ጳዉሎስ ፅሞትዮሳስ
ፃፍዳ ኮይሮ ኪታ
ጋꬃ ቆፋ
ፅሞትዮሳ ጌተትያ፥ አማንያ ናአተꬃይ፥ ጉꬃ ኢሰን የለትስ (ሀዋ 16:1-3)። እያ አይያ አይሁደ፤ እያ አዋይ ቃስ ግርከ አስ። እ ጳዉሎሳራ እስፈ ኦꬄስ፤ ቃስ ዎንገላ ኦሶን ጳዉሎሳ ማታን ማድያ አስ። ጳዉሎስ፥ ፅሞትዮሳስ ፃፍዳ ኮይሮ ኪታይ፥ ሄꬑ አይፈ ኦዳታ ምንꬅድ ፄሌስ።
ሀ ኪታ ኮይሮ ቆፋይ፥ ዎሳ ኬꬃን ደንድዳ ዎርዶ ትምርትያባ ምንꬅድ ኦዴስ። ሀ እማꬃ ትምርተይ አይሁደ ትምርትያፈ ባጋ፥ ቃስ አይሁደ ግዶና አሳ ትምርትያፈ ባጋ ኤኬስ። ሄስካ፥ “ሀ በንትያ አላመይ ናጋራን ኢትዳ ግሾ፥ አስ አቶተꬅ ደማናዉ ዱማ ግድዳ ፁራ ኤራናዉ፥ እስ እስ ካꬃታ ሞና አጋናዉነ ማቾ ኤኮና ዎይኮ አዝና ገሎና ዳናዉ ኮሼስ” ግያ ቆፋ ባሶ ኦꬅድ ደንድስ።
ናምአንꬆ ቆፋይ፥ ዎሳ ኬꬃ አይሶባነ ጎይኖ ዎጋባ ታማርስያ ትምርተ፥ ሄሳዳካ ዎሳ ኬꬅ ካለይሳትነ ኤንታ ማደይሳት አይ መላ ማራ ዱሱ ዳናዉ በሲያኮ ኦዴስ።
ሄꬓንꬆ ቆፋይ፥ ፅሞትዮስ የሱስ ክርስቶሳስ ኦꬅያ ሎኦ አስ ዋንድ ግዳናዉ በሲያኮ፥ ቃስ አማንያ አሳ ማታን እያዉ ደእያ አዋተꬃይ አይበኮ፥ ጳዉሎስ እያ ዞርዳ ዞርያ በሴስ።
ማፃፋ አይፈ ቆፋታ
ገሎ ቆፋ (1:1-2)
ዎሳ ኬꬅ አይስያ አሳ (1:3—3:13)
ኑ አማኑዋ ፁራ (3:14—4:5)
ፅሞትዮሳስ እመትዳ ዞረ (4:6—6:21)
1
1 ኑና አሽያ ፆሳንነ ኑ ኡፋይሳን ናግያ የሱስ ክርስቶሳን ኪተትዳ፥ የሱስ ክርስቶሳ ሀዋረ ግድዳ፥ ጳዉሎሳፐ፥
2 አማኖን ታዉ ቱማ ናአ ግድዳ ፅሞትዮሳስ።
ፆሳ ኑ አዋ፥ ኑ ጎዳ ክርስቶሳ አꬎ ኬሀተꬃይ፥ ማሮተꬃይነ ሳሮተꬃይ ነዉ ግዶ።
ዎርዶ ትምርተፈ ናገተꬅ
3 ታኒ ማቀዶነ ባሸ ነና ሀዳርዳይሳዳ፥ እስ እስ አሳት ዎርዶ ትምርትያ ታማርሰይሳ ድጋናዉ ነ ኤፈሶናን ጋምአና መላ ኮያይስ።
4 ኤንቲ ጎእ ባይና ሀይሰ ኦዳነ ባንታ ኮቻ ታይቡዋ አጋናዳ ኦዳ። ሄሳ መላባይ ፓላማ ካለꬄስፐ አትሽን፥ አማኖን ኦሰትያ ፆሳ ኦሱዋስ ማደና።
5 ሀ ኪታ ሁጰ ቆፋይ ጌሻ ዎዛናፐ፥ ሎኦ ካሀፐነ ቱማ አማኑዋፐ በንትያ ሲቁዋ ደንꬃናሳ።
6 እስ እስ አሳት ሀይሳ አግድ፥ ፓꬆና ኦዳኮ ስምዶሶና።
7 ኤንቲ ፆሳ ህግያ አስታማረ ግዳናዉ ኮዮሶና። ሽን ኤንቲ አይ ኦድያኮ ዎይኮ ቱማ ኦꬅድ ኦደይስ እ አይበኮ ኤሮኮና።
8 አስ በሰይሳዳ ህግያን ጎኤትኮ ህገይ ሎኦ ግደይሳ ኤሮስ።
9 እስባ አኬካናዉ ኮሼስ። ህገይ ሎኦ አሳስ መትቤና። ሽን ህገይ፥ ህገ መንይሳታ፥ ዎራንꬖታ፥ ፆሰ ያዮናይሳታ፥ ሸምፖ ዎይሳታ፥ ናጋራንቾታ፥ ጌሻተꬅ ባይናይሳታ፥ ቱናታ፥ ሀር አቶሽን ባንታ አይዉ ዎይኮ አዋ ዎይሳታ፥
10 ላመይሳታ፥ አደይ አደራ ላይማተይሳታ፥ አሰ ባይዘይሳታ፥ ዎርዳንቾታ፥ ዎርዶን ጫቀይሳታ፥ ዎይኮ ቱማ ትምርትያራ ጋሄቶና አይ ኦሶ ኦይሳታ ሴራናዉ ከይስ።
11 ሄ ትምርተይ ቦንቾነ አንጀትዳ ፆሳይ ታኒ አዋጃና መላ ታዉ ሀዳራ እምዳ ዎንገላ ግዶን ደኤስ።
ፆሳ ማሮተꬃስ ጋላታ
12 ታኒ ኦꬅያ ኦሱዋን ታዉ ዎልቃ እምዳ ኑ ጎዳ ክርስቶስ የሱሳ ጋላታይስ። ታና ባ ኦሱዋስ ሹምድ ሄ ኦሱዋስ በሰይሳ ግድ ታይብዳ ግሾ እያ ጋላታይስ።
13 ታኒ ሀይሳፈ ካሰ እያ ጫየይሳ፥ እያ የደይሳነ መቶይሳ ግድኮካ ታኒ ሄሳ ኤሮናነ አማኖና ኦꬅዳ ግሾ ፆሳይ ታና ማርስ።
14 ኑ ጎዳይ ባ አꬎ ኬሀተꬃ ታ ቦላ ጉስድ፥ ሄ አꬎ ኬሀተꬃራ አማኖነ ሲቆ ክርስቶስ የሱሳ ባጋራ ታዉ እሚስ።
15 “ክርስቶስ የሱሲ ናጋራንቾታ አሻናዉ ሀ አላምያ ይስ” ግያ ቃላይ አማንይሳነ አሳ ኡባይ ኤካናዉ በሰይሳ። ኡባፈ አꬍዳ ናጋራንቾይ ታና።
16 ሽን መርና ደኡዋ ኤካናዉ እያ አማንያ አሳስ ታኒ ሌምሶ ግዳና መላ የሱስ ክርስቶሲ ዳሮ ዳንዳእስ። ታዉ ኡባፈ አꬍዳ ናጋራንቹዋስ ፆሳይ ባ ማሮታ ዳርስስ።
17 አይፈን በንቶናይሳስ፥ እስ ፆሳስ፥ ሀይቆናይሳስ፥ መርና ካዋስ፥ መርናፐ መርና ጋካናዉ ጋላታይነ ቦንቾይ ግዶ። አምንእ።
18 ፅሞትዮሳ፥ ታ ናአዉ፥ ካሰ ነባ ናበት ኦድዳ ቃላ ቦላ ኤቃዳ ሀ ኪታ ሀዳራ ነዉ እማይስ። ነ ሄ ቃላ ካልኮ ሎኦ ኦላ ኦለታና።
19 አማኖይነ ሎኦ ካህ ነዉ ደኦ። እሶት እሶት ካሀ ꬋይድ ማርካበይ ሆበን ꬋየይሳዳ ባንታ አማኑዋ ꬋይስዶሶና።
20 ሄሳ ሀንዳይሳታ ግዶን ሄመነዮስነ እስክንድረይ ደኦሶና። ኤንቲ ታማርድ ፆሳ ጫየይሳ አጋና መላ ታኒ ፃላሄስ ኤንታና አꬃ እማስ።