27
ይሁዳ ካዋ እዮአታማ
(2 ካዎ 15:32-38)
እዮአታም ካዎትያ ዎደ እያዉ ላይꬅ ላታማነ እቻሻ፤ እ የሩሳላመን ታማነ ኡሱፑን ላይꬅ ካዎትስ። እያ አየ ሱንꬃይ ያሩሾ፤ እያ ሳዶቃ ናአ። እያ አዋይ ኦዝያን ኦꬅዳይሳዳ እዮአታም ጎዳ ስንꬃን ሱረባ ኦꬅስ። እያ አዋይ ፆሳ ኬꬅ ገልዳይሳዳ እ ገልበና፤ ግዶሽን፥ አሳይ ናጋራ ኦሶ አግቤና።
እዮአታም ፆሳ ኬꬅ ገልያ ቆሞ ፐንግያ ዛሪድ ኦꬅስ፤ የሩሳላመ ኦፌላ ደርያ ቦላ ዳሮ ኦሶ ኦꬅስ። ደረይ ዳርያ ይሁዳ ቢታን ካታማታ ኬፅስ፤ ዎር ዳርያ ዙማ ቦላ ሚፃነ አዱሳ ግምበ ሻኮታ ግምብስ።
እዮአታም አሞነ ካዉዋራ ኦለትድ ፆንስ። አሞነት ሄ ላይꬅ ሄꬑ ሙኩሉነ ኦይዱ ፄቱ ክሎ ግራመ ብራ፥ ታሙ ሙኩሉ ኩንታለ ግድያ ግስተነ ታሙ ሙኩሉ ኩንታለ ግድያ ባንጋ እያዉ ጊርዶሶና። አሞነት ናምአንꬆ ላይꬅነ ሄꬓንꬆ ላይꬅ ሄሳዳ እያዉ ጊርዶሶና። እዮአታም ጎዳ ባ ፆሳ ስንꬃን ሱረ ሄመትዳ ግሾ ዳሮ ምንስ።
እዮአታማ ዎደ ኦሰትዳ ኦሶት፥ እ ኦለትዳ ኦላይነ እ ኦꬅዳባ ኡባይ እስራኤለ ካዎታነ ይሁዳ ካዎታ ታርከ ማፃፋን ፃፈትስ። እዮአታም ካዎትያ ዎደ እያዉ ላይꬅ ላታማነ እቻሻ፤ እ የሩሳላመን ታማነ ኡሱፑን ላይꬅ ካዎትስ። እዮአታም ሀይቅድ ባ ማይዛታ ጋክስ። ኤንቲ እያ ዳዊታ ካታማን ሞግዶሶና። እያ በሳን እያ ናአይ አካዝ ካዎትስ።