24
ይሁዳ ካዋ እዮኣሳ
(1 ካዎ 12:1-16)
1 እዮኣስ ካዎትያ ዎደ እያዉ ላይꬅ ላፑና፤ እ የሩሳላመን ኦይታሙ ላይꬅ ካዎትስ። እያ አየ ሱንꬃይ ሳቦ፤ እያ በርሳበ ማጫስ።
2 ካህነይ ዮዳሄይ ደእዳ ላይꬃ ኡባን እዮኣስ ጎዳ ስንꬃን ሱረባ ኦꬅስ።
3 ዮዳሄይ ካዋ እዮኣሳስ ናምኡ ማቾ እምን ኤንቲ እያዉ አደ ናይታነ ማጫ ናይታ የልዶሶና።
4 ጉꬃ ዎደፐ ጉየ እዮኣስ ፆሳ ኬꬃ ኦራꬃናዉ ቆፕስ።
5 እዮኣስ ካህነታነ ሌወታ ሺሽድ፥ “ይሁዳ ብድ ህንተ ፆሳ ኬꬃ ላይꬃን ላይꬃን ኦራꬃናዉ እስራኤለ ኡባፈ ሚሸ ሺሽተ፤ ሄሳ ሀእ ኤለስድ ኦꬅተ” ያግስ። ሽን ሌወት ኤለስድ ኦꬅቦኮና።
6 ሄሳ ግሾ፥ ካዎይ ካህነ ሀላቃ ዮዳሄ ፄግድ፥ “ጎዳ አይለይ ሙሰይነ የሩሳላመ አሳይ ፆሳ ዱንካንያ ኦሱዋስ ከሳና መላ ኪትዳ ጊራ የሩሳላመፐነ ይሁዳፐ ሺሻና መላ ሌወታ አይስ ኪታብኪ?” ያግስ።
7 ሄ ዎደ ኢታ ማጫሰ ጎቶላ ናይት ፆሳ ኬꬃ መንꬅዶሶና። ኤንቲ ጎዳ ኬꬃን ደእያ ጌሻ ሚሸ ኡባ ኤክድ ባኣለ ጎይናናዉ ጎኤትዶሶና።
8 ካዎይ ሌወታ ኪትን፥ ኤንቲ ሳፅነ ጊግስድ፥ ፆሳ ኬꬃ ፐንግያፈ ካረ ባጋራ ዎꬆሶና።
9 ፆሳ አይለይ ሙሰይ መላ ቢታን ደእሸ፥ እስራኤለ አሳፐ ሺሻና መላ ኪትዳ ጊራ ጎዳስ ኤሀና መላ ይሁዳንነ የሩሳላመን ሌወት አዋጅዶሶና።
10 ሀላቃትነ አሳ ኡባይ ኡፋይትድ ሳፅነይ ኩማና ጋካናዉ ጊራ የግዶሶና።
11 ሳፅነይ ሌወታ ባጋራ ካዎ ሞርናታኮ ጋክን ሳፅንያ ግዶን ዳሮ ሚሸይ ዳጋየትዳይሳ በእዳ ዎደ ኡባን ካዎ ፃፈይነ ካህነ ሀላቃይ ይድ ሳፅንያፐ ሚሸ ከስድ ሳፅንያ በሳን ዛር ዎꬆሶና። ኤንቲ ኡባ ዎደ ሄሳ ኦꬅድ ዳሮ ሚሸ ዳጋይዶሶና።
12 ሄ ሚሽያ ካዎይነ ዮዳሄይ ፆሳ ኬꬃ ኦሱዋ ኦꬃና መላ ሹመትዳ አሳታስ እሞሶና። ኤንቲ ፆሳ ኬꬃ ኦራꬃናዉ ሹቹ ማሰይሳታ፥ አናፀታ፥ ብራታነ ናሰ ብራታ ኦሳንቾታ ቃፃርዶሶና።
13 ኦሳንቾት ፆሳ ኬꬃ ምን ኦꬅድ ካሰይሳዳ ኦራꬅዶሶና።
14 ፆሳ ኬꬃ ኦራꬆ ኦሶይ ዉርዳ ዎደ ፓላህዳ ዎርቃነ ብራ ካዋኮነ ዮዳሄኮ ኤህዶሶና። ኤንቲ ሄ ዎርቃነ ብራ ፆሳ ኬꬃ ጋꬃ ኦሱዋስ ጎኤትያ ሚሸታ፥ ፁሳ ያርሾስ ሀንያ ሳነታነ ሀራ ዱማ ዱማ ሚሸታ ኦꬅዶሶና።
ዮዳሄይ ደእዳ ላይꬃን ኡባን ፆሳ ኬꬃን ፁሳ ያርሾይ ያርሸቴስ።
15 ዮዳሄይ ዳሮ ጭምድ ሀይቅስ፤ እ ሀይቅያ ዎደ እያዉ ላይꬅ ፄታነ ሀስታማ።
16 ዮዳሄይ እስራኤለን ፆሳስነ ፆሳ ኬꬃስ ሎኦባ ኦꬅዳ ግሾ ዳዊታ ካታማን ካዎታ ዱፎን እያ ሞግዶሶና።
እዮኣሳ ኢታተꬃ
17 ዮዳሄይ ሀይቅዳፐ ጉየ ይሁዳ ሀላቃት ይድ ካዋ ስንꬃን ጉፋንዶሶና፤ ካዎይ ኤንታ ኦይሻ ስእስ።
18 ኤንቲ ጎዳ ባንታ ማይዛታ ፆሳ ኬꬃ አግድ፥ አሼር ምስለታነ ኤቃታ ጎይንዶሶና። ኤንቲ ቆሁዋ ግሾ ይሁዳ ቦላነ የሩሳላመ ቦላ ጎዳ ሀንቆይ ዎꬍስ።
19 ኤንታ ዛራና መላ ጎዳይ ናበታ ኤንታኮ ኪትስ። ናበት ኤንታዉ ማርካትዶሶና፤ ሽን ኤንቲ ስኦና እፅዶሶና።
20 ሄሳፈ ጉየ፥ ካህንያ ዮዳሄ ናኣ ዛካርያሳ ቦላ ፆሳ አያናይ ዎꬍን ዛካርያስ አሳ ስንꬃን ኤቅድ፥ “ፆሳይ፥ ‘ህንተ ጎዳ ኪታ አይስ መንቲ? ሄስ ህንተዉ ኢታ። ህንተ ጎዳ አግዳ ግሾ እካ ህንተና አግስ’ ” ያጌስ።
21 ኤንቲ እያ ቦላ ማቀትዶሶና። ካዎይ ኤንታ ኪትን፥ ፆሳ ኬꬃ ዳባባን፥ እያ ሹቻን ጫድድ ዎꬍዶሶና።
22 ካዎይ እዮኣስ ዛካርያሳ አዋይ ዮዳሄይ እያዉ ኦꬅዳ ኬሀተꬃ ሀሳዮና አግድ እያ ናኣ ዛካርያሳ ዎꬍስስ። ዛካርያስ ሀይቅሸ፥ “ጎዳይ ሀይሳ በኦ፤ እ ሀሎ ከዮ” ያግስ።
23 ላይꬃ ላመን፥ ሶረ ኦላንቾት እዮኣሳ ኦላናዉ ይዶሶና። ይሁዳነ የሩሳላመ ኦልድ ሀላቃታ ኡባ ዎꬍድ፥ ድኡዋ ኤክድ ዳማስቆን ደእያ ባንታ ካዋስ የድዶሶና።
24 ሶረ ኦላንቾት ታይቦን ጉꬃ፤ ሽን ይሁዳ አሳይ ጎዳ ባንታ አዋታ ፆሳ አግዳ ግሾ፥ ጎዳይ ዳሮ ግድዳ ኤንታ ኦላንቾታ ሶረ ኦላንቾታ ኩሸን አꬅድ እሚስ። ኤንቲ ሀይሳዳ ኦꬅድ እዮኣሳ ቦላ ፕርድዶሶና።
25 ሶረ ኦላንቾት እያፐ ሻከትያ ዎደ እዮኣስ ዳሮ ማዱንፅድ ደኤስ። ካህንያ ዮዳሄ ናኣ ሱꬃ ግሾ እያ ሹማት እያ ቦላ ማቀትድ፥ እ ባ ሂፃን ዝንእዳሽን ዎꬍዶሶና። እ ሀይቅን ዳዊታ ካታማን ሞግዶሶና፤ ሽን ካዎታ ዱፎን እያ ሞግቦኮና።
26 እዮኣሳ ቦላ ማቀትዳይሳት አሞነ ማጫሰ ስማት ናኣ ዛባዳነ ሞአበ ማጫሰ ስማርት ናኣ ዮዛባታ።
27 ሄኮ፥ እዮኣሳ አደ ናይታ ታርከይ፥ እያዉ ኦደትዳ ትንብተይነ እ ፆሳ ኬꬃ ኦራꬅዳባይ ካዎታ ታርከ ማፃፋን ፃፈትድ ደኤስ። እዮኣስ ሀይቅን እያ በሳን እያ ናአይ አማስያስ ካዎትስ።