1 ኡባፈ ስንꬃታዳ፥ አሳ ኡባስ ፆሳ ኦይቻናዉ፥ ዎሳናዉ፥ ጋናታናዉነ ጋላታናዉ በሰይሳ ታኒ ነና አኬክሳይስ። 2 ኑኒ ቱማ አያና ደኦንነ ጌሻተꬃን ፆሳ ጎይንሸ ሳሮተꬃንነ ዎፑ ግዳ ደኦን ዳና መላ ካዎታስነ ሹማታ ኡባስ ዎስተ። 3 ሄሳ መላ ዎሳይ ኑና አሽያ ፆሳ ስንꬃን ሎኦነ ኡፋይስያባ። 4 ፆሳይ አስ ኡባይ አታናዳነ ቱማ ኤራናዳ ኮዬስ። 5 እስ ፆሲ ደኤስ። ፆሳፈነ አሳፐ ግዶን ግድድ ስገꬅያ እሶይ ደኤስ፤ እካ አሰ ግድዳ ክርስቶስ የሱሳ። 6 እ አሳ ኡባ ዎዛናዉ ባና አꬅድ እሚስ። ፆሳይ ባ ዎድያን አሳ ኡባ ዎዛናዉ ኮየይሳ በሲያ ማርካይ ሀይሳ። 7 ፆሳይ ታና ዎንገላስ አስታማረነ ሀዋረ ኦꬅድ ዶርዳይ ሄሳሳ። ታኒ ቱማ ኦዳይስ፤ ዎርዶትከ፤ አማኖንነ ቱማን አይሁደ ግዶና አሳስ ማርካታና መላ ፆሳይ ታና ሹምስ። +

8 ሄሳ ግሾ፥ ኡባ በሳን ደእያ አደት፥ ባንታና ፆሳስ ዱማይድ፥ ሀንቆነ ፓላማ ድግድ፥ ባንታ ኩሽያ ፑደ ደንꬅድ ፆሳ ዎሳና መላ ኮያይስ።

9 ሄሳዳ ማጫሳይ ባንታና ሃርዳይሳ ቆንጭስያ፥ ቦንቾይነ ማር ደእያ ማኡዋ ማአናዉ በሴስ። ኤንቲ ማር ባይና ሁጰ ዳꬃን፥ ዎርቃን ዎይኮ እንቆን፥ ዎይኮ አልኦ አፍላን ባንታና አሌቅሶፖ። + 10 ሽን ፆሳስ ጎይናይስ ግያ ማጫሳይ ባንታዉ በሰይሳዳ ሎኦባ ኦꬆና።

11 ማጫስ ኪተተꬃን ስእ ግድ ታማሮ። 12 ታኒ ማጫሳይ ታማርሳና መላ ዎይኮ አደ ቦላ አዋታና መላ ግዶናሽን፥ ስእ ግድ ዳና መላ ኮያይስ። 13 አዳመይ ኮይሮ መትስ፤ ጉየፐ ሄዋና መታሱ።+ 14 ቃስ ጭመታዳ ፆሳ ህግያ መንꬅዳይ ማጫስፐ አትሽን፥ አዳመ ግደና። + 15 ሽን ማጫስ አማኖን፥ ሲቆንነ ጌሻተꬃን ባንታና ሃርድ ደእኮ * ናይታ የሎን አታና።