25
ይሁዳ ካዋ አማስያሳ
(2 ካዎ 14:2-6)
1 አማስያስ ካዎትያ ዎደ እያዉ ላይꬅ ላታማነ እቻሻ፤ እ የሩሳላመን ላታማነ ኡዱፉን ላይꬅ ካዎትስ። እያ አየ ሱንꬃይ ዮኣዶ፤ እያ የሩሳላመ ማጫስ።
2 አማስያስ ጎዳ ስንꬃን ሱረባ ኦꬅስ፤ ግዶሽን፥ ኩመꬃ ዎዛናፐ ግደና።
3 አማስያስ ካዎተꬃ ምንꬅዳፐ ጉየ ባ አዋ ዎꬍዳ አሳታ ዎꬍስ።
4 ግዶሽን፥ ኤንታ ናይታ ዎꬍቤና። ኤንታ ናይታ ዎꬎና አግዳ ጋሶይ፥ ጎዳይ፥ ሙሰ ህገ ማፃፋን ኪትዳይሳዳ፥ “ናይት ኦꬅዳ ናጋራ ግሾ አዋታ ዎꬋናዉ በሰና፤ አዋት ኦꬅዳ ናጋራ ግሾ ናይታ ዎꬋናዉ በሰና። አስ ኡባይ ባ ኦꬅዳ ናጋራን ናጋራን ሀይቃናዉ በሴስ” ያግዳ ግሾሳ።
5 አማስያስ ይሁዳ አሳ ሺሽድ ባንታ አዋታ ኬꬃን ኬꬃን ሻላቃታነ ማቶ ሀላቃታ ሹምስ። እ ላታሙ ላይꬅነ እያፐ ቦላ ግድዳ ይሁዳ ኮቻታነ ብንያመ ኮቻታ ኡባ ታይብድ ጎንዳለነ ቶራ ኦይክድ ኦላስ ጊግዳ ሄꬑ ፄቱ ሙኩሉ ዶረትዳ አሳታ ደምስ።
6 እስራኤለፐ እስ ፄቱ ሙኩሉ ምኖ አሳታ ሄꬑ ሙኩሉነ ኦይዱ ፄቱ ክሎ ግራመ ብራን አማስያስ ሻምስ።
7 ሽን እስ ፆሳ አስ እያኮ ይድ፥ “ካዋዉ፥ ጎዳይ እስራኤለራነ ኤፍሬማራ ዶና ግሾ፥ እስራኤለ ኦላንቾት ኔራ ቦፖ።
8 ኤንቲ ታና ምንꬃና ጋዳ ነ ቆፕኮ፥ ፆኖይነ ፆነተꬅ ፆሳባ ግድያ ግሾ ፆሳይ ነና ነ ሞርከታ ስንꬃን ካዉሻና። ግዶሽን፥ ነ ፃላላ ባ፤ ምናዳ ኦለታ” ያግስ።
9 አማስያስ ፆሳ አድያኮ፥ “ታኒ እስራኤለ ኦላንቾታስ ቃንፅዳ ብራይ ኡባይ ዋናኔ?” ያግስ።
ፆሳ አደይ፥ “ጎዳይ ነዉ ሄሳፈ አꬅድ እማናዉ ዳንዳኤስ” ያግስ።
10 ሄሳ ግሾ፥ አማስያስ ኤፍሬማፐ ይዳ ኦላንቾት ባንታ ሶ ሶ ባና መላ ኦꬅስ። ኤንቲ ይሁዳ አሳ ቦላ ዳሮ ሀንቀትሸ ባንታ ሶ ሶ ስምዶሶና።
11 ሄሳፈ ጉየ፥ አማስያስ ባና ምንꬅድ፥ ባ ኦላንቾታ ካለꬅድ፥ ማፅነ ዛንጋራ ብን እያ ኦላንቾት ሳይረፐ ታሙ ሙኩሉ አሳ ዎꬍዶሶና።
12 ሀራ ታሙ ሙኩሉ ኦላንቾታ ፓፃ ድእድ፥ ኤንታ አፎ ዶና ኤፍድ፥ አፉዋን ዱገ ሆልን፥ ጋርሳን ደእያ ሹቻን አሳ ኡባይ መቀረትድ ዉርዶሶና።
13 ሽን ሄ ዎደ አማስያስ ባራ ኦላስ ቦና መላ ጉየ ዛርዳ እስራኤለ ኦላንቾት ሳማረፐ ቤት-ሆሮና ጋካናዉ ደእያ ይሁዳ ካታማታ ኦልዶሶና። ኤንቲ ይሁዳ አሳፐ ሄꬑ ሙኩሉ ዎꬍድ ዳሮ ድኦ ኤክዶሶና።
14 አማስያስ ኤዶመታ ዎꬍድ ስምያ ዎደ ኤንታ ኤቃታ ኤክድ ይስ። ኤንታ ፆሰ ኦꬅ ኤስድ ኤንታ ጎይንስ፤ እፃነ ጩይስስ።
15 ጎዳ ሀንቆይ አማስያሳ ቦላ ኤፅን፥ ጎዳይ አማስያሳኮ ናበ ኪትስ። ሄ ናበይ ብድ፥ “ባንታ አሳ ነ ኩሸፐ አሻናዉ ዳንዳእቦና ፆሳታ አይስ ዞረ ኦይቻዲ?” ያግስ።
16 ናበይ ቡሮ ኦዳ ቦላ ደእሽን ካዎይ፥ “ነና ካዎ ዞርያ አስ ኦꬅዳይ ኦኔ? ስእ ጋ! ነ አይስ ሀይቃናዉ ኮያይ?” ያግስ።
ናበይ ኦዳ ኤስድ፥ “ነ ሀይሳ ኦꬅዳ ግሾነ ታ ዞርያ ስኦና እፅዳ ግሾ ፆሳይ ነና ꬋይሳናዉ ቆፕዳይሳ ሀእ ኤራስ” ያግስ።
17 ሄሳፈ ጉየ፥ ይሁዳ ካዎይ አማስያስ ባና ዞርያ አሳታራ ዞረትድ፥ እስራኤለ ካዋ እዩ ናኣ ናኣ፥ እዮአካዛ ናኣ፥ እዮኣሳኮ አሰ ኪትድ፥ “ሃያ፤ አነ ናምአይ ኦላ ጋሄቶስ” ያግድ ማንድስ።
18 እስራኤለ ካዎይ እዮኣስ ይሁዳ ካዋ አማስያሳኮ ሀይሳዳ ያግስ፤ “ልባኖሰን ደእያ ክንቾተይ ልባኖሰን ደእያ ዝጋኮ ኪታ የድድ፥ ‘ነ ናእዉ ታ ናኣስ እማ’ ያግስ። ሽን ልባኖሰን ደእያ እስ ዶእ ያራ አꬍሸ ክንቾትያ የꬍስ።
19 ‘ታኒ ኤዶመ ፆናስ’ ጋዳ ነ ዎዛናን ኦቶሮን ኩማዳሳ። ሽን ሀእ ነ ሶን ዎፑ ጋዳ ኡታ፤ ነ ቦላነ ይሁዳ ቦላ መቶነ ꬋዮ ኤሀናዉ አይስ ደንꬃይ?” ያግድ ዛርስ።
20 ሽን አማስያስ ስኦና እፅስ። ኤንቲ ኤዶመ ፆሳታ ጎይንዳ ግሾ ፆሳይ ኤንታ፥ ኤንታ ሞርከታ ኩሸን አꬅድ እማናዉ ኮይስ።
21 ሄሳ ግሾ፥ እስራኤለ ካዎይ እዮኣስ ኦላናዉ ከይን እነ ይሁዳ ካዎይ አማስያስ ይሁዳን ደእያ ቤት-ሳሜሳን ኦላ ጋሄትዶሶና።
22 ይሁዳ አሳይ ፆነትዶሶና፤ ይሁዳ አሳ ኡባይ ባቃትድ ባንታ ሶ ሶ ብዶሶና።
23 ካዎይ እዮኣስ አካዝያሳ ናኣ ናኣ፥ እዮኣሳ ናኣ፥ ይሁዳ ካዋ አማስያሳ ቤት-ሳሜሳን ድእድ፥ የሩሳላመ ኤህስ። ኤፍሬማ ድርሳ ፐንግያፈ ብድ ማዛነ ፐንግያ ጋካናዉ ደእያ ኦይዱ ፄቱ ዋꬋ ግድያ የሩሳላመ ድርሳ ግምብያ ላልስ።
24 ፆሳ ኬꬃን ደእያ ዎርቃነ ብራ ኡባ፥ ኦቤድ-ኤዶመይ ናግያ ሚሽያነ ካዎ ጋꬎን ደእያ ሚሽያ ኡባ ኤክስ፤ ቃስ ኦይꬁ ኦꬅድ ኦይክዳ አሳታ ኤክድ ሳማረ ስምስ።
25 እዮአካዛ ናአይ፥ እስራኤለ ካዎይ እዮኣስ ሀይቅዳፐ ጉየ እዮኣሳ ናአይ፥ ይሁዳ ካዎይ አማስያስ ታማነ እቻሹ ላይꬅ ደእስ።
26 አማስያስ ኦꬅዳባ ኡባይ ኮይሮፐ ዉርሰꬅ ጋካናዉ ይሁዳ ካዎታነ እስራኤለ ካዎታ ታርከ ማፃፋን ፃፈትድ ደኤስ ግደኔ?
27 አማስያስ ጎዳ ካሎ አግዳፐ ጉየ ኤንቲ እያ ቦላ የሩሳላመን ማቀትዶሶና። እ ላክሶ ባቃትስ። ሽን ኤንቲ እያ ጌዶ አሰ ኪትን ኤንቲ እያ ያን ዎꬍዶሶና።
28 እያ አሀ ፓራን ጫን ኤህድ፥ ዳዊታ ካታማን እያ ማይዛታራ ሞግዶሶና።