19
1 ሄሳፈ ጉየ፥ ካዎይ እዮሳፈፅ የሩሳላመን ደእያ ባ ጋꬎ ሳሮ ስምስ።
2 ቆንጨꬅ በእያ፥ አናና ናአይ እዩይ ካዋ እዮሳፈፃራ ጋሄታናዉ ከይድ፥ “ኔኒ ኢታታ ማዳናዉ ዎይኮ ጎዳ እፀይሳታ ዶሳናው በሲ? ሄሳ ግሾ፥ ጎዳ ሀንቆይ ነ ቦላ ይስ።
3 ግዶሽን፥ አሼራ ኤቃ ምስለታ ቢታፈ ድግዳ ግሾነ ፆሳ ኮያናዉ ነ ዎዛና ጊግስዳ ግሾ ኔኒ ሎኦባ ኦꬃዳሳ” ያግስ።
እዮሳፈፅ ዳይናታ ሹምስ
4 እዮሳፈፅ የሩሳላመን ደእስ። በርሳበፐ ዶምድ ደረይ ዳርያ ኤፍሬማ ቢታ ጋካናዉ አሳ ግዶን ዩይድ፥ ጎዳኮ፥ ኤንታ አዋታ ፆሳኮ ኤንታ ዛርስ።
5 ይሁዳ ቢታን ደእያ ግምበትዳ ካታማታ ኡባን ዳይናታ ሹምስ።
6 ኤንታኮ፥ “ህንተ ፕርደይ አሳሳ ግዶናሽን፥ ህንተ ፕርድያ ዎደ ጎዳይ ህንተራ ደእያ ግሾ ህንተ ፕርድያ ዎደ ናገትተ።
7 ሀእካ ጎዳስ ያይተ፤ ጎዳ ኑ ፆሳ ማታን ናቆይ፥ ሶምኦ ፄልድ ማደይነ ዎꬋፈ ኤኮይ ባይና ግሾ አኬክድ ፕርድተ” ያግስ።
8 ቃስ፥ ጎዳ ህግያ ፖልሳና መላነ አሳ ግዶን ደንድያ ሞቱዋ ፕርዳና መላ ሌወታፐ፥ ካህነታፐነ እስራኤለ አሳ ሶ ሀላቃታፐ ጉꬃ አሳታ እዮሳፈፅ የሩሳላመን ሹምስ።
9 እዮሳፈፅ ኤንታ ሀይሳዳ ያግድ ኪትስ፤ “ጎዳስ ያሻን፥ አማነተꬃንነ ኩመꬃ ዎዛናን ኦꬅተ።
10 ባንታ ካታማን ደእያ ህንተ እሻት ሸምፖ ዎꬎን፥ ህገ ዎይኮ ኪታ ዎይኮ አዋጆ መንꬆን ህንተኮ ዪኮ፥ ኤንቲ ጎዳ ስንꬃን ባላ ግዶናዳ፥ እያ ሀንቆይ ህንተ ቦላነ ህንተ እሻታ ቦላ ዮናዳ ኤንታ ሴርተ። ህንተ ኤንታ ሴርኮ ህንተ ህንተ ሁጰን ባላ ግደከታ።
11 ጎዳባ ግድዳ ኡባን ካህነታ ሀላቃ አማረ፤ ካዎባ ግድዳ ኡባን ይሁዳ ኮቻስ ሀላቃ ግድዳ እስማኤላ ናኣ ዛባዳ ሹማስ። ሌወት ህንተ ቦላ ሀላቃ ግዳና። ህንተ ምንድ ኦꬅተ፤ ሱረባ ኦይሳራ ጎዳይ ግዶ” ያግስ።