14
ዶርሳነ 144,000 አሳታ
1 ሄሳፈ ጉየ፥ ዶርሳይ ፅዮነ ዙማ ቦላ ኤቅዳይሳ በአስ። እያራ እያ ሱንꬃይነ እያ አዋ ሱንꬃይ ኤንታ ሶምኦን ፃፈትዳ፥ 144,000 አሳይ ደኤስ።
2 ሳሎፐ ግታ ሃꬃ ጉንꬁነ ዳዳ ጉንꬁ ዳንያ ዎልቃማ ግርስ ስአስ። ቃስ ታ ስእዳ ግርሳይ ዲꬅ ዲፅሽን ስኤትያ ግርሳ መላ።
3 144,000 አሳይ አራታ ስንꬃን፥ ኦይዱ ደኦን ደእያ መተꬃታ ስንꬃንነ ጭማታ ስንꬃን ኤቅድ ኤንታፈ ሀራ ኦንካ ታማራናዉ ዳንዳኦና ኦራꬃ ማዝሙረ የፅዶሶና።
4 ሀይሳቲ ማጫሳራ ባንታና ቱንሶና ናግዳ ጌሻታ። ኤንቲ ዶርሳይ ብያ በሲ ኡባ ካሎሶና። ኤንቲ ፆሳስነ ዶርሳስ ባይራ ግድድ፥ ሺቃናዉ ሳአ አሳ ግዶፈ ዎዘትዶሶና።
5 ኤንቲ ዎርዶይነ ቦረይ ባይና አሳታ።
ሄꬑ ኪታንቾታ
6 ሄሳፈ ጉየ፥ መርና ዎንገላ ሳአ ቦላ ደእያ ካዎተꬃ ኡባስ፥ ኮቸ ኡባስ፥ ያራ ኡባስነ ዱማ ዱማ ዶና ኡባስ ማርካታናዉ ሳሎራ ፕራꬍያ ሀራ ኪታንቾ በአስ።
7 ሄ ኪታንቾይ ባ ቃላ ꬎቁ ኦꬅድ፥ “ፆሳይ አላምያ ፕርድያ ሳተይ ጋክዳ ግሾ ፆሳስ ያይተ፤ እያ ቦንችተ። ሳሎ፥ ሳኣ፥ አባነ ፑልቶ ሃꬃ መꬍዳ ፆሳ ጎይንተ” ያግስ።
8 ኮይሮይሳ ካልድ ሀራ ናምአንꬆ ኪታንቾይ፥ “ደረ ኡባ ቱናነ ማꬆይያ ዎይነ ኡሽዳ፥ ግታ ባብሎነይ ኩንዳሱ! ኩንዳሱ!” ያግድ ዋስስ።
9 ሄꬓንꬆ ኪታንቾይ ኤንታ ካልድ፥ ባ ቃላ ꬎቁ ኦꬅድ፥ “ዶኣነ እያ ምስልያ ጎይንያ ቃስ እያ ማላ ባ ሶምኦን ዎይኮ ባ ኩሸን ዎꬅያ ኦንካ ደእኮ፥
10 እያ ሀንቆ ፁአን ኩምዳ ፆሳ ሀንቆ ዎይንያ ኡያና። ኤንቲ ጌሻ ኪታንቾታ ስንꬃንነ ዶርሳ ስንꬃን ኤፅያ ዲነ ታማን ዋየታና።
11 ኤንታ ዋይያ ጩያይ መር መርናዉ ጩይሸ ዳና። ዶኣነ እያ ምስልያ ጎይነይ ቃስ ሄ ዶኣ ሱንꬃ ማላይ ደእያ ኦንካ ቃማነ ጋላስ ሸምፖይ ባይና ካኤታና” ያግስ።
12 ፆሳ ኪታ ናገይሳትነ የሱሳ አማነተይሳት ገንጭያ ምኖተꬃይ ቆንጭያ ዎደይ ሄሳ።
13 ሄሳፈ ጉየ፥ “ህዛፐ ጎዳን ሀይቀይሳት አንጀትዳይሳታ” ግያ ቃላ ሳሎፐ ስአስ።
አያናይ፥ “ኤ ቱማ፥ ኤንታ ኦሶይ ኤንታ ካልያ ግሾ፥ ኤንቲ ባንታ ዳቡራፐ ሸምፓና” ያጌስ።
ካꬅ ሺሾ ዎደ
14 ሄሳፈ ጉየ፥ ቦꬃ ሻራ ቦላ ኡትዳ አሳ ናአ ዳነይሳ በአስ። እ ባ ሁጰን ዎርቃ ካላቻ ዎꬅስ፤ ቃስ ባ ኩሸን ባጫ ኦይክስ።
15 ሀራ ኪታንቾይ ፆሳ ኬꬃፈ ከይድ፥ ሻራ ቦላ ኡትዳይሳኮ ባ ቃላ ꬎቁ ኦꬅድ፥ “ካꬃ ሺሾ ዎደይ ጋክዳ ግሾ ነ ባጫ የዳዳ ካꬃ ጫካ፤ ሳአን ደእያ ካꬃይ ጋክስ” ያግስ።
16 ያትን ሻራ ቦላ ኡትዳይስ ባ ባጫ ሳአ የድድ፥ ሳአን ደእያ ካꬃ ጫክስ።
17 ቃስካ ሳሎን ደእያ ፆሳ ኬꬃፈ ሀራ ኪታንቾይ ከይስ፤ እያዉካ ኦጮ ባጭ ደኤስ።
18 ታማ ቦላ ማት ደእያ ሀራ ኪታንቾይ ያርሾ በሳፈ ከይስ። እ ባ ቃላ ꬎቁ ኦꬅድ ኦጮ ባጫ ኦይክዳ ኪታንቹዋኮ፥ “ዎይነ አይፈይ ቴርዳ ግሾ ኔኒ ኦጮ ባጫ የዳዳ፥ ሳአን ደእያ ዎይንያፐ ቃንፃ” ያግስ።
19 ሄ ኪታንቾይ ባ ባጫ የድድ፥ ሳአን ደእያ ዎይንያፐ ቃንፅድ፥ ፆሳ ግታ ሀንቁዋ ጉምእያ በሳን የግስ።
20 ኤንቲ ካታማፐ ጋፃን ደእያ ዎይነ አይፈ ጉምእያ በሳን የትዶሶና። ሱꬅ ዎይነ ጉምእያ በሳፈ ከይድ እስ ሙኩሉነ ኡሱፑን ፄቱ ክሎ ምትረ መላ ሃክድ፥ ፓራ ፑሎ ጋክድ፥ ꬎቁ ግድ ኤልስ።