4
ዎርዶ አስታማረታ
1 ያና ዎድያን ባለꬅያ አያናታነ ቱና አያናታ ትምርተ ካልድ፥ እስ እስ አሳይ አማኑዋ ካዳናይሳ ጌሻ አያናይ ቆንጭስድ ኦድስ።
2 ሄሳ መላ ትምርተይ ኤንታ ካሀይ ዶጭን፥ አሳ ባለꬅያ ዎርዳንቾ አስታማረታፐ ዬስ።
3 ሄሳ መላ አሳት ኤኮነ ገሎ ቃስ እስ እስ ካꬃታ ሞና መላ ድጎሶና። ሽን አማነይሳትነ ቱማ ኤረይሳት ፆሳ ጋላት ዎስድ ማና መላ ፆሳይ ካꬅ መꬍስ።
4 ፆሳይ መꬍዳ ኡባባይ ሎኦ። ፆሳ ጋላትድ ሚኮ ዎራ ዎꬍያባይ አይብካ ባዋ።
5 ኡባባይ ፆሳ ቃላንነ ዎሳን ጌሽ ግዴስ።
ክርስቶሳ አማንꬅያ አይለ
6 ሄሳ ግሾ፥ ኔኒ ሀ ትምርትያ አማነይሳታ ታማርስኮ፥ ኑ አማኑዋንነ ሎኦ ትምርትያ ኪተታዳ ድጭዳ፥ ክርስቶስ የሱሳ ሎኦ አይለ ግዳና።
7 ሽን ጎእ ባይና ቱማ ግዶና ኦዳፐነ ጭማ ማጫሳ ሀይሰፐ ባቃታ። ቱማ አያና ደኦን ዳናዉ ነና ሎህሳ።
8 አስ ባ አሳተꬃ ምንꬃናዉ ኦꬅያ ኦሶይ ጉꬃስ ማዴስ። ሽን ቱማ አያና ደኦን ባና ሎህሶይ ሀእስካ መርናዉካ ደኦ እምያ ኡፋይስ ደእያ ግሾ፥ ኡባስ ማዴስ።
9 ሀ ቃላይ አሳ ኡባይ ኤካናዉ በሲያ ቱማ ኦዳ።
10 ኑኒ አሳ ኡባ፥ ኡባፈ አꬅድ አማነይሳታ አሽያ ደኦ ፆሳፈ ኤካና ግድ ኡፋይሳን ናግያ ግሾ፥ ሄሳስ ኑኒ ኦሶን ዳቡሮስነ ባፀቶስ።
11 ሀይሳ ኪታነ ታማርሳ።
12 ኔኒ ያላጋ ግድያ ግሾ፥ ነና ኦንካ ካꬎፖ። ሽን አማነይሳታስ ኔኒ ኦዳን፥ ኦሶን፥ ሲቆን፥ አማኖንነ ጌሻተꬃን ሌምሶ ግዳ።
13 ታኒ ያና ጋካናዉ አሳስ ጌሻ ማፃፋ ናባቦን፥ ሳባኮንነ ታማርሶን ምና።
14 ትንብተይ ኦደትን፥ ጭማት ባንታ ኩሽያ ነ ቦላ ዎꬅዳ ዎደ ኔኒ ኤክዳ፥ ነናን ደእያ ጌሻ አያና እሞታ ካꬎፓ።
15 ነ ድቻይ አሳ ኡባስ ቆንጫና መላ ሄሳ ምንꬃ ቆፓ፤ ሀይሳ ኡባ ዎደ ኦꬃ።
16 ነ ሁጵያስነ ነ ትምርትያስ ናገታ። ኔኒ ሄሳ ኡባ ዎደ ኦꬅኮ ነናነ ነና ስኤይሳታ አሻሳ።