20
ሞአበነ አሞነ ፆነተꬅ
1 ሄሳፈ ጉየ፥ ሞአበትነ አሞነት ማኡናት እዮሳፈፃ ቦላ ደንድዶሶና።
2 ጉꬃ አሳት እዮሳፈፃኮ ይድ፥ “ማፅነ አባፈ ሄፍንꬃን ደእያ ኤዶመፐ ዳሮ ኦላንቾት ነና ኦላናዉ ይዶሶና። ኤንቲ ሀሳሶን-ታማራን ደኦሶና” ያግድ ኦድዶሶና። (ሀሳሶን-ታማር ኤንጋዳስ ሀራ ሱንꬁ።)
3 እዮሳፈፅ ያይዳ ግሾ ጎዳ ኦይቻናዉ ቆፋ ቃችስ፤ ይሁዳ ቢታ ኡባን ፆማ አዋጅስ።
4 ይሁዳ አሳ ኡባይ ጎዳፐ ማዶ ኮያናዉ ሺቅዶሶና፤ ኤንቲ ጎዳፐ ማዶ ኮያናዉ ይሁዳ ካታማ ኡባፈ ይዶሶና።
5 እዮሳፈፅ፥ ይሁዳነ የሩሳላመ ሺቁዋ ግዶን፥ ፆሳ ኬꬃን ደእያ ኦራꬃ ዳባባ ስንꬃን ኤቅስ።
6 ባ ቃላ ꬎቁ ኦꬅድ፥ “አቤት ጎዳዉ፥ ኑ አዋታ ፆሳዉ፥ ሳሎን ደእያ ፆሳይ ነና ግድኪ? ሳአን ደእያ ካዎተꬃታ ኡባ ሃረይ ነና። ግታተꬅነ ዎልቅ ነ ኩሸን ደእያ ግሾ ኔራ ኤቀታናዉ ዳንዳኤይ ባዋ።
7 አቤት ኑ ፆሳዉ፥ ካሰ ሀ ቢታን ደእያ አሳ፥ እስራኤለ ስንꬃፈ የደꬃዳ ነ ላግያ አብራሃመ ዘረꬃስ መርናዉ እምዳይ ነና ግድኪ?
8 ኤንቲ ሀ ቢታን ደእዶሶና፤ ያን ነ ሱንꬃስ ኬ ኬፅድ፥
9 ‘ኑ ቦላ ኢታ መቶይ ዎይኮ ኦል ዎይኮ ጋዶይ ዎይኮ ኮሽ ጋክኮ፥ ነ ሱንꬃይ ደእያ ነ ኬꬃ ስንꬃንነ ነ ስንꬃን ኤቅድ፥ ኑ መቱዋን ኔኮ ዋሳና። ነ ኑ ዋሱዋ ስአዳ ኑና አሻና’ ያግዶሶና።
10 “ሄኮ፥ ሀእካ፥ እስራኤለ አሳይ ግብፀፈ ከይዳ ዎደ፥ ኤንታ ቢታ ኦሎና መላ ኦꬃዳ ኤንታ ꬋይሶና መላ ድግዳ አሞነት፥ ሞአበትነ ሳይረት ሀ ቢታን ደኦሶና።
11 ኑ ኦꬅዶባስ ኤንቲ ኑስ ዛርዳባ በአ። ነ ኑስ እምዳ ላታ ቢታፈ ኤንቲ ኑና የደꬃናዉ ይዶሶና።
12 አቤት ኑ ፆሳዉ፥ ነ ኤንታ ፕርድኪ? ኑና ኦላናዉ ይዳ ሀ ዳሮ ኦላንቾታራ ኦለታናዉ ኑስ ዎልቅ ባዋ። ኑኒ ኦꬃናባ ኤሮኮ፤ ሽን ኑ አይፈት ነና ፄሎሶና” ያግስ።
13 ይሁዳ አሳ ኡባይ ባንታ ናይታራነ ባንታ ማቸታራ ሺቅድ ጎዳ ስንꬃን ኤቅዶሶና።
14 ሄ ዎደ ዛካርያሳ ናአይ ያሀዝኤል ሺቁዋ ግዶን ኤቅዳሽን ጎዳ አያናይ እያ ቦላ ዎꬍስ። ዛካርያስ ባናያ ናአ፤ ባናይ ይኤላ ናአ፤ ይኤል ማታና ናአ፤ ማታን ሌወ ኮቸነ አሳፋ ያራ።
15 ጎዳ አያናይ ያሀዝኤላ ቦላ ዎꬍን፥ “ካዋዉ እዮሳፈፃ፥ ይሁዳንነ የሩሳላመን ደእያ አሳዉ፥ ኡባይ ስእተ! ጎዳይ ህንተና ያጌስ። ‘ሀ ዳሮ ኦላንቾታ ጋሶን ያዮፍተነ ዳጋሞፕተ። ኦላይ ህንተባ ግዶናሽን ፆሳባ።
16 ዎንቶ ኤንታ ቦላ ከይድ ፂፃ ጌተትያ በሳ ፑደ ከይሽን ይሩኤላ መላ ቢታን ደእያ ዛንጋራ ዉርሰꬃን ህንተ ኤንታ ደማና።
17 ሀ ኦላ ኦለተይ ህንተና ግደከታ። ይሁዳነ የሩሳላመ አሳዉ፥ ህንተ በሳ በሳ ኦይክድ ምንድ ኤቅተ። ጎዳይ ህንተና አሽያ አሹዋ በእተ። ያዮፍተ፤ ዳጋሞፍተ፤ ዎንቶ ኤንታ ቦላ ከይተ፤ ጎዳይ ህንተራ ግዳና’ ” ያግስ።
18 እዮሳፈፅ ሶምኦ ሳአ ጋꬅድ ጎይንስ፤ ይሁዳ አሳ ኡባይ የሩሳላመን ደእያ አሳ ኡባይ ጎዳ ስንꬃን ኩንድድ ጎይንዶሶና።
19 ቃሃታነ ቆረ ኮቻፈ ጉꬃ ሌወት ኤቅድ ባንታ ቃላ ꬎቁ ኦꬅድ፥ ጎዳ እስራኤለ ፆሳ ጋላትዶሶና።
20 ኤንቲ ዎንታ ጉራ ደንድድ ተቁሄ መላ ቢታ ብዶሶና። ኤንቲ ከይዳ ዎደ እዮሳፈፅ ደንድ፥ “ይሁዳንነ የሩሳላመን ደእያ አሳዉ ታኒ ገይሳ ስእተ። ጎዳን፥ ህንተ ፆሳን አማነትተ፤ ህንተ ምናና፤ ናበታ አማንተ ኡባይ ህንተዉ እንጀታና” ያግስ።
21 እዮሳፈፅ አሳራ ዞረትዳፐ ጉየ፥
“ጎዳ ጋላትተ፥
እያ ሲቆይ መርናሳ” ያግድ የፅሸነ እያ ጌሻ ቦንቹዋ ሳቢሸ ኦላንቾታ ስንꬃራ ብያ አሳታ ሹምስ።
22 ኤንቲ ማዝሙረ የꬅነ ጋላታ ዶምዳ ዎደ ይሁዳ ኦላናዉ ይዳ አሞነታ ቦላ፥ ሞአበታ ቦላነ ሳይረታ ቦላ ጎዳይ ዳጋማ የድስ።
23 አሞነትነ ሞአበት ሳይረታ ቦላ ደንድድ፥ ኤንታ ኩመꬅ ꬋይስዶሶና። ኤንቲ ሳይረታ ꬋይስዳፐ ጉየ ባንታ ግዶን እሶይ እሱዋ ꬋይስዶሶና።
24 ይሁዳ አሳይ መላ ቢታን ደእያ ኦላንቾታ በአናዉ ይዳ ዎደ ባንታ ሞርከት ደእያ በሳ በእዶሶና። ኤንታ አሀይ ቢታን ዝንእዳይሳ ደምዶሶና፤ ኤንታፈ እስ አስካ ከስ ኤክቤና።
25 ሄሳፈ ጉየ፥ እዮሳፈፅነ እያ አሳይ ድኦ ኤካናዉ ብድ ሽንቀ፥ ኦላ ሚሸ፥ ማኦታነ ሀራ አልኦ ሚሸታ ደምዶሶና። ሽን ድኦ ኡባ ኤፋናዉ ዳንዳእቦኮና፤ ድእዳባይ ዳሮ ግድዳ ግሾ ሺሻናዉ ሄꬑ ጋላስ ኤክስ።
26 ኤንቲ ኦይዳንꬆ ጋላሳን ባራካ ዛንጋራን ሺቅድ ጎዳ ጋላትዶሶና። ሄሳ ግሾ ሄ በሳ “አንጆ ዛንጋራ” ያግድ ሱንꬅዶሶና።
27 ሄሳፈ ጉየ፥ ይሁዳ አሳይነ የሩሳላመ አሳ ኡባይ እዮሳፈፅ ካለꬅን፥ ኡፋይሳን የሩሳላመ ስምዶሶና።
28 ኤንቲ የሩሳላመ ጋክድ ዲꬃራ፥ ማስንቆራነ ዛየራ ፆሳ ኬꬅ ገልዶሶና።
29 እስራኤለ ሞርከታ ጎዳይ ኦልዳይሳ ቢታን ደእያ ካዎተꬃት ኡባይ ስእዳ ዎደ ያይዶሶና።
30 ያትድ ፆሳይ እዮሳፈፃስ ኡባ ባጋራ ሸምፖ እምዳ ግሾ እያ ካዎተꬃይ ሳሮተꬅ ደምስ።
እዮሳፈፃ ዉርሰꬃ
(1 ካዎ 22:41-50)
31 እዮሳፈፅ ይሁዳን ካዎትያ ዎደ እያ ላይꬅ ሀስታማነ እቻሻ፤ እ የሩሳላመን ላታማነ እቻሹ ላይꬅ ካዎትስ። እያ አይያ ሽልሀ ናእዉ አዙቦ።
32 እዮሳፈፅ ባ አዋ አሳ ኦግያን ሄመትስ፤ እ ሄ ኦግያፐ ሀድርስ ኡሻች ግቤና፤ ጎዳ ስንꬃን ሱረባ ኦꬅስ።
33 ግዶሽን፥ ꬎቃ ጎይኖ በሳታ ꬋይስቤና፤ አሳይ ቡሮ ባ ኩመꬃ ዎዛናን ባንታ አዋታ ፆሳኮ ስምቤና።
34 እዮሳፈፅ ኦꬅዳባይ ኮይሮፐ ዉርሰꬅ ጋካናዉ እስራኤለ ካዎታ ታርከ ማፃፋን፥ ሀናና ናኣ እዩ ታርከ ማፃፋን ፃፈትስ።
35 እስ ዎደ ይሁዳ ካዎይ እዮሳፈፅ ኢታባ ኦꬅዳ እስራኤለ ካዋ አካዝያሳራ እስፈተꬅ ኦꬅስ።
36 ናምአይ ዛልኤ ማርካበ መꬋናዉ ዞረትዶሶና፤ ኤፅዮን-ጋብራን ማርካበታ መꬍዶሶና።
37 ግዶሽን ማሬሳ አደይ ዶዳ ናአይ አላዛር፥ “ኔኒ አካዝያሳራ እስፈተꬅ መꬍዳ ግሾ ነ ኦꬅዳባ ጎዳይ ꬋይሳና” ያግድ እዮሳፈፃ ቦላ ትንብተ ኦድስ። ሄሳ ግሾ፥ ማርካበት መቅዶሶና፤ ኤንቲ ዛልኤ ኦሱዋ ኦꬃናዉ ዳንዳእቦኮና።