14
ዮናታን ፍልስፄመታ ኦልስ
1 እስ ጋላስ ሳኦላ ናአይ ዮናታን ባ ኦላ ሚሽያ ቶክያ ፓንꬃኮ ሀይሳዳ ያግስ፤ “ሃያ፤ ሄፍንꬃን ደእያ ፍልስፄመት ዱንካንዳ ጉታ አነ ቦስ” ያግስ። ሽን ባ አዋስ ሄሳ ኦድቤና።
2 ሄ ዎደ ሳኦል ግብአ ማታን ምግሮናን፥ ኦሮማነ ምꬃ ጋርሳን ደኤስ። እያራ ኡሱፑን ፄቱ አሳት ደኦሶና።
3 ሴሎን ጎዳ ካህነ ግድዳ ኤል ናአይ፥ ካህነይ ፍንሃስ የልዳ እካቦዳ እሻይ፥ አክፁባ ናአይ፥ አክይ ኤፉደ ማእድ፥ ኤንታ ግዶን ደኤስ። ዮናታን ኤንታ ግዶን ባይናይሳ ኦንካ ኤርቤና።
4 ዮናታን ፍልስፄመት ዱንካንዳ ጉታ ፕናናዉ ብያ ኦግያ ቦላ ኡሻቻ ባጋንነ ሀድርሳ ባጋን፥ እሶይ ቦፀፃ፥ ሀንኮይ ሳና ጌተትያ ናምኡ ፖፀትዳ ግታ ዛላት ደኦሶና።
5 ዛላታፐ እሶይ ፑደሀ ባጋን ምክማሳ ስንꬃን ደእያ ዎደ፥ እሶይ ቃስ ዱገሀ ባጋን ግብአ ስንꬃን ደኤስ።
6 ዮናታን ባ ኦላ ሚሽያ ቶክያ ፓንꬃኮ፥ “ሃያ፤ ሀ ቃፃረትቦና አሳይ ዱንካንዳ ጉታ አነ ቦስ። ጎዳይ ኑ ግሾ ኦለቶና አገና፤ ዳሮ አሳን ግድን ጉꬃ አሳን፥ አሻናይስ ጎዳ ፆነና” ያግስ።
7 እያ ኦላ ሚሽያ ቶከይስ፥ “ኔኒ ቆፕዳባ ኡባ ኦꬃ፤ ጉየ ጎፓ፤ ታ ዎዛናይ ኔራ ደኤስ” ያግስ።
8 ዮናታን፥ “ያኮ ሃያ፤ ሄፍንꬅ ፕንድ አሳስ በንቶስ።
9 ኤንቲ፥ ‘ኑኒ ህንተኮ ያና ጋካናዉ ያን ናግተ’ ጊኮ፥ ኑኒ ደእያ በሳን ናጋናፐ አትሽን፥ ኤንታኮ ቦኮ።
10 ሽን ኤንቲ፥ ‘ኑኮ ሃ ዪተ’ ጊኮ፥ ኑኒ ኤንታኮ ከያና። ሄስ ጎዳይ ኤንታ ኑ ኩሸን አꬅድ እምዳይሳስ ማላ ግዳና” ያግስ።
11 ኤንቲ ናምአይ ከይድ ፍልስፄመታስ በንትዳ ዎደ ፍልስፄመት፥ “ሄኮ፥ እብራወት ባንታ ቆሰትዳ ኦላፈ ዙምድ ከዮሶና” ያግዶሶና።
12 ፍልስፄመ ኦላንቾት፥ ዮናታናነ ኦላ ሚሽያ ቶከይሳ ፄግድ፥ “ሃ ኑኮ ከይተ፤ ኑኒ ህንተና እስባ በሳና” ያግዶሶና።
ሄሳ ግሾ፥ ዮናታን ባ ኦላ ሚሽያ ቶከይሳኮ፥ “ታና ካላዳ ሀ ከያ። ጎዳይ ኤንታ እስራኤለ ኩሸን አꬅድ እሚስ” ያግስ።
13 ዮናታን ባ ኦላ ሚሽያ ቶከይሳ ካለꬅድ፥ ቶሆንነ ኩሸን ዙምድ ከይስ። ፍልስፄመታ ዮናታን ሾጭድ የግን፥ እያ ኦላ ሚሽያ ቶከይስ ካልድ ኤንታ ዎꬍስ።
14 ሄ ኮይሮ ኦላን ዮናታንነ እያ ኦላ ሚሽያ ቶከይስ ባጋ ቦራ ሶ ጋደን ላታሙ ግድያ አስ ዎꬍዶሶና።
15 ሄሳፈ ጉየ፥ ጉታንንን ጎሻን፥ ኦላስ ከይዳ አሳትነ ናጎን ደእያ ፍልስፄመት ዳጋምዶሶና። ቢት ቃፅስ፤ ሄ ዳጋማይ ፆሳፈ ኪተትስ።
16 ሳኦል ብንያመ ቢታን፥ ግብአን ዎꬅዳ ዎችያ አሳት፥ ፍልስፄመ ኦላንቾት ያራ ሃራ ፕስክ ግድ ላለተይሳ በእዶሶና።
17 ያትን፥ ሳኦል ባራ ደእያ አሳኮ፥ “አነ ኦላንቾታ ሺሽድ ኑ ግዶፈ ኦን ብዳኮ በእተ” ያግስ። ኤንቲ ሺሽድ ታይብያ ዎደ ዮናታንነ እያ ኦላ ሚሽያ ቶከይስ ባይናይሳ በእዶሶና።
18 ሳኦል ካህንያ አክያ፥ “ፆሳ ታቦትያ ሃ ኤካዳ ያ” ያግስ። ሄ ዎደ ታቦተይ እስራኤለራ ደኤስ
19 ሳኦል ካህንያራ ሃሳይሽን፥ ፍልስፄመት ዱንካንዳ ጉታን ዎጫማይ ዳር ዳር ብስ። ሄሳ ግሾ፥ ሳኦል ካህንያ፥ “ታቦትያፐ ነ ኩሽያ ከሳ” ያግስ።
20 ሄሳፈ ጉየ፥ ሳኦልነ እያ ኦላንቾት ሺቅድ ኦላ ብዶሶና። ፍልስፄመ አሳ ኡባይ ሀናና ባ ꬋይድ፥ ባንታ ማሻን እሶይ እሱዋ ቡꬅዶሶና።
21 ካሰ ፍልስፄመ አሳራ ዎላ ኦላ በሳ ብዳ እብራወት ኤንታ አግድ፥ ሳኦላራነ ዮናታናራ ደእያ እስራኤለ አሳራ ዋላከትዶሶና።
22 ደረይ ዳርያ ኤፍሬማ ቢታን ቆሰትዳ ሀራ እስራኤለትካ ፍልስፄመት ባቃተይሳ ስእዶሶና። ኤንትካ እስራኤለታራ ዋላከትድ የደꬆ ኦይክዶሶና።
23 ጎዳይ ሄ ጋላስ እስራኤለ አሳ አሽስ። ቤት-አዌናፐ ሄፍንꬅ ጋካናዉ ኦላይ ካንꬅስ።
ዮናታና ኤሳ ሙሳ
24 ሄ ጋላስ እስራኤለ አሳይ ኮሻን ላባንዶሶና። ሳኦል፥ “ሳእ ቃማናፐ ስን ታኒ ታ ሞርከታ ሀሎ ከዮና ደእሽን፥ ካꬅ ምያ ኦንካ ባደትዳይሳ ግዶ” ያግድ አሳ ጫቅስድ ዎꬅስ። ሄሳ ግሾ፥ ኦላንቾታፐ ካꬅ ዶናኮ ሺሽዳ አስ ኦንካ ባዋ።
25 ኦላንቾት ኡባይ ዎራ ግዶ ገልያ ዎደ ምꬃ ቦላ ኤስ ደኤስ።
26 ኤንቲ ዎራ ግዶን ኤስ ፆከይሳ በእዶሶና፤ ሽን ጫቁዋ ያይዳ ግሾ፥ እስ አስካ ባ ኩሽያ ዶናኮ ሺሽበና።
27 ሽን ዮናታን እያ አዋይ አሳራ ኦዳ ቃችዳይሳ ስእቤና። ሄሳ ግሾ፥ ባ ኩሸን ደእያ ፃምአ ፄራ እልሎ ኤሳን የድ ከስድ፥ ላጭን እያ አይፈይ ፄልስ።
28 ሄሳፈ ጉየ፥ ኦላንቾታፐ እሶይ፥ “ነ አዋይ ኦላንቾታ ኡባ፥ ‘ሀች ካꬅ ምያ አስ ባደትዳይሳ ግዶ’ ያግድ፥ ጫቅስድ ዎꬅስ፤ አሳ ኡባይ ላባንዳይ ሄሳሳ” ያግስ።
29 ዮናታን፥ “ታ አዋይ ቢታስ መቶ መꬍስ። ታኒ ሀ ኤሳፈ ጉꬃራ ላጭዳ አይ መላ ምንዳኮ በአ።
30 አሳይ ባ ሞርከታፐ ድእዳ ካꬃፈ ሀች ምዳባ ግድያኮ ሎኦሽን፤ ኤንቲ ዎꬋና ፍልስፄመታ ታይቦይካ አይ መላ ዳራነሽን” ያግስ።
31 ሄ ጋላስ እስራኤለ አሳይ ምክማሳፐ ኤሎና ጋካናዉ ፍልስፄመታ ሾጭ ስሚድ ዳቡርዶሶና።
32 ኤንቲ ድእዳ ዶርሳታ፥ ሚዛታነ ማራታ ሹክድ ሱꬃ ጉሶና ምዶሶና።
33 እስ አስ ሳኦላኮ፥ “ሄኮ፥ አሳይ ሱꬃራ ደእያ አሾ ምድ፥ ጎዳ ስንꬃን ናጋራ ኦꬆሶና” ያግስ።
ሳኦል፥ “ህንተ ናጋራ ኦꬅደታ፤ ግታ ሹቹ ጎንዶርስድ ኤለ ታኮ ሃ ሺሽተ” ያግስ።
34 ሄሳፈ ጉየ፥ “አሳ ግዶ ብድ፥ ‘ህንተ እሶይ እሶይ ህንተ መሄታነ ዶርሳታ ታኮ ሃ ኤህተ፤ ሀይሳን ዎጋዳ ሹክድ ሚተ። ሱꬃራ ደእያ አሾ ምድ፥ ጎዳ ስንꬃን ናጋራ ኦꬆፕተ’ ያጋ” ያግስ።
ሄሳ ግሾ፥ ሄ ቃማ እሶይ እሶይ ባ ቦራ ኤህድ ያን ሹክዶሶና።
35 ሳኦል ሄ በሳን ጎዳስ ያርሾ በሲ ግምብስ፤ ጎዳስ ያርሾ በሲ ግምብሽን ሀይስ እያዉ ኮይሮ።
36 ሳኦል፥ “ሀች ቃማ ፍልስፄመታ ካል፥ ብድ ሳእ ዎንታና ጋካናዉ ኤንታባ ኡባ ቦንቆስ፤ ኤንታፈ እሱዋካ አሾና ዎꬎኦስ” ያግስ።
ኤንቲ፥ “ኤሮ፥ ነና ሎእዳባ ኦꬃ” ያግድ ዛርዶሶና።
ሽን ካህነይ፥ “አነ ፆሳ ሸነይ አይበኮ ኦይቾስ” ያግስ።
37 ሄሳ ግሾ፥ ሳኦል፥ “ፍልስፄመ አሳ ካላዳ ቦ? ኔኒ ኤንታ እስራኤለ ኩሸን አꬃዳ እማኔ?” ያግድ ፆሳ ኦይችስ። ሽን ሄ ጋላስ ፆሳይ እያዉ ዛሮ እምቤና።
38 ሳኦል፥ “ካለይሳታ ፄግድ፥ ኡባይ ሃይተ፤ ሀች አይባ ናጋር ኦሰትዳኮ አነ ቆርድ ደሞስ።
39 እስራኤለ አሽያ ደኦ ጎዳይ ኤርያ መላ። ታ ናአ ዮናታና ግድኮካ፥ ሀይቃናዉ በሴስ” ያግስ። ሽን አሳፐ እስ አስካ ዶና ፖግቤና።
40 ሄሳፈ ጉየ፥ ሳኦል እስራኤለ አሳኮ፥ “ህንተ ኡባይ ያ ባጋን ኤቅተ፤ ታንነ ታ ናኣ ዮናታን ሀ ባጋን ኤቃና” ያግስ።
አሳይ፥ “ኤሮ፥ ነና ሎእዳባ ኦꬃ” ያግዶሶና።
41 ሄሳፈ ጉየ፥ ሳኦል፥ “ታዉ ልከ ዛሮ እማ” ያግድ ጎዳ እስራኤለ ፆሳ ዎስስ። ሳማይ ሳኦላ ቦላነ ዮናታና ቦላ ዎꬍን አሳይ ጌይስ።
42 ቃስ ሳኦል፥ “ታ ቦላነ ታ ናኣ ዮናታና ቦላ ሳማ የግተ” ያግስ። ሳማይ ዮናታና ቦላ ዎꬍስ።
43 ሳኦል ዮናታና፥ “አነ ኔኒ ኦꬅዳባ ኦዳ” ያግስ።
ዮናታን፥ “ታኒ ጉꬃ ኤሳ እልሎ ታ ፃምኣ ፄራን ቦቻዳ ላጫስ። ሄኮ ታኒ ሀይሳን ደአይስ፤ ሀይቆስ ጊገታስ” ያግስ።
44 ሳኦል፥ “ዮናታና፥ ኔኒ ሀይቆና እፅኮ፥ ፆሲ ታና ፕርዶ” ያግስ።
45 ሽን አሳይ ሳኦላኮ፥ “ዮናታን፥ እስራኤለስ ሄሳ መላ ግታ ፆኑዋ ኤህዳይስ ሀይቃኔ? ሄስ ፖሎ ሀነና! ደኦ ፆሲ ኤርያ መላ! እያ ሁጵያፐ እስ ብናንካ ቢታን ዎና። እ ሀች ሀይሳ ፆሳ ማዶን ኦꬅስ” ያግዶሶና። ያትድ አሳይ ዮናታና አሽን፥ እ ሀይቆፐ አትስ።
46 ሄሳፈ ጉየ፥ ሳኦል ፍልስፄመ አሳ የደይሳ አግን ኤንቲ ባንታ ቢታ ስምዶሶና።
47 ሳኦል እስራኤለ ቦላ ካዎትዳፐ ጉየ፥ ኡባ ባጋራ ደእያ ባ ሞርከታ ኦልስ። ሄሳትካ፥ ሞአበታ፥ አሞነታ፥ ኤዶመታ፥ ሱባ ካዎታነ ፍልስፄመታ። ኦላናዉ ብዳ በሳ ኡባን ፆንስ።
48 እ ምንድ ኦለትስ፤ አማለቃታ ፆንስ፤ እስራኤለ አሳ ቦንቀይሳታ ኩሸፐ አሽስ።
49 ሳኦላ አደ ናይት ዮናታና፥ የሱዋነ ማልክሳ፤ እያዉ ባይራ ናኤ ሱንꬃይ መራቦ፤ ካሎ ናኤ ሱንꬃይ መልኮሎ።
50 እያ ማችያ፥ አክማሳ ናእያ አክናሆሞ። እያ ቶራ ሞጮናይ እያ አዋ እሻ ኔራ ናኣ አበኔራ።
51 ሳኦላ አዋ ቂስነ አበኔራ አዋ ኔር አብኤላ ናይታ።
52 ሳኦል ደእዳ ላይꬃ ኡባን ፍልስፄመታራ ሞርከተꬃን ኦለትዳ መላ ደእስ። ምኖ አስ ዎይኮ ፃላ አስ ደምዳ ዎደ ኡባን እ ሄ ኡራ ባ ኦላንቾታን ጉጄስ።