19
1 ያትን፥ ሳሎን ዳሮ አሳይ፥
“ፆሳይ ጋላተቶ!
አቶተꬃይ፥ ቦንቾይነ ዎልቃይ ኑ ፆሳስ ግዶ።
2 እያ ፕርዳይ ቱማነ ፅሎ።
ሳኣ ቱንስዳ ኢታ ላይምዉ ፆሳይ ፕርድስ።
ፆሳይ ባ አይለታ ሱꬃ ኢፐ አችስ”
ያግሽን ስአስ።
3 ሄ አሳይ ዛሪድ ባንታ ቃላ ꬎቁ ኦꬅድ፥
“ፆሳ ጋላት ጋኮ።
ሄ ካታምያ መርናዉ ጩያሸ ዳና”
ያግዶሶና።
4 ላታማነ ኦይዱ ጭማትነ ደኦን ደእያ ኦይዱ መተꬃት አራታን ኡትዳ ፆሳስ ጉፋንድ፥
“አምንእ! ፆሳ ጋላት ጋኮ”
ያግድ ጎይንዶሶና።
5 ያትን፥
“ፆሳ አይለት፥
ፆሰ ያይያ ጉꬅነ ግት ኡባይ፥
ኑ ፆሳ ጋላትተ”
ግያ ቃላይ አራታፐ ከይስ።
6 ያትን፥ ዳሮ አሳዳ ዎጫምያ፥ ዎልቃማ ሻፋዳ ጉምያ፥ ዳዳዳ ደችያ ግርሳይ፥
“ፆሳ ጋላት ጋኮ፤
ኑ ጎዳይ፥ ኡባፈ ዎልቃማ ፆሳይ ካዎትስ።
7 ዶርሳ ያጋኖይ ጋክዳ ግሾነ እያ ገልያራ ጊግዳ ግሾ፥
ኑ ኡፋይቶስ፥ ጋላቶስነ ዶርሳ ቦንቾስ።
8 ገሎስ ጊግዳራ ጶልያነ ጌሽ ግድዳ
ሊኖ ማአና መላ እዉ እመትስ”
ያግሽን ታ ስአስ። (ሊኖ ማኦይ ጌሻታ ፅሎ ኦሶ ሌምሶ።)
9 ሄሳፈ ጉየ፥ ኪታንቾይ ታኮ፥ “ዶርሳ ያጋኖ ፄገትዳይሳት አንጀትዳይሳታ” ጋዳ ፃፋ። ሄ ኪታንቾይ ጉጅድ፥ “ሀይስ ፆሳ ቱማ ቃላ” ያግስ።
10 ሄ ዎደ ታ እያ ጎይናናዉ እያ ቶሁዋ ቦላ ኩንዳስ። ሽን እ፥ “ሄሳ ኦꬆፋ! ታኒ የሱሳባ ማርካትያ ነ መላነ ነ እሻታ መላ። ነ ፆሳ ጎይና” ያግስ። ህዛ፥ የሱሳባ ማርካትዳይሳታስ ናበተꬃ አያን ደኤስ።
ቦꬃ ፓራ ቶግዳይሳ
11 ያትን፥ ሳሎይ ዶየትን፥ ያን ቦꬃ ፓር ደኤይሳ በአስ። ሄ ፓራ ቶግዳይስ አማነትዳይሳነ ቱማንቾ ጌተቴስ። እ ፅሎተꬃን ፕርደስነ ኦለቴስ።
12 እያ አይፈይ ታማ ላጮ ዳኔስ፤ እያ ሁጰን ዳሮ ካላች ደኤስ። እያ ቦላ እ አትሽን፥ ሀር ኦንካ ኤሮና ፃፈትዳ ሱንꬅ ደኤስ።
13 እ ሱꬃን ሙከትዳ ማኦ ማእስ፤ እያ ሱንꬃይካ ፆሳ ቃላ።
14 ጶልያነ ጌሽ ግድዳ ሊኖ ማእዳ ሳሎ ኦላንቾት ቦꬃ ፓራታ ቶግድ እያ ጌዶ ካሎሶና።
15 ካዎተꬃታ ቃንፅያ ቃራ ማሻይ እያ ዶናፐ ከዬስ። እ ብራታ ፃምአን አሳ ሃራና። ኡባፈ ዎልቃማ ፆሳ ሀንቆ ዎይነ ኡሻ ጉምእያ በሳ እ የꬋና።
16 እያ ማኡዋ ቦላነ እያ ዎድርያ ቦላ፥ “ካዎታ ካዋነ ጎዳታ ጎዳ” ግያ ሱንꬃይ ፃፈትስ።
17 ሄሳፈ ጉየ፥ እስ ኪታንቾይ አዋ ቦላ ኤቅዳይሳ በአስ። ሄ ኪታንቾይ ሳሎራ ፕራꬍያ ካፎ ኡባስ ባ ቃላ ꬎቁ ኦꬅድ፥ “ሃ ዪተ! ፆሳ ግብራ ማናዉ እስ በሲ ሺቅተ።
18 ይድ ካዎታ አሹዋ፥ ሻላቃታ አሹዋ፥ ዎታዳረታ አሹዋ፥ ፓራታ አሹዋ፥ ፓራታ ቶገይሳታ አሹዋ፥ አሳ ኡባ አሹዋ፥ አይለታ አሹዋ፥ ዎማኖታ አሹዋ፥ ግታታነ ጉꬃታ አሹዋ ሚተ” ያግስ።
19 ዶአይ፥ ፓራ ቶግዳይሳራነ እያ ኦላንቾታራ ኦለታናዉ ሳአ ካዎትነ ኤንታ ኦላንቾት እስ በሲ ሺቅዳሽን በአስ።
20 ሽን ሄ ዶአይነ እያ ሱንꬃን ማላታታ ኦꬅዳ ዎርዶ ናበይ እያራ እስፈ ኦይከትስ። ሄ ማላታታን ዶኣ ማላይ ደኤይሳታነ እያ ምስልያ ጎይነይሳታ እ ባለꬅስ። ዶአይነ ዎርዶ ናበይ ናምአይካ ዲነን ኤፅያ ታማ አባን ፓፃ የገትዶሶና።
21 አትዳይሳት ፓራ ቶግዳይሳ ዶናፐ ከይያ ማሻን ሀይቅዶሶና። ካፎት ኡባይ ኤንታ አሹዋ ምድ ካልዶሶና።