22
1 ያትድ፥ ኪታንቾይ ታና ፆሳ ካዎተꬃ አራታፐነ ዶርሳ ካዎተꬃ አራታፐ ጎግያ ማስቶተዳ ጶልያ ደኦ ሃꬃ ሻፋ በስስ።
2 ሄ ሻፋይ ካታማ ኦግያ ግዶራ ዱገ ጎጌስ። ሻፋፐ ሄፍንꬃ ባጋራነ ሀፍንꬃ ባጋራ አጌናን እስ ቶሆ፤ ላይꬃን ታማነ ናምኡ ቶሆ አይፍያ ደኦ ምꬅ ደኤስ። ሄ ምꬃ ቦንጮይ ካዎተꬃታ ኡባ ሀርገፈ ፓꬄስ።
3 ሄ ካታማን አይብ ባደꬅካ ዴና። ፆሳ ካዎተꬃ አራታይነ ዶርሳ ካዎተꬃ አራታይ ሄ ካታማን ዳና። ፆሳ አይለት ፆሳስ ኦꬃና።
4 ኤንቲ እያ ሶምኡዋ በአና፤ እያ ሱንꬃይ ኤንታ ሶምኦን ፃፈታና።
5 ህዛፐ ቃም ዴና፤ ጎዳ ፆሳይ ኤንታዉ ፆምፐ ግድያ ግሾ ኤንታዉ ፆምፐ ዎይኮ አዋ ፖኦ ኮሸና። ኤንቲ መር መርናዉ ካዎታና።
የሱሳ ዩሳ
6 ኪታንቾይ ታኮ፥ “ሀ ታ ኦድያ ቃላይ ቱማነ አማንይሳ። ጎዳይ፥ ናበታ ባ ጌሻ አያናን ኪትያ ፆሳይ፥ ማታን ሀናናባ ባ አይለታ በሳናዉ ባ ኪታንቹዋ ኪትስ” ያግስ።
7 የሱሲ፥ “ሄኮ ታ ኤለሳዳ ያና፤ ሀ ማፃፋን ደእያ ትንብተ ቃላ ናግያ ኦንካ አንጀትዳይሳ” ያግስ።
8 ታኒ፥ ዮሃንስ፥ ሄ ኡባባ ስአስ፤ በአስ። ታኒ ሄሳ ስእዳ ዎደነ በእዳ ዎደ ሄሳ ታና በስዳ ኪታንቹዋ ጎይናናዉ እያ ቶሁዋ ቦላ ኩንዳስ።
9 ሽን ኪታንቾይ ታኮ፥ “ሄሳ ኦꬆፋ! ታኒ ኔዳ፥ ናበታዳ ነ እሻታዳነ ሀ ማፃፋን ደእያ ኡባ ኪተትያ አይለታ መላ፤ ፆሳ ጎይና” ያግስ።
10 ኪታንቾይ ዛሪድ፥ “ሀ ኡባይ ፖለትያ ዎደይ ማታትዳ ግሾ ሀ ማፃፋን ፃፈትዳ ትንብተ ቃላ ማታመን ጎርዶፋ።
11 ኢታ ኦይ ጉጅድ ኢታ ኦꬆ፤ ቱነይ ጉጅድ ቱኖ። ሎኦ ኦይ ጉጅድ ሎኦ ኦꬆ፤ ጌየይ ጉጅድ ጌዮ” ያግስ።
12 የሱሲ፥ “ሄኮ፥ ታኒ ኤለሳዳ ያና። እሱዋስ እሱዋስ እያ ኦሱዋዳ እማናዉ ታ ዎይቶይ ታራ ደኤስ።
13 ታኒ አልፋነ ኦመጋ፤ ኮይሮነ ዉርሰꬅ፤ ዶመꬅነ ፖሎ።
14 “ባንታ ማኡዋ ሜጭድ ጌሸይሳት አንጀትዳይሳታ። ደኦ ምꬄ አይፍያ ማናዉነ ካታማ ፐንግያራ ገላናዉ ኤንታዉ ማት እመትስ።
15 ሽን ካናት፥ ብተይሳት፥ ላይማተይሳት፥ ሸምፖ ዎይሳት፥ ኤቃ ጎይነይሳት፥ ዎርዶ ዶሰይሳትነ ኦይሳት ካረን ደኦሶና።
16 “ታኒ፥ የሱሲ፥ ሀ ማርካተꬃ ህንተዉ፥ ዎሳ ኬꬃታስ ኦዳና መላ ታ ኪታንቹዋ ኪታስ። ታኒ ዳዊታ ሼሽነ ኮቸ። ታኒ ፖእያ ጉራ ባካላ” ያግስ።
17 ጌሻ አያናይነ ገላናዉ ጊግዳ ማጫስያ፥ “ሃያ” ያጎሶና። ቃስ ሀይሳ ስእያ ኦንካ፥ “ሃያ” ያጎ። ሳሞትዳ ኦንካ ሃዮ፤ ደኦ ሃꬃ ኮይያ ኦንካ ጮ ኤኮ።
18 ታኒ ሀ ማፃፋን ፃፈትዳ ትንብተ ቃላ ስእያ ኦናካ ዞራይስ። ኦንካ ሀ ቃላ ቦላ እስባ ጉጅኮ፥ ፆሳይ ሀ ማፃፋን ፃፈትዳ ቦሻ እያ ቦላ ጉጃና።
19 ኦንካ ማፃፋን ደእያ ትንብተ ቃላፐ እስባ ፓጭስኮ፥ ፆሳይ ሀ ማፃፋን ፃፈትዳ ደኦ ምꬃ አይፍያፐነ ጌሻ ካታማፐ እያ ቃዳ ፓጭሳና።
20 ሀ ኡባ ማርካተይስ፥ “ቱማ፥ ታኒ ኤለሳዳ ያና” ያጌስ።
አምንእ፤ ጎዳ የሱሳ፥ ሃያ።
21 ጎዳ የሱስ ክርስቶሳ አꬎ ኬሀተꬃይ ህንተ ኡባራ ግዶ። አምንእ።