6
አይለታስ እመትዳ ዞረ
1 ፆሳ ሱንꬃይነ ኑ ትምርተይ ጫየቶና መላ አይለተꬃን ደኤይሳት ባንታና ሃርያ ጎዳታ ቦንቾ።
2 አማንያ ጎዳት ደእያ አይለት፥ ኤንታ ጎዳት ኤንታዉ እሻ ግድያ ግሾ ኤንታ ካꬎፖ። ኤንታ ኦሱዋን ማደትያ ጎዳት፥ አማነይሳታነ ዶሰትዳይሳታ ግድያ ግሾ ኤንቲ ካሰፐ አꬅድ ኦꬃናዉ በሴስ። ኔኒ ሀይሳ ታማርሳናዉነ ኤንቲ ኦꬃና መላ ዞራናዉ በሴስ።
ቱማ ዱረተꬅ
3 ኦንካ ዱማ ትምርተ ታማርስያባ ግድኮ፥ ኑ ጎዳ የሱስ ክርስቶሳ ቱማ ቃላራነ ኑ አማኖ ትምርትያራ ጋሄተና።
4 ሄ ኡራይ ኦቶሮን ሱገቴስፐ አትሽን፥ አይኮካ ኤረና። ኤንታዉ እስ ቆፋ ቦላ ፓላማናዉነ ኦየታናዉ ኢታ አሞይ ደኤስ። ሄስ ቃናተ፥ ኦሽ፥ ጫሸ፥ ኢታ ስነ፥
5 ጊጎና ፓላማ ካለꬄስ። ቃስ ኤንታዉ ኢታ ዎዛን ደኤስ፤ ቱማ ባልዶሶና፤ ኤንቲ ፆሳ አማኖይ ዱረተꬃስ ኦገ ግድ ቆፖሶና።
6 ሽን ታዉ ደእያባይ ግዳና ግያ አሳስ ቱማ አያና ደኦይ ግታ ዎ።
7 ኑኒ ሀ አላምያ አይኮካ ኤህቦኮ፤ ቃስ እያፐ አይኮካ ኤክድ ቦኮ።
8 ኑስ ካꬅነ ማኦይ ደእኮ ሄስ ግዳና።
9 ሽን ዱረተꬅ ኮየይሳት ፓጨንነ ፅሄን ገሎሶና። ቃስ ኤንታና ዱገ ዳፍያነ ꬋይስያ ኤያተꬅነ ቆህያ አሞን ኩንዶሶና።
10 ሚሸ ሲቆይ ኢታተꬃ ኡባስ ፑልቶ። እሶት እሶት ሚሸ አሞትሸ አማኖፐ ባለትድ ዳሮ መቶን ባንታና የግዶሶና።
ዞረነ ኪታ
11 ሽን ነኖ፥ ፆሳ አሶ፥ ሄሳፈ ባቃታ። ፅሎተꬃ፥ ፆሳ ዳኖ፥ አማኖ፥ ሲቆ፥ ዳንዳአነ አሽከተꬅ ካላ።
12 አማኖ ባፅያ ሎይꬃ ባፀታ። ዳሮ አሳ ስንꬃን ነ ማርካትዳ ነ አማኑዋባ፥ ፆሳይ ነና እያዉ ፄግዳ መርና ደኡዋ ኦይካ።
13 ኡባስ ደኦ እምያ ፆሳ ስንꬃንነ፥ ጰንፀ ጵላፆሳ ስንꬃን ሎኦ ማርካ ማርካትዳ ክርስቶስ የሱሳ ስንꬃን ታ ነና ኪታይስ።
14 ኑ ጎዳ የሱስ ክርስቶሲ ቆንጫና ጋካናዉ ሀ ኪታ ባልነ ቦረይ ባይና ናጋ።
15 ባ ፃላላ ኡባ ሃርያ ቦንቾ ፆሳይ፥ ካዎታ ካዎይ፥ ጎዳታ ጎዳይ፥ ባ ቆፕዳ ቃማን የሱስ ክርስቶሳ ዛር ኪታና።
16 እስ እያ ፃላል ሀይቀና። ኦንካ ሺቃናዉ ዳንዳኦና ፖኦን ደኤስ። ኦንካ እያ በእቤና፤ ቃስ በአናዉካ ዳንዳኤና። ቦንቾይነ መርና ዎልቃይ እያዉ ግዶ። አምንእ።
17 ሀ አላምያ ዱረት ጮ ꬋይያ ሻሎን ኦቶርቶና መላነ ጬቆና መላ ኦዳ። ኑስ ኮሽያባ ፓላህስድ እምያ ኑና አንጅያ፥ ዱረ ፆሳን አማነታና መላ ኤንታ ኪታ።
18 ኤንቲ ሎኦ ኦሶ ኦꬃናዳ ሎኦ ኦሶን ዱረታናዳ፥ ኬሀታነ ሀራታስ ሻከይሳታ ግዳና መላ ኪታ።
19 ሄስ ኤንታዉ ስንꬃስ ምኖ ባሶ ግድያ ግሾ፥ ሄ ዎደ ኤንቲ ቱማ ደኦይ አይ ዳንያኮ ኤራና።
20 ፅሞትዮሳ፥ እስ እስ አሳይ፥ “ኤራተꬅ” ግያ ኤያ ፓላማፐነ ሀዳ ኦዳፐ ባቃታ፤ ነዉ እመትዳ ሀዳራ ናጋ።
21 እሶት እሶት ኑስ ኤራተꬅ ደኤስ ያግሸ አማኑዋ አግዶሶና።
ፆሳ አꬎ ኬሀተꬃይ ህንተ ኡባራ ግዶ።