18
ባብሎነ ኩንደꬃ
1 ያትድ፥ ግታ ማት ደእያ ሀራ ኪታንቾይ ሳሎፐ ዎꬍሽን ታ በአስ። ሄ ኪታንቹዋ ቦንቾይ ሳአ ፖእስስ።
2 ሄ ኪታንቾይ ባ ቃላ ꬎቁ ኦꬅድ፥
“እያ ኩንዳሱ! ግታ ባብሎነይ ኩንዳሱ!
ባብሎነይ ቱና አያናት አቅያ በሲ ግዳሱ።
ዱማ ዱማ ኢታባታስ ኬ ግዳሱ፤
ቱና ካፎትነ ዶአት ሸምፕያ በሲ ግዳሱ።
3 አሳ ኮቸ ኡባ ባ ላይማተꬃ ዎይንያ ኡሻሱ።
ሳኣ ካዎት ኢራ ላይማትዶሶና።
እ ሚኮተꬃፈ ደንዶይሳን
ቢታን ደእያ ዛልአንቾት ዱረትዶሶና”
ያግስ።
4 ሄሳፈ ጉየ፥ ታ ሳሎፐ ሀይሳዳ ግያ ሀራ ቃላ ስአስ።
“እ ናጋራ ኢራ ኮፆና መላነ፥
እያ ኤካናዉ ደእያ ሴራ ህንተ ኤኮና መላ፥
ታ ደርያዉ ኢፐ ከይተ።
5 ህዛ፥ እ ናጋራይ ሳሎ ጋካናዉ ዶረትስ።
ፆሳይ እ ናቁዋ አኬክስ።
6 እያ እምዳይሳ መላ ዛሪድ እዉ እምተ።
እያ ኦꬅዳ ኦሱዋስ ናምኡ ኩሸ እዉ ዛርተ።
እያ ጊግስዳ ኡሻ ቦላ ህንተ ናምኡ ኩሸ ማꬆይያ ኡሻ እ ፁአን ኩንꬅተ።
7 እያ ባዉ ቦንቸትዳይሳዳነ እዉ እንጀትዳይሳ መላ፥
እዮ መቶꬅተነ ካዮይተ።
እያ ባ ዎዛናን፥
‘ታኒ ካዌዳ ኡታስ፤ ታ አዝን ባይና ማጫስ ግድከ፤
ታኒ ኡባካ ካዮትከ’ ያጋሱ።
8 ሄሳ ግሾ፥ ቦሻ ኡባይ፥
ሀርገይ፥ ካዮይነ ኮሽ እዮ እስ ጋላስ ኦይካና።
ቃስ እያ ታማን ፁገታና፤
አይስ ጊኮ፥ እ ቦላ ፕርድያ ፆሳይ ዎልቃማ”
ያግስ።
9 “ኢራ ላይማትዳይሳትነ እ ሚኮተꬃን ደእዳ፥ አላምያ ካዎት ሄ ካታምያ ፁገትን ከይያ ጩያ በእዳ ዎደ እዉ ዋስድ ዬካና።
10 ኤንቲ ሄ ካታመ ዋይያ በእድ ያይዳ ግሾ፥ ሃክ ኤቅድ፥
“ ‘ሀ ግታ ካታመ! ዎልቃማ ካታመ!
ባብሎነ፥ ነና አየ!
ኔኒ እስ ሳተ ግዶን ነ ፕርዳ ኤካዳሳ’ ያጋና።
11 “ኤንታ ማርካብያ ጫና ህዛፐ ሻምያ አስ ባይና ግሾ፥ ሳአን ደእያ ዛልአንቾት ሄ ካታማስ ዋሳናነ ካዮታና።
12 ኤንታ ዎርቃ፥ ብራ፥ ቦንቾ ሹቹ፥ አልኦ ሹቻ፥ ካሎሰ ማኦ፥ ሊኖ ማኦ፥ ሃረ ማኦ፥ ዞኦ ማኦ፥ ዱማ ዱማ ሳዎ ምꬅ፥ ዳንጋርሳ ዛለ፥ አልኦ ምꬅ፥ ናሰ ብራታ፥ ጎለ ሹቹ፥
13 ቃራፋ፥ ቅማመ፥ እፃነ፥ ካርበ፥ ሽቶ፥ ዎይነ፥ ዛይተ፥ ሎኦ ꬊለ፥ ግስተ፥ መሄ፥ ዶርሰ፥ ፓራ፥ ፓራ ጋረ፥ አይለታነ ሀራ አሳታ ሻምያ ኦንካ ባዋ።
14 “ዛልአንቾት ማጫሴኮ፥ ‘ኔኒ አሞትዳ ሎኦባ ኡባይ ኔፐ ꬋይስ። ነ አቆይነ አሌቀትዳባ ኡባይ ኔፐ ሃክስ። ኔኒ ዛራዳ ኤንታ ኡባ ደማካ’ ያግዶሶና።
15 ሄ ካታማን ዛልእድ ዱረትዳ ዛልአንቾት እ መቱዋ ባብድ ኢፐ ሃክድ ኤቃና። ኤንቲ ዬካናነ ካዮታና።
16 ቃስ፥
“ ‘ሊኖ፥ ካሎሰ ማኦነ ዞኦ ማኦ ማአዳ፥
ዎርቃን፥ ቦንቾ ሹቻንነ እንቆ ጌተትያ አልኦ ሹቻን አሌቀትዳ፥
ሄ ግታ ካታሜስ አየ!
17 ሀይሳ መላ ግታ ሻሎ ኡባይ እስ ሳተ ግዶን ꬋይስ’ ያግዶሶና።
“ማርካብያ ላግያ ኡባይ፥ ማርካብያን ብያ ኡባይ፥ ማርካብያ ቦላ ኦꬅያ ኡባይነ አባን ዛልእያ ኡባይ ሃክ ኤቅዶሶና።
18 ሄ ካታምያ ፁገትን ከይያ ጩያ በእዳ ዎደ፥ ‘ሀ ግታ ካታምዉ ዳንያ ሀራ ካታም ደእሻ?’ ያግዶሶና።
19 ኤንቲ ባንታ ሁጰን ባና ቆልድ፥ ዋስዶሶናነ ካዮትዶሶና።
“ ‘አባ ቦላ ማርካበት ደእያ ኡባይ፥
እ ሻሉዋን ዱረትዳ ኡባይ፥
ሄ ካታምያ እስ ሳተን ꬋይዳ ግሾ፥
አየ! አየ!
20 ሳሉዋዉ፥ እ ꬋዩዋን ኡፋይታ!
ጌሻቶ፥ ሀዋረቶ፥ ናበቶ፥
ፆሳይ ህንተ ግሾ እ ቦላ ፕርድዳ ግሾ ኡፋይትተ’ ያግዶሶና።”
21 ያትን፥ ምኖ ኪታንቾይ ዎፃ ዳንያ ግታ ሹቹ ደንꬅድ አባን ሆልሸ፥ “ግታ ካታምያ ባብሎነይ ዎልቃን ሆለታዳ ሀይሳዳ ኩንዳና፤ እያ ሀችፈ ጉየ ኡባካ በንቱኩ።
22 ዲꬅ ዲፀይሳትነ የፀይሳት፥ ሱሱልኤነ ሞይዘ ፑነይሳት፥ ህዛፐ ጉየ ነ ግዶን ኡባካ ስኤቶኮና። አይ ኮቻ ዛልኤ ዛልእያ አስካ ነ ግዶን በንተና። ዎፃ ግርስ ህዛፐ ጉየ ነ ግዶን ስኤተና።
23 ፆምፐ ፖኦይ ዛሪድ ነ ግዶን ፖኤና። ማቾ ኤከይስነ አዝና ገልያር ቃል ህዛፐ ጉየ ነ ግዶን ስኤተና። ነ ዛልአንቾት ቢታ ኡባን ኤረትዳ ዎልቃማታ። ነ ብታን ካዎተꬃታ ኡባ ጭማዳሳ” ያግስ።
24 ናበታ ሱꬃይ፥ ጌሻታ ሱꬃይነ ቢታ ቦላ ሀይቅዳ አሳ ኡባ ሱꬃይ እ ግዶን በንትዳ ግሾ ባብሎነይ ፕርደታሱ።