20
ሙኩሉ ላይꬅ
1 ዛው ባይና ኦላ ቁልፕያነ ግታ ሳንꬃላታ ባ ኩሸን ኦይክዳ እስ ኪታንቾይ ሳሎፐ ዎꬍሽን በአስ።
2 እ ዳውያ ኦይክድ ሙኩሉ ላይꬃስ ቃችስ። ሄ ዳወይ ኮይሮ ሾሻ፥ ዳቡሎሳ ዎይኮ ፃላሄ።
3 ኪታንቾይ ዛው ባይና ኦላን እያ የግድ፥ ሙኩሉ ላይꬅ ዉራና ጋካናዉ ካዎተꬃታ ዛር ባለꬆና መላ ቁልፐን ጎርድድ አታምስ። ሄሳፈ ጉየ፥ ዳወይ ጉꬃ ዎደስ ብለታናዉ በሴስ።
4 ሄሳፈ ጉየ፥ አራታታነ አራታታ ቦላ ኡትድ ፕርዳና መላ ማት እመትዳይሳታ በአስ። የሱሳስ ማርካትዳ ግሾነ ፆሳ ቃላ ኦድዳ ግሾ ባንታ ቆꬍያ ጎይረትዳ አሳ ሸምፑዋ በአስ። ኤንቲ ዶኣ ዎይኮ ዶኣ ምስልያ ጎይንቦኮና። ኤንቲ ዶኣ ማላ ባንታ ሶምኦን ዎይኮ ባንታ ኩሸን ዎꬅቦኮና። ኤንቲ ሀይቆፐ ደንድድ ክርስቶሳራ እስፈ ሙኩሉ ላይꬅ ሃርዶሶና።
5 ሀይስ ኮይሮ ደንዱዋ፤ አትዳ ሀንኮ ሀይቅዳይሳት ሙኩሉ ላይꬃይ ዉራና ጋካናዉ ሀይቆፐ ደንድቦኮና።
6 ኮይሮ ደንዱዋስ ቃድ ደኤይሳት አንጀትዳይሳታነ ጌሻታ። ኤንታ ቦላ ናምአንꬆ ሀይቁዋስ ዎልቅ ባዋ። ኤንቲ ፆሳስነ ክርስቶሳስ ካህነ ግዳና፤ እያራ እስፈ ሙኩሉ ላይꬅ ሃራና።
ፃላሄ ፆነተꬅ
7 ሙኩሉ ላይꬃይ ዉርዳፐ ጉየ ፃላሄይ ቃሾፐ ብለታና።
8 እ ሳኣ ጋፃፐ ጋፃ ጋካናዉ ደእያ ካዎተꬃታ፥ ኤንትካ፥ ጎገነ ማጎገ ጌተተይሳታ ባለꬅድ ኦላስ ሺሻናዉ ከያና። ኤንታ ፓይዶይ አባ ጋፃን ደእያ ሻፈ መላ።
9 ኤንቲ ቢታ ኡባን ላለትድ፥ ጌሻታ ሄራነ ፆሳይ ዶስያ ካታማ ተቅዶሶና። ሽን ታም ሳሎፐ ዎꬍድ ኤንታና ምስ።
10 ኤንታ ባለꬅዳ ፃላሄይ፥ ዶአይነ ዎርዶ ናበይ የገትዳ ኤፅያ ዲነ ታማ አባን የገትስ። ኤንቲ ቃማነ ጋላስ መርናዉ ፓፃ ካኤታና።
ዉርሰꬃ ፕርዳ
11 ሄሳፈ ጉየ፥ ግታ ቦꬃ አራታ ቦላ ኡትዳይሳ በአስ። ሳእነ ሳሎይ እያ ስንꬃፈ ባቃትዶሶና፤ ኤንቲ ዛር በንትቦኮና።
12 ሀይቅዳይሳት፥ ግታትነ ጉꬃት አራታ ስንꬃን ኤቅዳይሳታ በአስ፤ ማፃፋት ዶየትዶሶና፤ ቃስ ደኦ ማፃፋ ግድዳ ሀራ ማፃፍ ዶየትስ። ሀይቅዳይሳት ማፃፋን ፃፈትዳ ባንታ ኦሱዋዳ ፕርዳ ኤክዶሶና።
13 አባይ ባ ግዶን ደእያ ሀይቅዳይሳታ እሚስ፤ ሀይቆይነ ስኦለይ ባንታ ግዶን ደእያ ሀይቅዳይሳታ እምዶሶና። እስ እስ አስ ባ ኦሱዋዳ ፕርዳ ኤክስ።
14 ያትን፥ ሀይቆይነ ስኦለይ ታማ አባን የገትዶሶና። ሄ ታማ አባይ ናምአንꬆ ሀይቆ።
15 ደኦ ማፃፋን እያ ሱንꬃይ ፃፈትቦና አስ ኦንካ ታማ አባን የገትስ።