26
ይሁዳ ካዋ ኦዝያና
(2 ካዎ 14:21-22፤ 15:1-7)
1 ሄሳፈ ጉየ፥ ይሁዳ አሳ ኡባይ ታማነ ኡሱፑን ላይꬅ ግድዳ ኦዝያና እያ አዋ አማስያሳ በሳን ካዎꬅዶሶና።
2 እያ አዋይ አማስያስ ሀይቅዳፐ ጉየ እ ኤሎታ ካታማ ዛር ኬፅስ።
3 ኦዝያን ካዎትያ ዎደ እያዉ ላይꬅ ታማነ ኡሱፑና፤ እ የሩሳላመን እሻታማነ ናምኡ ላይꬅ ካዎትስ። እያ አየ ሱንꬃይ ይኮሎ፤ እያ የሩሳላመ ማጫስ።
4 እያ አዋይ አማስያስ ኦꬅዳይሳዳ እካ ጎዳ ስንꬃን ሱረባ ኦꬅስ።
5 ፆሳስ ያሽ ታማርስዳ ዛካርያሳ ዎደ እ ፆሳስ አማነትድ ኦꬅስ። ጎዳ እ ኮይዳ ዎደ ኡባን ፆሳይ እያ አንጅስ።
6 ኦዝያን ፍልስፄመታራ ኦለታናዉ ከይድ ጋተ ካታማነ እያ ሄራ፥ ያብና ካታማነ እያ ሄራነ አሽዶዳ ካታማነ እያ ሄራ ላልስ። ያትድ አሽዶዳ ካታማ ማታንነ ፍልስፄመ ግዶን ካታማታ ኬፅስ።
7 ፆሳይ ኦዝያናስ ፍልስፄመታ፥ ጉርባላን ደእያ አራበታነ ማኡነታ ቦላ ፆኖ እሚስ።
8 አሞነት ኦዝያናስ ጊርዶሶና። ኦዝያን ዳሮ ምንዳ ግሾ እያ ሱንꬃይ ግብፀ ዛዋ ጋካናዉ ከይስ።
9 ኦዝያን ማዛነ ፐንግያ ማታን፥ ዛንጋራ ፐንግያ ማታንነ ድርሳ ማዛንያ ማታን አዱሳ ግምበ ሻኮታ ኤስድ፥ የሩሳላመ ባሱዋ ምንꬅስ።
10 እያዉ ዙማ ፃጶንነ ደንባን ዳሮ መሄይ ደእያ ግሾ ሄ በሳታን አዱሳ ግምበ ሻኮታ ግምብድ ዳሮ ሃꬃ ኦላታ ቦክስ። እ ጎሸ ዶስያ ግሾ ደረ ቦላነ አራዳ ቢታን እያዉ ዳሮ ጎሻንቾትነ ዎይነይ ቶከይሳት ደኦሶና።
11 ኦዝያናስ ኦላስ ጊግዳ ዳሮ ኦላንቾት ደኦሶና። ኦላንቾታ ፃፈይ ይኤልነ ሀላቃይ ማእሰይ ኦላንቾታ ሱንꬃ ማዝጋበን ፃፍዶሶና። ኤንታ ሀላቃይ ሀናና።
12 ባንታ አዋታ ሶ አሳ ቦላ ሀላቃትያ ምኖ አሳት ናምኡ ሙኩሉነ ኡሱፑን ፄታ።
13 ካዋ ሞርከታራ ኦለትድ፥ ባንታ ኩመꬃ ዎልቃን ካዋ ማዳናዉ ከይያ ሄꬑ ፄታነ ላፑን ሙኩሉነ እቻሹ ፄቱ ኦላንቾት ኤንታ ጋርሳን ደኦሶና።
14 ኦዝያን ኦላንቾታ ኡባስ ጎንዳለ፥ ቶራ፥ ብራታ ባርኔፃ፥ ትራን ማእያ ፁሩረ፥ ዶንገነ ያምባርሻ ሹቹ ጊግስስ።
15 ኦዝያን የሩሳላመን ደእያ ሂላንቾት ዎችያ አዱሳ ግምበ ሻኮታነ ካታማ ድርሳ ግምበ ማዛነታ ቦላ ዶንገ ዱክያ ሚሸታነ ግታ ግታ ሹቻታ ፕፅርድ ሆልያ ሚሸታ ኦስስስ። ፆሳይ እያ ማድን እ ዳሮ ምንስ፤ እያ ሱንꬃይ ኡባ በሳን ከይስ።
16 ሽን ኦዝያን ምንዳ ዎደ ኦቶርትስ፤ ኦቶሮይ እያ ኩንደꬃስ ጋꬅስ። ኦዝያን ጎዳ ባ ፆሳ አማነቶና እፅድ እፃነ ጩይስያ በሳን እፃነ ጩይሳናዉ ፆሳ ኬꬅ ገልስ።
17 ካህነይ አዛርያስነ ምኖ ግድዳ ሆስፑን ታሙ ጎዳ ካህነት እያ ካልድ ገልዶሶና።
18 ካህነት እያኮ፥ “ኦዝያና፥ ኔኒ ጎዳስ እፃነ ጩይሳናዉ በሳካ። እፃነ ጩይሳናዉ በሰይ፥ ጌይድ ደእያ አሮና ኮቸ ግድዳ ካህነት ፃላላ። ሀ ጌሻ በሳፈ ከያ! ኔኒ ጎዳ ፆሳ ቦላ ናጋራ ኦꬃዳሳ፤ ኔኒ እያፐ ቦንቾ ደማካ” ያግዶሶና።
19 ግዶሽን፥ እፃነ ጩይሳናዉ ባ ኩሸን እፃነ ጩይስያ ሚሸ ኦይክድ ደእሸ ሀንቀትስ። ኦዝያን ካህነታ ሀንቀትሸ ፆሳ ኬꬃን እፃነ ጩይስያ በሳ ማታን ካህነታ ስንꬃን ኤቅዳሽን፥ እያ ሶምኦን ባሮ ሀርገይ በንትስ።
20 ካህነ ሀላቃይ አዛርያስነ ሀራ ካህነት ኡባይ እያ ፄልያ ዎደ እያ ሶምኦን ባሮ ሀርገይ በንትዳይሳ በእድ፥ ኤለስድ እያ ፆሳ ኬꬃፈ ከስዶሶና። እካ ጎዳይ እያ ሴርዳይሳ ኤርዳ ግሾ ኤለስድ ያፐ ከይድ ብስ።
21 ካዎይ ኦዝያን ሀይቃና ጋካናዉ ሄ ሀርግያራ ደእስ፤ ፆሳ ኬꬅ ገሎና መላ ድገትስ። ሄ ሀርግያ ጋሶን ዱማ ኬꬃን ባርካ ደእስ። ሄ ዎደ እያ ናአይ እዮአታም፥ ካዎ ጋꬎ አዋተꬃን ኦይክድ ቢታ ሃሬስ።
22 ካዎይ ኦዝያን ኦꬅዳ ሀራባ ኡባ ኮይሮፐ ዉርሰꬅ ጋካናዉ አሞፀ ናአይ፥ ናበይ እሳያስ ፃፍስ።
23 ኦዝያን ሀይቅድ ባ ማይዛታ ጋክስ። አሳይ እያ፥ “ባሮ ሀርገን ኦይከትዳይሳ” ያግድ፥ ካዎታ ዱፉዋ ማታን ሞግዶሶና። እ ሀይቅን እያ በሳን እያ ናአይ እዮአታም ካዎትስ።