5
አምኤታባ እመትዳ ዞረ
1 ጭማ አደታ ነ አዋዳ ቦንቻፈ አትሽን፥ ሀንቀቶፋ። ያላጋ አደታ ነ እሻዳ ኦꬃዳ ፄላ።
2 ጭማ ማጫሳታ ነ አይዳ፥ ያላጋ ማጫሳታ ነ ምችዳ፥ ፖሎ ጌሻተꬃን ኦይካ።
3 አዝን ሀይቅዳ ቱማ አምኤታ ቦንቻ።
4 ሽን አምኤስ ናይት ዎይኮ ናይታ ናይት ደእኮ፥ ሄ ናይት ቱማ አያና ደኦን ደኤይሳ በሳናዉ ባንታና የልዳይሳታነ፥ ባንታ ዎጋ አይዉነ ዎጋ አዋ ማድድ ኩሸ ዛሮ ታማሮ። ሄስ ፆሳ ኡፋይስያባ።
5 ባርካ ደእያ ቱማ አምእያ ፆሳፈ ማደ ደማናዉ ኡፋይሳን ናጋሱ። ጋላስነ ቃማ ፆሳይ ባና ማዳና መላ ዎሳዉሱነ ኦይቻዉሱ።
6 ሽን ሀ አላምያን ሎኦ ዱሳ ፃላላ ኮይያ አምእያ ፓፃ ደአሸ ሀይቅዳሮ።
7 ኦንካ ኤንታ ቦሮና መላ ሀ ኪታ ኤንታዉ እማ።
8 ሽን ባ ዳቦታስ፥ ኡባፈ አꬅድ ባ ሶ አሳስ ቆፖና ኦንካ ባ አማኑዋ ካድዳይሳ፤ አማኖና አሳፐካ አꬍዳ ኢታ።
9 ላይꬅ ኡሱፑን ታሙ ኩምቦና አምኤ ሱንꬃ ማዝጋበን ፃፎፓ። ቃስ ሄሳ ቦላ እያ ባ አዝናስ አማነትዳሮ ግዳናዉ ኮሼስ።
10 ናይታ ድሾን፥ እማꬃ ሞኮን፥ ጌሻታ ቶሁዋ ሜቻን፥ መቶትያ አሳ ማደን፥ ሎኦ ኦሶ ኡባስ ባና አꬃ እምዳሮነ ሎኦ ኦሶን ኤረትዳሮ ግዳናዉ በሴስ።
11 ሽን ያላጋ አምኤታ ሱንꬃ ማዝጋበን ፃፎፓ። ኤንታና አዝና ገሎ ገሎ ግያ አሾ አሞይ ኦይክያ ዎደ ክርስቶሳ አጋና።
12 ኤንቲ ኮይሮ ገልዳ ቃላ መንꬅዳ ግሾ ፕርደታና።
13 ሄሳ ቦላ ኤንቲ ኦሶ ꬋይድ ኬꬃፈ ኬ ዩያና። ዩሻ ፃላላ ግዶናሽን፥ ዝግርሳንነ ባንታና ጋꬆናባን ገልድ በሶናባ ኦደቶሶና።
14 ሄሳ ግሾ፥ ኑ ሞርከት ኑ ቦላ ኦደትያ ኢታባ ደሞና መላ ያላጋ አምኤት አዝና ገልድ፥ ናአ የልድ፥ ባንታ ኬꬃ አይሳና መላ ዞራይስ።
15 ሀይሳፈ ካሰ ጉꬃ አምኤት ፃላሄ ካላናዉ ጉየ ስምዶሶና።
16 እስ አማንያ ማጫሴስ ሶ አሳ ግዶን አምኤት ደእኮ፥ እያ ኤንታ ማዳናዉ በሴስ። ሄሳዳ ኦꬅኮ፥ ዎሳ ኬꬃስ ቶሆይ ካዉዬስ። ሄ ዎደ ዎሳ ኬꬃይ ማደ በሲያ ቱማ አምኤታ ማዳናዉ ዳንዳኤስ።
17 ዎሳ ኬꬅ ሎይꬅ ሄምያ ጭማት፥ ኡባፈ አꬅድ፥ ቃላ ሳባኮንነ ታማርሶን ዳቡረይሳት ዳኮ ቦንቾ ኤካናዉ በሴስ።
18 ጌሻ ማፃፋይ፥ “ዉዱማን ካꬃ የꬍያ ቦራ ዶና ቃቾፋ” ሄሳዳካ፥ “ኦሳንቾይ ባ ዳሞዝያ ኤካናዉ በሴስ” ያጌስ።
19 ናምኡ ዎይኮ ሄꬑ ማርክ ባይና፥ ዎሳ ኬꬃ ጭማ ሞትያባ ስኦፓ።
20 ሀራት ያያና መላ ናጋራ ኦꬅያ ኦናካ አሳ ኡባ ስንꬃን ሀንቀታ።
21 ኔኒ አሳ ሶምኦ በኦና፥ እሱዋ እሱዋፈ ዱማዮና ሀ ኪታ ናጋና መላ ፆሳ፥ ጎዳ የሱስ ክርስቶሳነ ዶረትዳ ኪታንቾታ ስንꬃን ታ ነና ዞራይስ።
22 ኦደ ቦላካ ነ ኩሽያ ዎꬃዳ ሹማናዉ ኤለሶፓ። ሀራታ ናጋራን ገሎፓ፤ ነና ጌሻተꬃን ናጋ።
23 ኔኒ ኡባ ዎደ ሀርገትያ ግሾነ ነ ኡሎ ሀርግያ ግሾ ሃꬃ ፃላላ ኡዮፓ፤ ጉꬃ ዎይነ ኡያ።
24 እስ እስ አሳታ ናጋራይ ቆንጨ፤ ኤንታ ናጋራይ ኤንታ ፕርዳናዉ ኤንታፈ ስን አꬌስ፥ ሽን ሀራታ ናጋራይ ጉየፐ ጋምእድ ቆንጬስ።
25 ሄሳዳ፥ ሎኦ ኦሶይካ ቆንጨ፤ ቆንጮና እፅኮካ ጌማናዉ ዳንዳኤና።