3
ዎሳ ኬꬃ ጭማታ
1 ኦንካ፥ “ዎሳ ኬꬅ ካለꬅያ አስ ግዳናዉ ኮይኮ ሎኦባ አሞቴስ” ግያ ኦዳይ ቱማ።
2 ዎሳ ኬꬃ ካለꬅያ አስ ቦረቶናይሳ፥ እስ ማቸ ፃላል ደኤይሳ፥ ማራን ደኤይሳ፥ ባና ሃረይሳ፥ በሰይሳዳ ኦይሳ፥ እማ ሞከይሳ፥ ታማርሳናዉ ዳንዳኤይሳ፥
3 ማꬆቶናይሳ፥ ኦየቶናይሳ፥ ፓላሞናይሳ፥ ሚሸ ሲቆናይሳ፥
4 እያ ናይት እያዉ ኪተተይሳነ ቦንቸይሳ፥ ባ ኬꬃ አይሳናዉ ዳንዳኤይሳ ግዳናዉ በሴስ።
5 እስ አስ ባ ኬꬃ አይሳናዉ ዳንዳኦና እፅኮ፥ ፆሳ ዎሳ ኬꬅ ዋት አይሳናዉ ዳንዳኢ?
6 ኦቶሮን ሱገትድ፥ ፃላሄይ ፆሳ ፕርዳን ኩንድዳይሳዳ ኩንዶና መላ፥ ኦራꬅ አማንዳ አስ ግዳናዉ በሰና።
7 ቦረንነ ፃላሄ ፅሄን ገሎና መላ ሄ ኡራይ አማኖና አሳ ማታን ናሸተይሳ ግዳናዉ በሴስ።
ዎሳ ኬꬃ ዳቆነታ
8 ሄሳዳ ቃስ ዎሳ ኬꬃ ዳቆነት ቦንቸትዳይሳታ፥ ናምኡ ዶና ኦደቶናይሳታ፥ ዳሮ ዎይነ ኡሹ ኡዮናይሳታ፥ ሚሸ ያረቶናይሳታ፥
9 አማኑዋ ፁራ ጌሻ ካሀን ናገይሳታ ግዳናዉ በሴስ።
10 ኤንቲ ኮይሮትድ ፓጨታናዉ ኮሼስ፤ ኤንታ ቦላ ቦረይ ባይና እፅኮ፥ ዎሳ ኬꬃ ዳቆነ ግድድ ኦꬆ።
11 ሄሳዳካ፥ ኤንታ ማጫሳት ቦንቸትዳይሳታ፥ ዝግሮናይሳታ፥ ማራን ደኤይሳታ፥ ኡባባን አማነተይሳታ ግዳናዉ በሴስ።
12 ዎሳ ኬꬃ ዳቆነት እስ ማች ፃላል ደኤይሳ ግዶ። ባ ናይታነ ባ ኬꬃ ሎይꬅ አይሰይሳ ግዳናዉ በሴስ።
13 ዎሳ ኬꬃ ዳቆነ ግድድ፥ ሎኦ ኦሶ ኦይሳት፥ ኤንታዉ ግታ ቦንቾ ቃስ ክርስቶስ የሱሳን ባንታዉ ደእያ አማኑዋባ ኦዳናዉ ዳሮ ምኖተꬅ ደማና።
አማኖ ግታ ፁራ
14 ታኒ ሀ ኪታ ነዉ ፃፋሸ፥ ኤለሳዳ ኔኮ ባና ጋዳ ኡፋይስ ዎꬃይስ።
15 ሽን ታኒ ቦና ጋምእኮ፥ ፆሳ ኬꬃን አሳይ ዋንድ ዳናዉ በሲያኮ ኤራና መላ ሀይሳ ነዉ ፃፋይስ። ደኦ ፆሳ ኬꬃይ ቱማተꬃስ ቱስነ ባሶ።
16 ኑ አማኑዋ ፁራይ ስይ ባይና ግታ።
ክርስቶስ አሾ ማእድ ቆንጭስ፤
እያ ቱማተꬃ ጌሻ አያናይ ማርካትስ።
ኪታንቾታስ በንትስ፤
እ ካዎተꬃ ኡባስ ሳባከትስ።
አላመን ደእያ አሳን አማነትስ፤
ቦንቾን ሳሎ ኤከትስ።