28
ይሁዳ ካዋ አካዛ
(2 ካዎ 16:1-5)
1 አካዝ ካዎትያ ዎደ እያዉ ላይꬅ ላታማ፤ እ የሩሳላመን ታማነ ኡሱፑን ላይꬅ ካዎትስ። አካዝ ባ ማይዛይ ዳዊቲ ሱረባ ኦꬅዳይሳዳ ጎዳ ስንꬃን ሱረባ ኦꬅቤና፤
2 እ ካሰ ደእዳ እስራኤለ ካዎታ ኦግያን ሄመትስ። ጉጅድ፥ ባኣለ ኤቃ ጎይናናዉ ምስለታ መꬍስ።
3 ህኖማ ዛንጋራን እፃነ ጩይስስ፤ ጎዳይ እስራኤለ አሳ ስንꬃፈ ጎድድ ከስዳ አሳ፥ እፀትዳ ኦግያ ካልድ ባ አደ ናይታ ታማን ፁግድ ኤቃስ ያርሽስ።
4 አካዝ ꬎቃ ጎይኖ በሳታን፥ ደረ ሁጰነ ምꬃ ኩያ ጋርሳን ያርሾ ያርሽስነ እፃነ ጩይስስ።
5 ሄሳ ግሾ፥ ጎዳይ እያ ፆሳይ እያ ሶረ ካዋ ኩሸን አꬅድ እሚስ። ኤንቲ እያ ፆንድ፥ እያ አሳፐ ዳሮታ ድእድ፥ ዳማስቆ ኤፍዶሶና። ቃስ፥ ጎዳይ እያ እስራኤለ ካዋ ኩሸን አꬅድ እምን፥ ካዎይ ኢታ ሾች ሾጭስ።
6 ይሁዳ አሳይ ጎዳ፥ ባንታ ማይዛታ ፆሳ አግዳ ግሾ ራማላ ናአይ ፓቁሄይ ይሁዳ ኦላንቾታፐ እስ ፄታነ ላታሙ ሙኩሉ ምኖ አሳታ እስ ጋላስ ዎꬍስ።
7 ኤፍሬማ ኮቸ ግድዳ ምኖ ኦላንቾይ ዝክር፥ ካዋ ናኣ ማእሰያ፥ ካዎ ጋꬎ ሹማ አዝርቃማነ ካዋ ካልድ ደእያ ኤልቃና ዎꬍስ።
8 እስራኤለ አሳይ ባንታ ዳቦታፐ ናምኡ ፄቱ ሙኩሉ ማጫሳ፥ አደ ናይታነ ማጫ ናይታ ድእዶሶና፤ ኤንቲ ዳሮ ድኡዋ ኤክድ ሳማረ ብዶሶና።
9 ጎዳ ናበይ ኦዴዳ ጌተትያ አደይ ሳማረን ደኤስ። ኦዴድ ሳማረ ብያ ኦላንቾታራ ጋሄታናዉ ከይድ፥ “ጎዳይ፥ ህንተ አዋታ ፆሳይ ይሁዳ ሀንቀትዳ ግሾ ህንተ ኩሸን አꬅድ እሚስ። ሽን ህንተ ኤንታ ሳሎ ጋክዳ ሀንቆን ዎꬍደታ።
10 ሄስ ግዶና እፅን ይሁዳነ የሩሳላመ ማጫነ አድያ ህንተ አይለ ኦꬃናዉ ቆፔታ። ያትን፥ ህንተ ኤንታዳ ሀንድ ጎዳ፥ ህንተ ፆሳ ቦላ ናጋራ ኦꬅደታ ግደከቲ?
11 ሀእ ታ ህንተዉ ኦደይሳ ስእተ። ጎዳ ሀንቆይ ህንተ ቦላ ዎꬍዳ ግሾ ህንተ ድእድ፥ ቃችዳ ህንተ ዳቦታ የድተ” ያግስ።
12 ሄሳፈ ጉየ፥ ኤፍሬማ ኮቻ ሀላቃታፐ ዮሃናና ናአይ አዛርያስ፥ ማሽልሞታ ናአይ ባራክ፥ ሳሎማ ናአይ ይዝቃነ ሀድላያ ናአይ አማስ ኦላፐ ስምዳይሳታ ቦላ ደንድዶሶና።
13 ኤንቲ “ሄ ድኤትዳ አሳታ ኑኮ ኤሆፕተ! ካሰ ኑኒ ጎዳ ቦላ ኦꬅዳ ናጋራነ ናቁዋ ቦላ ሀራ ጉጄታ። ኮይሮካ ኑ ናጋራይ ዳሮ ግድያ ግሾ እስራኤለ ቦላ ጎዳ ሀንቆይ ዎꬍስ” ያግዶሶና።
14 ሄሳ ግሾ፥ ኦላንቾት ድኤትዳ አሳታነ ሚሽያ ሀላቃታ ስንꬃንነ ደሪያ ስንꬃን እምዶሶና።
15 ሱንꬃይ ሀይሳፈ ቆሞን ፃፈትዳ አሳት ደንድ ኤቅድ፥ ድኤትዳ አሳ ኤክዶሶና። ኤንታ ግዶን ካሎ ደኤይሳታስ ድኡዋፐ ማኦነ ጫማ እምዶሶና። ኤንታ ሙዝዶሶናነ ኡሽዶሶና፤ ኤንታ ማዱንꬃ ቦላ ዛይተ ትይዶሶና። ዳቡርዳይሳታ ሀረ ቶግስድ ኤንታ እሻታኮ ዛምብ ደእያ እያርኮ ካታማ ኤፍዶሶና። ሄሳፈ ጉየ፥ ኤንቲ ሳማረ ስምዶሶና።
16 ሄ ዎደ ካዎይ አካዝ አሶረ ካዎይ ባና ማዳና መላ ኪታ የድስ።
17 ኤዶመ አሳት ናምአንꬆ ይሁዳ ቦላ ደንድድ፥ ዳሮ አሳ ድእድ ኤፍዶሶና።
18 ፍልስፄመት ዙማ ፃጶንነ ይሁዳ ጋꬋን፥ ነገበ መላ ቢታን ደእያ ካታማታ ኦልድ ቤት-ሳሜሳ፥ ኤሎና፥ ጋደሮታ፥ ሶኮ፥ ትምና፥ ግምዞነ ኤንታ ሄራን ደእያ ጉታታ ኦይክድ ያን ደእዶሶና።
19 ይሁዳ ካዎይ አካዝ ይሁዳ አሳ ናጋራ ኦስስዳ ግሾነ ጎዳስ አማነትቦና ግሾ ጎዳይ ይሁዳ ካዉሽስ።
20 አሶረ ካዎይ ተልገልተልፈልሶር አካዛኮ ይድ እያ መቶ በስስፐ አትሽን፥ ማድቤና።
21 አካዝ ፆሳ ኬꬃፈ፥ ካዎ ጋꬎፐነ ሀላቃታፐ ዳሮባ ኤክድ፥ አሶረ ካዋስ እሚስ። ሽን ሄስ እያ አይኮካ ማድቤና።
22 ካዎይ አካዝ ኡንኤትዳ ዎደ ጎዳስ አማነቶና እፅድ መቶ ቦላ መቶ ጉጅስ።
23 ባና ፆንዳ ዳማስቆ ፆሳታስ ያርሽሸ፥ “ሶረ ካዎታ ፆሳት ኤንታ ማድዳ ግሾ ታናካ ኤንቲ ማዳና መላ ታኒ ኤንታዉ ያርሻና” ያግስ። ሽን ሄ ፆሳት እያዉነ እስራኤለ አሳ ኡባስ ꬋዮ ኤህዶሶና።
24 አካዝ ፆሳ ኬꬃ ሚሸታ ኡባ ሺሽድ ትንቸረꬅስ። ፆሳ ኬꬃ ፐንገታ ጎርድስ። የሩሳላመን ዱማ ዱማ በሳን ባዉ ያርሾ በሲ ኬፅስ።
25 አካዝ ሀራ ፆሳታስ እፃነ ጩይሳናዉ ይሁዳን ደእያ ካታማታ ኡባን ꬎቃ ጎይኖ በሳታ መꬍስ። ያትድ ጎዳ፥ ባ አዋታ ፆሳ ሀንቀꬅስ።
26 ሄኮ፥ አካዛ ዎደን ኦሰትዳ ሀራ ኦሶት ኮይሮፐ ዉርሰꬅ ጋካናዉ ይሁዳ ካዎታነ እስራኤለ ካዎታ ታርከ ማፃፋን ፃፈትስ።
27 አካዝ ሀይቅድ፥ ባ ማይዛታ ጋክስ። የሩሳላመ ካታማን እያ ሞግዶሶና፤ ሽን እያ እስራኤለ ካዎታ ዱፉዋን ሞግቦኮና። እያ በሳን እያ ናአይ ህዝቅያስ ካዎትስ።