15
ዉርሰꬃ ቦሻታ
1 ታኒ ሳሎን ሀራ ግታነ ማላልስያ ማላታ በአስ። ፆሳ ዉርሰꬃ ሀንቁዋ ቆንጭስያ ላፑን ቦሻታ ኦይክዳ ላፑን ኪታንቾት ደኦሶና።
2 ቃስ ታማራ ዋላከትዳ ቡርጩኮ አባ ዳነይሳ በአስ። ሄ አባ ጋፃን ዶኣ፥ እያ ምስልያነ እያ ሱንꬃ ታይቡዋ ፆንዳይሳታ በአስ። ፆሳይ ኤንታዉ እምዳ ዲꬃ ኦይክድ ኤቅዶሶና።
3 ኤንቲ ፆሳ አይልያ ሙሰ ማዝሙርያነ ዶርሳ ማዝሙርያ ሀይሳዳ ያግድ የፆሶና።
“ጎዳዉ፥ ኡባፈ ዎልቃማ ፆሳዉ፥
ነ ኦሶይ ግታነ ማላልስያባ።
ደረ ኡባ ካዋዉ፥
ነ ኦገይ ፅሎነ ቱማ።
4 ጌሽ ነ ፃላላ ግድያ ግሾ፥
ጎዳዉ፥ ነዉ ያዮናይነ
ነ ሱንꬃ ቦንቾናይ ኦኔ?
ነ ፅሎ ኦሶይ አሳ ኡባስ ቆንጨ ግድያ ግሾ፥
ካዎተꬅ ኡባይ ነ ስን ይድ ጎይናና”
ያግድ የፆሶና።
5 ሄሳፈ ጉየ፥ ሳሎን ዶየትድ ደእያ ፆሳ ኬꬃ፥ እካ ማርካተꬃ ዱንካንያ በአስ።
6 ላፑን ቦሻታ ኦይክዳ ላፑን ኪታንቾት ፆሳ ኬꬃፈ ከይዶሶና። ኤንቲ ጌሽነ ጶልያ ሊኖ ማኦ ማእዶሶና፤ ባንታ ትራን ዎርቃ ዳንጮ ዳንጭዶሶና።
7 ኦይዱ መተꬃታፐ እሶይ፥ መርናዉ ደእያ ፆሳ ሀንቆይ ኩምዳ ላፑን ዎርቃ ፁአታ ላፑን ኪታንቾታስ እሚስ።
8 ፆሳ ቦንቹዋፈነ እያ ዎልቃፈ ደንዶይሳን ፆሳ ኬꬃይ ጩያን ኩምስ። ላፑን ኪታንቾት ኦይክዳ ላፑን ቦሻት ፖለታና ጋካናዉ ፆሳ ኬꬃ ኦንካ ገላናዉ ዳንዳእቤና።