23
1 ላፑንꬃ ላይꬃን ዮዳሄይ ምንድ ማቶ ሀላቃታ ይሮሃማ ናኣ አዛርያሳ፥ ይሆና ናኣ ይስማኤላ፥ ኦቤዳ ናኣ አዛርያሳ፥ አዳያ ናኣ ማእሰያነ ዝክራ ናኣ ኤልሳፋፃ ሺሽድ ኤንታራ ጫቅስ።
2 ኤንቲ ይሁዳ ኡባ ብድ ያን ደእያ ሌወታነ እስራኤለ ያራታ ሀላቃታ ኡባ ኤክድ የሩሳላመ ይዶሶና።
3 ሄ ሺቅዳ አሳ ኡባይ ፆሳ ኬꬃን ካዉዋራ ጫቅዶሶና። ዮዳሄይ፥ “ካዋ ናኣ ሀይሳ በእተ! ጎዳይ ካሰ ዳዊታ ኮቻስ ቃላ ገልዳይሳዳ እ ካዎቶ።
4 ህንተ ኦꬃናዉ በሲያባይ ሀይሳ፤ ሳምባታ ጋላስ ፆሳ ኬꬅ ገልያ ካህነታፐነ ሌወታፐ ስኮይ ፐንግያ ናግተ።
5 ቃስ ስኮይ ካዎ ጋꬎ ናግተ፤ ስኮይ ቃስ ባሶ ፐንግያ ናግተ። አሳ ኡባይ ፆሳ ኬꬃ ዳባባን ሺቆ።
6 ኦꬅያ ካህነታፐነ ሌወታፐ አትሽን፥ ኦንካ ፆሳ ኬꬅ ገሎፖ። ኤንቲ ጌሽ ግድያ ግሾ ገሎና፤ ሽን ሀራ አሳ ኡባይ ጎዳ ኪታ ናግሸ ፆሳ ኬꬃፈ ካረራ ደኦ።
7 “ሌወት ኦላ ሚሸ ባንታ ኩሸን ኩሸን ኦይክድ ካዋ ግዶይድ እ ከይያ ዎደነ ገልያ ዎደ እያራ ግዶ። ፆሳ ኬꬅ ገልያ ኦንካ ሀይቆ” ያግስ።
8 ሌወትነ ይሁዳ አሳ ኡባይ ካህነይ ዮዳሄይ ኪትዳ ኡባ ኦꬅዶሶና። ካህነይ ዮዳሄይ ኦሶፐ ከያናዉ በሲያ ሌወታ ከስድ የድቦና ግሾ፥ እሶይ እሶይ ሳምባታ ጋላስ ኦሶ ገለይሳታነ ኦሶፐ ከይያ ባ አሳ ኤክስ።
9 ካህነይ ዮዳሄይ ፆሳ ኬꬃን ደእያ፥ ካዋ ዳዊታ ቶራ፥ ግታነ ጉꬃ ጎንዳለታ ቶራ ሞጮናታስ እሚስ።
10 ካህነይ ዮዳሄይ አሳ ኡባይ ኦላ ሚሸ ባ ኩሸን ኩሸን ኦይክድ ፆሳ ኬꬃ ዱገሀፐ ፑደሀ ጋካናዉ ያርሾ በሳ ማታንነ ፆሳ ኬꬃ ማታን ካዋ ዩሾን ኤቃናዳ ኦꬅስ።
11 ዮዳሄ ካዋ ናኣ እዮኣሳ ካረ ከስድ፥ እያ ሁጰን ካላቻ ዎꬅስ፤ ካዎታ ህገ ማፃፋ እያዉ እምድ ካዎይስ። ዮዳሄይነ እያ ናይት እዮኣሳ ትይድ፥ “ካዎይ ብራታ ቱሱ ግዶ” ያግዶሶና።
12 አሳይ የፅሸነ ካዋ ሳቢሸ ኡፋይተይሳ ጎቶላ ስእዳ ዎደ አሳኮ ፆሳ ኬꬅ ባሱ።
13 ካዎይ ፐንገን ቱሳ ማታን ኤቅዳይሳ በአሱ። ሀላቃትነ ዛየ ፑነይሳት ካዋ ማታን ደኦሶና፤ ይሁዳ አሳ ኡባይ ኡፋይትሸ ዛየ ፑኖሶና፤ ማዝሙረ የፀይሳት ስን አꬍድ ባንታ የꬃ ሚሸን ጋላቶሶና። ጎቶላ ባ ማኡዋ ፔꬋዳ፥ “ሀይስ ጌላተꬅ! ሀይስ ጌላተꬅ!” ያጋዳ ዋሳሱ።
14 ካህነይ ዮዳሄይ ቶራ ሞጮናታኮ፥ “ጎቶላ ፆሳ ኬꬃን ዎꬎፕተ፤ እዮ ሳልፕያ ግዶራ አꬅድ ካረ ከስተ፤ እዮ አሻናዉ ኮይያ አስ ደእኮ ዎꬍተ!” ያግስ።
15 ሄሳ ግሾ፥ ኤንቲ እዮ ኦይክድ ካዎ ጋꬎ ኤፍድ ፓራ ፐንገን እዮ ዎꬍዶሶና።
16 ካህነይ ዮዳሄይ ባ ሁጰን፥ አሳ ኡባይነ ካዎይ፥ ጎዳ አስ ግዳናዉ ጫቅዶሶና።
17 ሄ ዎደ አሳ ኡባይ ባኣለ ኤቃ ኬꬅ ብድ፥ ኬꬃ ላልድ፤ ያርሾ በሳታነ ምስለታ ትንቸረꬅዶሶና። ማታና ጌተትያ ባኣላ ካህንያ ያርሾ በሳታ ስንꬃን ዎꬍዶሶና።
18 ዮዳሄይ ካህነታነ ሌወታ ፆሳ ኬꬃ ኦሱዋስ ሀላቃ ኦꬅድ ሹምስ። ኤንታ ኦሶይ ሙሰ ህግያን ፃፈትዳይሳዳነ ካዎይ ዳዊቲ ኦድዳይሳዳ ያርሾ ያርሻናይሳ። ቃስ ካዎይ ዳዊቲ ኦድዳይሳዳ ማዝሙረ የፅሸ ቦንቻናይሳ።
19 ህግያን ፃፈትዳይሳዳ ቱና አስ ገሎና መላ ዮዳሄይ ፆሳ ኬꬃ ፐንገን ናገይሳታ ዎꬅስ።
20 ዮዳሄይ ቶራ ሞጮናታ፥ ግታ አሳታ፥ ደርያ ሃረይሳታነ ሄ ቢታ አሳ ኡባ ኤክድ ካዋ ፆሳ ኬꬃፈ ዱገ ኤህስ። ቆሞ ባጋ ፐንገራ ካዎ ጋꬎ ገልድ ካዋ አራታ ቦላ ኡትስዶሶና።
21 ይሁዳ አሳ ኡባይ ኡፋይትስ። ጎቶላ ማሻን ሀይቅዳፐ ጉየ ካታማይ ዎፑ ግስ።