13
ናምኡ ዶአታ
1 ሄሳፈ ጉየ፥ እስ ዶአይ አባፈ ከይሽን በአስ። እያዉ ታሙ ካጨይነ ላፑን ሁጰይ ደኤስ። ሄ ታሙ ካጨታ ቦላ ታሙ ካላቻት ደኦሶና። ሄ ሁጰታ ቦላ ፆሳ ጫሻ ሱንꬃት ፃፈትድ ኡትስ።
2 ታ በእዳ ዶአይ ማሄ ዳኔስ፤ እያ ቶሆይ ባባንꬃ ቶሆ መላ፤ እያ ዶናይካ ጋሞ ዶና ዳኔስ። ዳወይ ባ ዎልቃ፥ ባ አራታነ ባ ግታ ማታ ሄ ዶኣስ እሚስ።
3 ሄ ዶኣ ሁጵያፐ እሱዋ ቦላ ሀይቆስ ጋꬅያ ማዱንꬅ በአስ፥ ሽን ሄ ማዱንꬃይ ፓፅስ። አላምያ አሳ ኡባይ ማላለትድ ሄ ዶኣ ካልስ።
4 ዳወይ ባ ማታ ዶኣስ እምዳ ግሾ አሳ ኡባይ ዳውያ ጎይንዶሶና። ቃስ አሳይ፥ “ዶኣ መል ኦኔ? እያራ ኦለታናዉ ዳንዳኤይ ኦኔ?” ያግድ ዶኣስ ጎይንዶሶና።
5 ሄ ዶኣስ ኦቶርታና መላነ ጫያና መላ ዶን እመትስ፤ ኦይታማነ ናምኡ አጌና ሃራና መላ ማት እያዉ እመትስ።
6 ሄ ዶአይ ፆሳ፥ እያ ሱንꬃ፥ እ ደእያ በሳነ ሳሎን ደእያ ኡባ ባደꬅ ኦይክስ።
7 ሄ ዶአይ ጌሻታራ ኦለትድ፥ ኤንታና ፆናና መላ ዎልቅ እያዉ እመትስ። ያራ ኡባ፥ ደረ ኡባ፥ ዱማ ዱማ ዶና ኡባ ቦላነ ኮቸ ኡባ ቦላ ማት እያዉ እመትስ።
8 አላመይ መቶሳፐ ዶምድ፥ ሹከትዳ ዶርሳ ደኦ ማፃፋን ኤንታ ሱንꬃይ ፃፈቶና ሀ ሳአን ደእያ አሳ ኡባይ ሄ ዶኣስ ጎይናና።
9 ስእያ ሀይꬅ ደእያ አስ ስኦ።
10 ኦንካ ድኤታናዉ ደኤይ ድኤቴስ። ማሻን ሀይቃናዉ ደኤይ ማሻን ሹከታና። ሄሳንካ ጌሻታ ዳንዳአይነ አማኖይ ኤረታና።
11 ቃስካ፥ ሀራ ዶእ ሳአፐ ከይሽን በአስ። እያዉ ዶርሳ ካጨ ዳንያ ናምኡ ካጨይ ደኤስ፤ እያ ኦዳይ ዳወ ኦዳ መላ።
12 ሄ ዶአይ ኮይሮ ዶኣ በሳን፥ እያ ማታን ኦꬄስ። እካ ሀይቆስ ጋꬅያ ማዱንꬃፈ ፓፅዳ ኮይሮ ዶኣስ፤ ቢታን ደእያ አሳ ኡባይ ጎይናና መላ ኦꬄስ።
13 ሄ ናምአንꬆ ዶአይ ሀር አቶሽን፥ ታማ ሳሎፐ አሳ ኡባ ስንꬃን ዎꬍሳና ጋካናዉ ግታ ማላታታ ኦꬅስ።
14 ኮይሮ ዶኣ በሳን ኦꬃና መላ፥ እያዉ እመትዳ ማላታታን ሳአን ደእያ አሳ ኡባ እ ባለꬅስ። ማሻን ማዱንፅድ ፓፅዳ ዶኣ ቦንቾስ ምስለ ጊግሳና መላ ኤንታና ኪትስ።
15 ናምአንꬆ ዶአይ ኮይሮ ዶኣ ምስልያስ ሸምፖ እምድ ኦደታና መላነ እያዉ ጎይኖናይሳት ሀይቃና መላ ኦꬅያ ማት እመትስ።
16 ሄ ናምአንꬆ ዶአይ ግትነ ጉꬅ፥ ማንቆይነ ዱረይ፥ ዎማኖይነ አይለይ ባ ኡሻቻ ኩሸን ዎይኮ ባ ሶምኦን ማላ ዎꬃና መላ ኦꬅስ።
17 ሄ ዶኣ ሱንꬃይ ዎይኮ እያ ሱንꬃ ፓይዱዋ ማላይ ባይና አስ ኦንካ ባይዛናዉነ ሻማናዉ ዳንዳኤና።
18 ጭንጫተꬅ ኮሸይ ሄሳና። ኤራተꬅ ደእያ ኦንካ ሄ ዶኣ ፓይዱዋ ብርሸꬃ ኤሮ፤ ሄ ፓይዶይ አሳ ሱንꬅ። ሄ ፓይዶይ ኡሱፑን ፄታነ ኡሱፑን ታማነ ኡሱፑና።