17
ግታ ላይማ ማጫስዉ
1 ላፑን ፁአታ ኦይክዳ ላፑን ኪታንቾታፐ እሶይ ታኮ ይድ፥ “ሃያ፤ ዳሮ ሃꬃታ ቦላ ኡትዳ ግታ ላይማትያ ማጫሰ ቦላ ያናዉ ደእያ ፕርዳ ታ ነና በሳና።
2 አላምያ ካዎት ኢራ ላይማትዶሶና፤ አላመን ደእያ አሳይካ እ ላይማተꬃ ዎይንያ ኡይድ ማꬆትዶሶና” ያግስ።
3 ሄ ኪታንቾይ ታና ጌሻ አያናን መላ ቢታ ኤፍስ። ያን እስ ማጫስያ ጫሻ ሱንꬃይ እ ቦላ ኡባን ፃፈትድ ኡትዳ፥ ዞኦ ዶኣ ቶግዳሮ በአስ፤ ሄ ዶኣስ ላፑን ሁጰይነ ታሙ ካጨይ ደኤስ።
4 ሄ ማጫስያ ካሎሰ ማኦነ ዞኦ ማኦ ማአሱ፤ እያ ዎርቃን፥ ቦንቾ ሹቻንነ እንቆ ጌተትያ አልኦ ሹቻን አሌቀታሱ። እያ ባ ኩሸን ቦርስያባነ ላይማተꬃ ቱናተꬃን ኩምዳ ዎርቃ ፁአ ኦይካሱ።
5 እ ሶምኦን ፁራ ኦሶ ብርሸꬃይ ደእያ ሱንꬃይ፥ “ግታ ባብሎነይ፥ ላይማተꬃስነ ሳአን ደእያ ቱናባ ኡባስ አዮ” ግያ ፁፈይ ፃፈትድ ኡትስ።
6 ቃስ ሄ ማጫስያ ጌሻታ ሱꬃነ የሱሳስ ማርካትሸ ሀይቅዳይሳታ ሱꬃ ኡያዳ ማꬆትዳሮ ታ በአዳ ማላለታስ።
7 ኪታንቾይ ታኮ፥ “ኔኒ አይስ ማላለታይ? ታኒ ነዉ ማጫሰ ፁራ ኦዳነ እያ ቶክዳ ላፑን ሁጰይነ ታሙ ካጨይ ደእያ ዶኣ ፁራ ኦዳ ኦዳና።
8 ኔኒ በእዳ ዶአይ ኮይሮ ደኤስ፥ ሽን ሀእ ባዋ። ሄ ዶአይ ጪሞ ኦላፈ ከይድ ꬋዮስ ባና። ሳእ መቶሳፐ ዶምድ፥ ደኦ ማፃፋን ኤንታ ሱንꬃይ ፃፈትቦና ሳአን ደእያ አሳይ፥ ዶኣ በእድ ማላለታና። ህዛ፥ እ ካሰ ደኤስ፤ ሀእ ባዋ፥ ሽን ስንꬃፈ ያና።
9 “ሀይስ ጭንጫተꬅነ አኬካ ኮዬስ። ላፑን ሁጰት ማጫስያ ኡትያ ላፑን ደረታ፤ ሄሳት ቃስ ላፑን ካዎታ።
10 ኤንታፈ እቻሹ ካዎት ኩንድዶሶና። እሶይ ሀእ ጋካናዉ ሃሬስ፤ ሀንኮ ካዎይ ይቤና። እ ይድ ጉꬃ ዎደ ታካናዉ በሴስ።
11 ስን ደእዳ ዶአይ፥ ሀእ ባይናይስ፥ እ ባ ሁጰን ሆስፑንꬆ ዶኣ። እ ላፑን ዶአታፐ እሱዋ፤ እ ꬋያናዉ ቤስ።
12 “ኔኒ በእዳ ታሙ ካጨት ሃሮ ዶምቦና ታሙ ካዎታ። ሽን ኤንቲ ዶኣራ እስፈ እስ ሳተ ካዎትድ ሃራናዉ ኤንታዉ ማት እመታና።
13 ኤንታ ኡባስ እስ ቆፋይ ደኤስ፤ ኤንቲ ባንታ ዎልቃነ ባንታ ማታ ዶኣስ እማና።
14 ኤንቲ ዶርሳራ ኦለታና፥ ሽን ዶርሳይ ጎዳታ ጎዳነ ካዎታ ካዎ ግድያ ግሾ፥ እ ፄግዳይሳት፥ ዶርዳይሳትነ አማነትዳይሳት ሄ ካዎታ ፆናና” ያግስ።
15 ኪታንቾይ ቃስካ ታኮ፥ “ላይማትያራ ኡትዳ ሄ ኔኒ በእዳ ሃꬃት ያራታ፥ ካዎተꬃታ፥ ዘረꬃታነ ዱማ ዱማ ዶናን ኦደተይሳታ።
16 ቃስ ኔኒ በእዳ ታሙ ካጨይነ ዶአይ ላይማትያሮ እፃና። ኤንቲ እዉ ደእያ ኡባባ ኤካና። ቃስ እዮ ካሎ አሻናነ እ አሹዋ ምድጋና፤ ያትድ ኤንቲ እዮ ታማን ፁጋና።
17 ህዛ፥ ፆሳ ቃላይ ፖለታና ጋካናዉ ኤንታ ቆፋይ እስኖ ግዳና መላ ኤንቲ ባንታ አይስያ ዎልቃ ዶኣስ እማናዳነ ፆሳይ ቆፕዳይሳ ኤንቲ ኦꬃናዳ ኤንታ ዎዛናን ፆሳይ አሞ ዎꬅስ።
18 ሄ ኔኒ በእዳ ማጫስያ ሳአ ካዎታ ሃርያ ግታ ካታምዉ” ያግስ።