15
ሳኦል ቦረትስ
1 ሳሜል ሳኦላኮ፥ “ባ አሳ እስራኤለ ቦላ ኔኒ ካዎታናዳ ትያና መላ ጎዳይ ኪትዳይ ታና። ሄሳ ግሾ፥ ጎዳ ቃላ ስአ።
2 ኡባፈ ዎልቃማ ጎዳይ ሀይሳዳ ያጌስ፤ ‘እስራኤለት ግብፀፈ ከይድ ያ ዎደ አማለቃት ኦገን ኤንታራ ኤቀትዳ ግሾ ታኒ አማለቃታ ሴራና።
3 ሀእ ባዳ አማለቃታ ሾጫ፤ ኤንታዉ ደእያባ ኡባ ፖሎ ꬋይሳ። ኤንታ አሾፋ፤ ማጫነ አደ፥ ናይታነ ዮጋ ናይታ፥ ሚዝነ ዶርሰ፥ ግማለነ ሀረ ኡባ ዎꬋ’ ” ያግስ።
4 ሳኦል አሳ ፄግድ፥ ፀላመ ጌተትያ በሳን ታይብስ። ታይብያ ዎደ እስራኤለፐ ናምኡ ፄቱ ሙኩሉ ቶሆ ኦላንቾታ፤ ይሁዳፐ ታሙ ሙኩሉ አስ ደምስ።
5 ሳኦል አማለቃታ ካታማ ብድ እስ ሻፋን ቆሰትድ ኡትስ።
6 ሳኦል፥ “እስራኤለት ግብፀፈ ከይያ ዎደ ህንተ ኤንታዉ ኬህዳ ግሾ ታኒ ህንተና አማለቃታራ እስፈ ꬋይሶና መላ ደንድድ ኤንታ ግዶፈ ከይተ” ያግድ ቄና አሳስ ኦድስ። ያትን ቄና አሳይ አማለቃታ ግዶፈ ከይድ ብዶሶና።
7 ሳኦል አማለቃታ ሀውላፐ ዶምድ፥ ግብፀፈ ዶሎሀ ባጋን ደእያ ሹራ ጋካናዉ ሾጭስ።
8 አማለቃታ ካዋ አጋጋ ፓፃ ድእስ፤ እያ አሳ ኡባ ማሻን ዎꬍድ ዉርስስ።
9 ሽን ሳኦልነ እያ ኦላንቾት፥ አጋጋነ ሎኦ ዶርሳታ፥ ሚዛታ፥ አንቃራ ማራታነ ማራዘታ፥ ሄሳዳካ ሀራ ሎኦባታ ኡባ አሽዶሶና። ኤንቲ ሀይሳታ ፖሎ ዎꬋናዉ ኮይቦኮና፤ ሽን ኤንቲ ላፋታነ ፓꬆናይሳታ ꬋይስዶሶና።
10 ጎዳይ ሳሜላኮ፥
11 “ሳኦል ታና ካለይሳ አግድ፥ ታ ኪታ ናግቦና ግሾ፥ ታኒ ሳኦላ ካዎꬅዳይሳን ቂሮታስ” ያግስ። ሳሜል ሄሳ ስእዳ ዎደ ኡንኤትድ ቃማ ኩመꬅ ጎዳኮ ዋስስ።
12 ሳሜል ዎንታ ጉራ ደንድድ፥ ሳኦላራ ጋሄታናዉ ብስ። ሽን አሳይ፥ “ሳኦል ቃርመሎሳ ካታማ ብድ፥ ያን ባና ሀሳይስያ ሀዉልተ ኤስዳፐ ጉየ፥ ጋልጋላ ዎꬍስ” ያግድ ኦድዶሶና።
13 ሳሜል ሳኦላ ደምዳ ዎደ ሳኦል ሳሜላኮ፥ “ጎዳይ ነና አንጆ፤ ታኒ ጎዳ ኪታ ፖላስ” ያግስ።
14 ሽን ሳሜል ሳኦላኮ፥ “ያትን፥ ሀ ታኒ ስእያ ዶርሳ ዋሶይነ መሄ ዋሶይ አይቤ?” ያግስ።
15 ሳኦል፥ “ኦላንቾት ሀይሳታ አማለቃታፐ ኤህዶሶና፤ ኤንቲ ጎዳስ፥ ነ ፆሳስ ያርሻናዉ፥ ኡባፈ ሎእያ ዶርሳታነ መሄታ አሽዶሶና፥ ሽን ሀራታ ኡባ ꬋይስዳ” ያግስ።
16 ሳሜል፥ “አነ አጋጋ፤ ጎዳይ ዝነ ቃማ ታዉ ኦድዳባ ታ ነዉ ኦዳና” ያግስ።
ሳኦል፥ “ኤሮ ኦዳ” ያግስ።
17 ሳሜል ዛሪድ፥ “ነ አይፈ ስንꬃን ነ ጉꬃ ግድኮካ፥ እስራኤለ ዘረꬃስ ካዎ ግዳብኪ? እስራኤለ ቦላ ካዎታና መላ ጎዳይ ነና ትይስ።
18 ጎዳይ፥ ‘ኔኒ ባዳ ኢታ ግድዳ አማለቃታ ኩመꬅ ꬋይሳ፤ ኤንቲ ዉራና ጋካናዉ ዎꬋ’ ያግድ ኪትስ።
19 ያትን፥ አይስ ጎዳስ ኪተታብኪ? ድኦስ ያረታዳ ጎዳ ስንꬃን አይስ ኢታባ ኦꬃዲ?” ያግስ።
20 ሳኦል፥ “ታኒ ጎዳስ ኪተታስ፤ እ ታና ኪትዳይሳዳ ባዳ አማለቃታ ዎꬋ ዉርሳስ፤ ኤንታ ካዋ አጋጋ ኤሀስ።
21 ሽን ኦላንቾት ድኡዋፐ ሎእያ ዶርሰነ መህያ ጎዳስ፥ ነ ፆሳስ፥ ጋልጋላን ያርሻናዉ ኤህዶሶና” ያግስ።
22 ሳሜል፥ “ጎዳይ ባ ቃላስ ኪተተይሳን ኡፋይተይሳ መላ ፁሳ ያርሾንነ ሀራ ያርሾን ኡፋይቲ? ሄኮ፥ ኪተተꬅ ያርሾፈ አꬌስ፤ እያ ስስ ዶርሳ ሞꬎ ያርሸይሳፈ አꬌስ።
23 ጌላተꬅ ማሮꬆ ናጋራ መላ፤ ቃስ ኦቶሮይ ኢታ ኤቃ ጎይኖ መላ። ኔኒ ጎዳ ቃላ እፅዳ ግሾ ጎዳይ ነ ካዎ ግዶና መላ እፅስ” ያግስ።
24 ሳኦል፥ “ታኒ ናጋራ ኦꬃስ፤ ጎዳ ኪታነ ነ ቃላ ቶቻስ። ታኒ አሳስ ያይዳ ግሾ ኤንቲ ግዳባ ኦꬃስ።
25 ሀእ ታ ናጋራ አቶ ጋርክ፤ ታኒ ጎዳ ጎይናና መላ ታራ የꬋርክ” ያግስ።
26 ሳሜል፥ “ታኒ ኔራ ስማዳ ቢከ፤ ኔኒ ጎዳ ቃላ እፅዳ ግሾ ነ እስራኤለ ቦላ ካዎ ግዶና መላ ጎዳይ እፅስ” ያግስ።
27 ሳሜል ባናዉ ደንድን፥ ሳኦል እያ ማኡዋ ማጫራ ኦይክን፥ ማኦይ ዳከትስ።
28 ሳሜል፥ “ጎዳይ ሀች እስራኤለ ካዎተꬃ ኔፐ ዳክድ ኔፐ ሎእያ ሀራ አሳስ እሚስ።
29 እስራኤለ ቦንቾይ፥ ፆሳይ ዎርዶተና ዎይኮ ባ ቆፋ ላመና፤ ባ ቃላ ላማናዉ እ አስ ግደና” ያግስ።
30 ሳኦል፥ “ታኒ ናጋራ ኦꬃስ፤ ሽን ታ ቢታ ጭማታ ስንꬃንነ እስራኤለ አሳ ስንꬃን ታና ቦንቻ። ታኒ ጎዳ፥ ነ ፆሳ ጎይናና መላ ታራ የꬋርክ” ያግድ ዎስስ።
31 ሄሳ ግሾ፥ ሳሜል እያራ እስፈ ብን፥ ሳኦል ጎዳ ጎይንስ።
32 ሳሜል፥ “አማለቃታ ካዋ አጋጋ ታኮ ኤህተ” ያግስ።
አጋግ ኮኮርሸ ሳሜላኮ ይድ፥ “ቱማ ሀይቆይ ሀይሳዳ ጫሚ?” ያግስ።
33 ሳሜል አጋጋኮ፥ “ነ ማሻይ ማጫሳ ናይታፐ መላ አሽዳይሳዳ ነ አያካ ማጫሳ ግዶን ናይታፐ መላ አታና” ያግስ። ሳሜል አጋጋ ጎዳ ስንꬃን ጋልጋላን ቃንፀረꬅስ።
34 ሳሜል ደንድድ፥ ራማ ብስ፤ ሳኦልካ ባ ሶ ግብአ ብስ።
35 ሳሜል ሀይቃና ጋካናዉ ሳኦላ በአናዉ ስሚድ ብቤና፥ ሽን ሳሜል ሳኦላ ግሾ ዬክስ። ሳኦላ እስራኤለ ቦላ ካዎ ኦꬅዳይሳስ ጎዳይ አዛንስ።