22
ይሁዳ ካዋ አካዝያሳ
(1 ካዎ 8:25-29፤ 9:21-28)
1 አራበታራ ይዳ ፓንጋት፥ እዮራማ ባይራ ናይታ ኡባ ዎꬍዳ ግሾ የሩሳላመ አሳይ እዮራማ ናኣ፥ ኡባፈ ካሉዋ፥ አካዝያሳ እያ በሳን ካዎꬅዶሶና። ሄሳ ግሾ፥ እዮራማ ናአይ አካዝያስ ኤንታ ቦላ ካዎ ግድስ።
2 አካዝያስ ካዎትያ ዎደ እያዉ ላይꬅ ላታማነ ናምአ። እ የሩሳላመን እስ ላይꬅ ካዎትስ፤ እያ አይያ ጎቶላ፥ ዛንብራ ናኣ ናአ።
3 አካዝያስ ኢታተꬃን ባናዳ እያ አይያ ዞርዳ ግሾ እ አካባ ሶ አሳ ኦግያን ሄመትስ።
4 እያ አዋይ ሀይቅዳፐ ጉየ አካባ ሶ አሳይ እያ ዞርያ ግሾ ꬋያና ጋካናዉ አካባ ሶ አሳዳ እካ ጎዳ ስንꬃን ኢታባ ኦꬅስ።
5 አካዝያስ አካባ ሶ አሳ ዞርያ ካልድ፥ አካባ ናኣ፥ እስራኤለ ካዋ እዮራማራ እስፈ ሶረ ካዋ አዛሄላ ኦላናዉ ጋላዳን ደእያ ራሞታ ብስ። ያን ሶረ አሳት እዮራማ ጫድዶሶና።
6 እዮራም፥ ሶረ ካዋ አዛሄላራ ኦለትዳ ኦላን ጫደትዳ ግሾ ፓፃናዉ እዝራኤለ ብስ። እዮራማ ናአይ፥ ይሁዳ ካዎይ፥ አካዝያስ፥ ጫደትዳ አካባ ናኣ እዮራማ፥ ኦይቻናዉ እዝራኤለ ብስ።
7 አካዝያስ እዮራማ ኦይቻናዉ ብዳ ቡሳ፥ ፆሳይ አካዝያሳስ ሀይቆ ጋሶ ኦꬅስ። አካዝያስ እዮራማ ሶ ጋክዳ ዎደ አካባ ኮቻ ꬋይሳና መላ ጎዳይ ዶርዳ፥ ናምሳ ናኣ እዩ፥ ሞካናዉ ናምአይ ከይዶሶና።
8 እዩይ አካባ ኮቻ ቦላ ፕርዳ ፖልያ ዎደ ይሁዳ ሀላቃታነ አካዝያሳ ማድያ እያ ዳቦታ ናይታ ደምድ ዎꬍስ።
9 እዩይ አካዝያሳ ኮይሽን ሳማረን ቆሰትድ ደእያ በሳፈ እዩ አሳት ደምድ እያኮ ኤህድ ዎꬍዶሶና። “ባ ኩመꬃ ዎዛናን ጎዳ ኮይዳ እዮሳፈፃ ናአ” ያግድ ሞግዶሶና።
ሄሳ ግሾ፥ አካዝያሳ ሶ አሳፐ ካዎታናዉ ዳንዳእያ አስ ኦንካ አትቤና።
ጎቶሎነ እዮኣሳ
(2 ካዎ 11:1-3)
10 አካዝያሳ አይያ ጎቶላ ባ ናአይ ሀይቅዳይሳ ስእዳ ዎደ ደንዳዳ ይሁዳ ካዋ ኮቸ ኡባ ꬋይሳሱ።
11 ሽን ካዋ እዮራማ ናእያ ዮሳቤታ ሀይቃናዉ ደእያ ካዎ ናይታ ግዶፈ አካዝያሳ ናኣ እዮኣሳ ካይሳዳ ኤካሱ። እያነ እያ ድችያሮ ቆልአን ቆሳሱ። ሄሳዳ ኦꬃዳ ጎቶላ ዎꬎናዳ ካዋ እዮራማ ናእያ አካዝያሳ ምችያ ካህንያ ዮዳሄ ማችያ ዮሳቤታ እያ ቆሳሱ።
12 ጎቶላ ሃርያ ዎደ ኡባን ናአይ ኤንታ ማታን ፆሳ ኬꬃን ኡሱፑን ላይꬅ ቆሰትድ ደእስ።