1 ኦዴዳ ናኣ አዛርያሳ ቦላ ፆሳ አያናይ ዎꬍስ። 2 ካዋ አሳራ ጋሄታናዉ አዛርያስ ብድ፥ “አሳ፥ ይሁዳ አሳዉነ ብንያመ አሳዉ ስእተ! ህንተ ጎዳራ ግድኮ እካ ህንተራ ግዳና። ህንተ እያ ኮይኮ እ ህንተዉ በንታና፤ ሽን ህንተ እያ አግኮ እ ህንተና አጋና። 3 እስራኤለ አሳይ ቱማ ፆሲ ባይና፥ ታማርስያ ካህነይነ ህገይ ባይና ዳሮ ዎደ ደእዶሶና። 4 ሽን ባንታና መቶይ ጋክዳ ዎደ ኤንቲ ጎዳኮ፥ እስራኤለ ፆሳኮ ስሚድ እያ ኮይን እ ኤንታዉ በንትስ። 5 ሄ ዎደ ቢታን ደእያ አሳ ኡባይ ዳጋማን ደእያ ግሾ ሳሮተꬃን ከይድ ገልያ ኦንካ ባዋ። 6 ፆሳይ ኤንታ ዱማ ዱማ መቶን የግዳ ግሾ ደረይ ደርያ፥ ካታማይ ካታማ ኡንኤꬄስ። 7 ግዶሽን፥ ህንተ፥ ህንተ ኦሱዋስ ዎይቶይ ደእያ ግሾ ምንተ፤ ጉየ ጎፕተ!” ያግስ።

8 ካዎይ አስ ሀ ቃላነ ኦዴዳ ናአይ ናበይ አዛርያስ ኦድዳ ቃላ ስእዳ ዎደ ምንስ። አስ ይሁዳነ ብንያመ ቢታ ኡባፈነ እ ኦይክዳ ደረይ ዳርያ ኤፍሬማ ቢታን ደእያ እፀትዳ ኤቃ ምስለታ ꬋይስስ። ፆሳ ኬꬃ ስንꬃን ደእያ ጎዳ ያርሾ በሳ ኦራꬅስ።

9 እያ ጎዳይ ፆሳይ እያራ ደኤይሳ በእዳ ግሾ ዳሮ አሳይ እስራኤለፐ እያኮ ይዶሶና። ይሁዳ አሳነ ብንያመ አሳ ኡባ፥ ኤንታራ ደእያ ኤፍሬማ ኮቻታ፥ ምናሰ ኮቻታነ ስሞና ኮቻታ አስ ሺሽስ። 10 አስ ካዎትዳ ታማነ እቻሻንꬆ ላይꬃን፥ ሄꬓንꬆ አጌናን አሳይ የሩሳላመን ሺቅዶሶና። 11 ሄ ጋላስ ኤንቲ ድእድ ኤህዳባፐ ላፑን ፄቱ ኮርማታነ ላፑን ሙኩሉ ዶርሳታ ጎዳስ ያርሽዶሶና። 12 ጎዳ ባንታ አዋታ ፆሳ ባንታ ኩመꬃ ዎዛናንነ ባንታ ኩመꬃ ሸምፑዋን ኮያናዉ ጫቅዶሶና። 13 ጎዳ እስራኤለ ፆሳ ኮዮና አስ፥ ናአ ግድን ጭም፥ አደ ግድን ማጭ ሀይቆ። 14 ሄሳ ግታ ዋሶን፥ እልልሳን፥ ሞይዘንነ ዛየን ባንታ ጎዳስ ጫቅዶሶና። 15 ይሁዳ አሳ ኡባይ ባንታ ኩመꬃ ዎዛናን ሀ ጫቁዋ ጫቅዳ ግሾ ኡፋይትዶሶና። ጎዳ ኤንቲ ምንꬅድ ኮይን እ ኤንታዉ በንትስ። ጎዳይ ኤንታዉ ኡባ ባጋራ ዎፓ እሚስ።

16 ቃስ፥ ካዎይ አስ ባ አዋ አይያ ማእካ አሼራ ጌተትያ ማጫ ፆሴ ኤቃ ምስለ ኦꬅዳ ግሾ ካዋ አይዉ ጌተትያ ቦንቹዋፈ እዮ ድግስ። አስ ሄ ኤቃ ምስልያ ቃንፀረꬅድ ቀድሮና ዛንጋራን ፁግስ። 17 ꬎቃ ጎይኖ በሳታ እስራኤለ ቢታፈ ꬋይሶና እፅኮካ አስ ባ ደእዳ ላይꬃ ኡባን ጎዳስ አማነትዳ አስ ግድድ ደእስ። 18 እነ እያ አዋይ ጎዳስ ዱማይዳ ብራ፥ ዎርቃነ ሀራ ሚሸታ ኤህድ ፆሳ ኬꬃን ዎꬅስ። 19 አስ ካዎትዳ ሀስታማነ እቻሻንꬆ ላይꬅ ጋካናዉ ኦል ባዋ።