8
Iziri Higge Maxaafa Nabbabis
1 Laapuntho ageenay geliya wode Isra7eele asay banta kataman kataman uttidosona. He ageenan enti ubbay issife Haatha Penge sinthan de7iya dabaaban shiiqidosona. Enti Goday Muse baggara Isra7eele asaas immida Higge Maxaafa ehana mela xaafiya Izira oychidosona.
2 Yaatin, kahiney Iziri, laapuntho ageenan koyro gallasan, addey, maccinne akeekanaw danda7iya asi ubbay shiiqida bessaa Higge Maxaafa ehis.
3 Haatha Penge sinthan de7iya dabaaban eqidi, addes, maccasinne akeekanaw danda7iya ase ubbaas Higge Maxaafa wontafe gallas gakanaw nabbabis. Asayka hayzidi si7idosona.
4 Xaafey Iziri, nabbabanaw mithafe oosetida dhoqa bessan keyidi eqis. Iyape ushacha baggara Matita, Shamaya, Anaya, Uraya, Kalqenne Ma7iseya geetetiya asati eqidosona. Haddirsa baggara Padaya, Misa7eela, Malkiya, Hasuma, Hashibada, Zakariyasanne Masulaama geetetiya asati eqidosona.
5 Iziri asa ubbaafe dhoqiya bessan eqiya wode ubbay iya loythidi xeellishin, enta sinthan Higge Maxaafa dooyis. I dooyiya wode enti ubbay uttida bessaafe dendi eqidosona.
6 Iziri Godaa, gita Xoossaa galatis. Asa ubbay banta kushiya denthidi, “Amin7i! Amin7i!” yaagidosona. Enta som7oy sa7a bochana gakanaw gufannidi Godaa goyinnidosona.
7 Enti banta eqida bessan de7ishin, Leeweti, Iyyasuy, Baani, Saraba, Yamina, Aquba, Sabata, Hoda, Maseya, Qalixa, Azaara, Yozabaata, Hananinne Palahi higgiya asay akeekanaada birshethaa qoncisidosona.
8 Enti Xoossaa Higge Maxaafa nabbabidosona; qassi nabbabeteysi woygiyako asay erana mela birshethaa qoncisidosona.
9 Asay higge qaala si7ida wode yeekida gisho, biitta haariya Nahimey, kahinenne xaafe gidida Izirinne asaas maxaafa birshiya Leeweti, “Ha gallasay Godaas, hinte Xoossaas geeshsha gallas gidiya gisho, yeekofite woyko afuxofite” yaagidosona.
10 Nahimey, “Bidi dooretida kathaa miite; mal7iya ushshi uyite; qassi aykoy baynaysatas hinteysafe shaakidi immite. Hachi gallasay nu Godaas geeshsha gallas. Godaa ufaysay hintew wolqa gidiya gisho azzanopite” yaagis.
11 Leeweti, “Hachi gallasay geeshsha gallas gidiya gisho, azzanopite; si77i giite” yaagidi asa si77i oothidosona.
12 Nabbebetida qaala birshethay entaw gelida gisho, asay ufaysan maanaw, uyanawnne aykoy baynaysatas shaakidi immanaw soo bidosona.
13 He ageena nam7antho gallasan kochata halaqati, kahinetine Leeweti higge qaala entaw birshana mela Izirako yidosona.
14 Enti tamaariya wode laapuntha ageenan Shaqara Ba7aale bonchiya wode Isra7eele asay shaqara garsan uttidi bonchana mela Xoossay Muse baggara kiitidaysa demmidosona.
15 Shaqara Ba7aale bonchanaw katamataninne Yerusalaamen haysada yaagidi awaajidosona; “Shaqara shaqaranaw dere bolla keyidi zayte shamaho, wora shamaho, barseneete mitha, zamba haythinne mitha ubbaafe higgen xaafetidaysada tashe ehite” yaagidosona.
16 Hessa gisho, asay bidi mitha tashe ehidi banta pooqe keetha bolla de7iya denban, banta zabban, Xoossa keetha dabaaban, Haatha Pengiya dabaabaninne Efreema Pengiya dabaaban shaqara shaqaridosona.
17 Di7etethafe simmida asa ubbay shaqara shaqaridi iya garsan uttidosona. Nawe na7aa Iyyasu wodepe haa simmin enti haysa mela ba7aale bonchi erokona. Hessa gisho, enti ubbay daro ufaytidosona.
18 Ba7aaley doometidi wurana gakanaw gallas gallas Iziri Xoossaa Higge Maxaafape asaas nabbabees. Baaliya laapun gallas bonchidaape guye hospuntho gallasan higgey kiiteysada geeshsha duulatta oothidosona.