21
ኦራꬃ ሳሎነ ኦራꬃ ሳአ
1 ታኒ ኦራꬃ ሳሎነ ኦራꬃ ሳአ በአስ። ኮይሮ ሳሎይነ ኮይሮ ሳእ ꬋይስ፤ አባይካ ꬋይስ።
2 ጌሻ ካታምያ፥ ኦራꬃ የሩሳላመይ፥ አዝና ገላናዉ አሌቀታዳ ጊጋዳ ደእያ ማጫሳዳ ሳሎፐ ፆሳ ማታፐ ዱገ ዎꬍሽን በአስ።
3 አራታፐ ሀይሳዳ ያግድ፥ ኦድያ ግታ ቃላ ስአስ፤ “ፆሳ ኬꬃይ አሳራ ደኤስ፤ ፆሳይ ባ ቦንቹዋራ አሳራ እስፈ ዳና። ኤንቲ እያ ደረ ግዳና፤ ፆሳይ ባ ሁጰን ኤንታራ ዳና፤ እ ኤንታ ፆሳ ግዳና።
4 ፆሳይ ኤንታ አይፈፐ አፉꬃ ኡባ ቁቻና። ህዛፐ ሀይቆይ ዎይኮ ካዮይ ዎይኮ ዋሶይ ዎይኮ ዋየይ ዴና። ጋልአይ ኡባይ አꬍስ” ያግስ።
5 አራታ ቦላ ኡትዳይስ፥ “ታኒ ኡባ ኦራꬅ ኦꬃና” ያግስ። ቃስ ዛሪድ ታኮ፥ “ታኒ ኦደይስ አማንይሳነ ቱማ ግድያ ግሾ ፃፋ” ያግስ።
6 ቃስ ታኮ፥ “ፖለትስ! ታኒ አልፋነ ኦመጋ፤ ዶመꬅነ ፖሎ። ሳሞትዳ ኦናካ ደኦ ሃꬃ ፑልቶፈ ጋተ ቃንፆና ጮ ኡሻና።
7 ፆንያ ኦንካ ሄሳ ኡባ ላታና፤ ታኒ እያዉ ፆሳ ግዳና፤ እካ ታ ናአ ግዳና።
8 ሽን ያሻንቾታ፥ አማነቶናይሳታ፥ ቱናታ፥ ሸምፖ ዎይሳታ፥ ላይማተይሳታ፥ ብተይሳታ፥ ኤቃ ጎይነይሳታነ ዎርዳንቾታ ቃዳይ ዲነይ ኤፅያ ታማ አባን ግዳና። ሄስ ናምአንꬆ ሀይቆ” ያግስ።
9 ላፑን ዉርሰꬃ ቦሻት ኩምዳ ላፑን ፁአታ ኦይክዳ ላፑን ኪታንቾታፐ እሶይ ታኮ ይድ፥ “ሃያ፥ ታኒ ነና ገሎስ ጊግዳ ዶርሳ ማችዉ በሳና” ያግስ።
10 ኪታንቾይ ታና ዙማ ሁጰ ጌሻ አያናን ከስድ፥ ጌሻ ካታማይ፥ የሩሳላመይ፥ ሳሎፐ ፆሳ ማታፐ ዱገ ዎꬍሽን በስስ።
11 ሄ ካታማይ ፆሳ ቦንቾን ፖኤስ። ሄ ካታማ ፖኦይ ያስጵደ ጌተትያ አልኦ ሹቻ መላ፤ ጌሻ ብርለዳ ጶሌስ።
12 ሄ ካታማ ድርሳይ ዎልቃማነ አዱሰ። እያዉ ታማነ ናምኡ ፐንገትነ ሄ ፐንገታ ናግያ ታማነ ናምኡ ኪታንቾት ደኦሶና። ፐንገታ ቦላ ታማነ ናምኡ እስራኤለ ዘረꬃታ ሱንꬃይ ፃፈትስ።
13 ዶሎሀ ባጋራ ሄꬑ ፐንገት፥ ፑደሀ ባጋራ ሄꬑ ፐንገት፥ ዱገሀ ባጋራ ሄꬑ ፐንገትነ ዉሎሀ ባጋራ ሄꬑ ፐንገት ደኦሶና።
14 ካታማ ግምበ ድርሳይ ታማነ ናምኡ ሹቻ ባሶታ ቦላ ኤቅስ። ኤንታ ቦላ ታማነ ናምኡ ዶርሳ ሀዋረታ ሱንꬃይ ፃፈትስ።
15 ታዉ ኦድያ ኪታንቹዋስ፥ ካታማ፥ እያ ፐንገታነ እያ ድርሳ ዋꬍያ ዎርቃ ፃምአይ ደኤስ።
16 ካታማስ ኦይዱ ማዛነት ደኦሶና፤ ካታማ ጌሳይነ ጎምፓይ እስ ግና። ኪታንቾይ ካታማ ባ ፃምአን ዋꬍን፥ ካታማይ ታማነ ናምኡ ሙኩሉ ክሎ ምትረ ግድስ፤ ካታማ ጌሳይ፥ ጎምፓይነ ꬎቃተꬃይ እስ ግና።
17 ኪታንቾይ ቃስ ድርሳ ዋꬍን፥ ኪታንቾይ ጎኤትያ አሳ ኩሸን እስ ፄታነ ኦይታማነ ኦይዱ ዋꬋ ግድስ።
18 ካታማ ድርሳይ ያስጵደ ጌተትያ ሹቻን ድረትስ። ካታማይ ማስቶተዳ ጶልያ ዋላህ ባይና ዎርቃን ኦሰትስ።
19 ካታማ ድርሳ ባሶይ ኡባ ቆሞ ቦንቸትዳ ሹቻን አሌቀትስ። ኮይሮ ሂፀትዳ ሹቻይ ያስጵደ፥ ናምአንꬆይ ሳንፓረ፥ ሄꬓንꬆይ ከልቀዶነ፥ ኦይዳንꬆይ ባሉረ፥
20 እቻሻንꬆይ ሳርዶንክሳ፥ ኡሱፑንꬆይ ሳርድዮነ፥ ላፑንꬆይ ክርስትሎበ፥ ሆስፑንꬆይ ብርለ፥ ኡዱፉንꬆይ ቶጳዘ፥ ታማንꬆይ ክርስጵራስሰ፥ ታማነ እስንꬆይ ያክንተ፥ ታማነ ናምአንꬆይ አመተስፅኖሳ።
21 ታማነ ናምኡ ፐንገታስ ታማነ ናምኡ አልኦ ሹች ደኤስ። እስ እስ ፐንገይ እስ አልኦ ሹቻን ኦሰትስ። ካታማ ዎጋ ኦገይ ማስቶተዳ ጶልያ ዋላህ ባይና ዎርቃፈ ኦሰትስ።
22 ጎዳይ፥ ኡባፈ ዎልቃማ ፆሳይነ ዶርሳይ ካታማስ ኬ ግድያ ግሾ፥ ታ ሄ ካታማን ፆሳ ኬꬅ በአብከ።
23 ፆሳ ቦንቾይ ሄ ካታማስ ፖእያ ግሾነ ዶርሳይ እያዉ ፆምፐ ግድያ ግሾ ካታማስ አዋ ዎይኮ አጌና ፖኦ ኮሸና።
24 ካዎተꬃት ሄ ካታማ ፖኦን ሄመታና፤ ካዎትካ ባንታ ቦንቹዋ ያ ኤሀና።
25 ቃም ያን ባይና ግሾ ካታማ ፐንገት ኡባ ጋላስ ዶያ ግዳና፤ ኡባራካ ጎርደቶኮና።
26 ካዎተꬃታ ግታተꬃይነ ቦንቾይ ሄ ካታማ ያና።
27 ዶርሳ ደኦ ማፃፋን ሱንꬃይ ፃፈትዳይሳታ ፃላል አትሽን፥ ቱናባ ዎይኮ ዬላያባ ኦይ ዎይኮ ዎርዶተይ ኦንካ ሄ ካታማ ገለና።