለታነ ቶራታ ዳንጭዳ ሄꬑ ፄቱ ሙኩሉ ኦላንቾት ደኦሶና። ብንያመ ኮቻፈ ጉꬃ ጎንዳለታ ዳንጭዳነ ዶንገን ዱከይሳት ናምኡ ፄታነ ሆስፑን ታሙ ሙኩሉ ኦላንቾት ደኦሶና። ሄሳት ኡባይ ምኖ ኦላንቾታ።
9 ዛራሀ ጌተትያ እስ ቶጰ አደይ እስ ምሎነ ኦላንቾታነ ሄꬑ ፄቱ ፓራ ጋረታ ኤክድ ይሁዳ ኦላናዉ ይድ ማርሳ ጋክስ።
10 አስ እያራ ኦለታናዉ ከይድ ባ ኦላንቾታ ማርሳ ማታን ደእያ ፃፋታ ዛንጋራን ሳልፕስስ።
11 አስ ጎዳ ባ ፆሳ ሀይሳዳ ያግድ ዎስስ፤ “አቤት ጎዳዉ፥ ዎልቅ ባይና ኦላንቾታ ዎልቃማ ኦላንቾታፐ አሸይ ነ መል ባዋ። አቤት ጎዳዉ፥ ኑ ፆሳዉ፥ ኑኒ ነናን አማነትድ፥ ሀ ዎልቃማ ኦላንቾታራ ኦለታናዉ ነ ሱንꬃን ይዳ ግሾ ነ ኑና ማዳ። አቤት ጎዳዉ፥ ነ ኑ ፆሳ፤ ነና አስ ፆነና” ያግስ።
12 ጎዳይ ቶጰ ኦላንቾታ አሳ ስንꬃንነ ይሁዳ ኦላንቾታ ስንꬃን ሾጭን ቶጰ ኦላንቾት ባቃትዶሶና።
13 አስነ እያራ ደእያ አሳይ ኤንታ ገራራ ጋካናዉ የደꬅዶሶና። ቶጰ ኦላንቾታፐ ዳሮይ ሀይቅዳ ግሾ ኤንቲ ስሚድ ምናናዉነ ኦለታናዉ ዳንዳእቦኮና። ሄሳዳ ሀንድ፥ ቶጰ ኦላንቾት ጎዳንነ እያ ኦላንቾታን ፆነትዶሶና። ካዋ አሳ ኦላንቾት ዳሮ ድኦ ድእዶሶና።
14 ሄ ሄራን ደእያ አሳይ ጎዳይ ኦꬅዳባ በእድ ዳሮ ዳጋምስ። አሳ ኦላንቾት ገራራ ዩሹዋን ደእያ ካታማታ ኡባ ቦንቅድ ꬋይስዶሶና።
15 ቃስ መሄ ሞꬃታ ኦልድ፥ ዳሮ ዶርሳነ ግማለታ ድእድ፥ የሩሳላመ ስምዶሶና።