9
Asay Banta Nagara Paaxidosona
1 He ageenan laatamanne oyddantho gallasan Isra7eele asay issife shiiqidi, kayo ma7o ma7idi, banta huuphen baana qolidi xoomidosona.
2 Bantana allaga dere asaape shaakidosona. Hessefe guye dendi eqidi entinne enta aawati oothida nagaraa ubbaa paaxidosona.
3 Enti yan eqidi de7ishin heedzu saate kumethi Godaa enta Xoossaa Higge Maxaafay entaw nabbabetis. Qassi hara heedzu saate banta nagaraa paaxishe Godaa banta Xoossaa goyinnidosona.
4 Leeweti, Iyyasuy, Baani, Qadimi7eeli, Sabana, Buni, Saraba, Bananinne, Kenaani madirake bolla keyidi banta qaala dhoqu oothidi Godaa, banta Xoossaa woossidosona.
5 Leeweti, Iyyasuy, Qadimi7eeli, Baani, Asabaani, Sarabi Hodi, Sabaninne Patahi, “Dendi eqidi, merinaape merinaa gakanaw de7iya Godaa hinte Xoossa galatite!”
“Iya boncho sunthaa anjite; galatapenne anjofe aadhiya iya sunthaa sabbite.”
6 Xoossaw, ne xalaali Godaa! Neeni salotanne dhoqa salotan de7iya medhetethata, sa7aanne iya bolla de7iya medhetethata, abbatanne enta giddon de7iya medhetethata ubbaa medhadasa. Ubbaas de7o immadasa; salo medhetethati new goyinnoosona.
7 Godaw, neeni Xoosse! Neeni Kaldaaweta biitta Uurepe Abrame doorada kessadasa. Iya sunthaa laammada Abrahaame gada sunthadasa.
8 I new ammanthiya asi gideysa be7ada, Kanaaneta, Hiteta, Amooreta, Parzeta, Yaabusetanne Gergeseta biitta iya kochaas laata biitta oothada immanaw iyaw caaqadasa. Neeni xillo gidiya gisho ne gida qaala poladasa.
9 Neeni nu mayzata Gibxe biittan gakida un7aa be7adasa; qassi Zo7o Abbaa matan de7ishe enti waassida waasuwa si7adasa.
10 Gibxe kawoy, iya shuumatinne he biitta asa ubbay Isra7eele asaa bolla otortida gisho enta bolla mallatanne malaalsiyabata oothadasa. Hessa oothada hachi gakanaw ne sunthay bonchon xeegetanaada oothadasa.
11 Abbaa shaakada ne asaa mela biittara pinthadasa. Shin shuchi ciimmo haathan holin, miteteysada enta goodiya morketa abban mitisada dhaysadasa.
12 Isra7eele asaa gallas shaara tuussan, qamma tama tuussan enta ogiya poo7isada kaalethadasa.
13 Neeni salope wodhada ne asaa Siina zuma bolla odisadasa. Suure pirdaanne tuma gidida higgiya, lo77o wogaanne kiita entaw immadasa.
14 Geeshsha ne Sambaata enti bonchana mela enta tamaarsadasa. Ne aylliya Muse baggara entaw kiita, wogaanne higge immadasa.
15 Enti koshatida wode salope kathi immadasa; qassi enti saamotida wode zaallafe haathe pultisadasa. Neeni entaw immana gada caaqida biitta enti gelidi laattana mela kiittadasa.
16 Shin nu mayzati otortidosona; si7onna ixidi new kiitetibookona.
17 Kiitetonna ixidosona; neeni entaw oothida malaalsiyaba ubbaa hassaybookona. Enti si7onna asi gididosona; banta geellatethan aylletethas Gibxe biitta guye kaalethana mela halaqa bantaw dooridosona. Gidoshin, neeni atto giya Xoossi, keehanne maariya Xoossi; siiqon kumidaysanne hanqos ellesonna Xoossi gidiya gisho enta aggabaaka.
18 Enti mara malan eeqa medhidi, “Hintena Gibxe biittafe kessida hinte xoossay haysa” yaagidi nena gita cashshe cayidosona.
19 Ne daro maarotethan neeni enta mela biittan aggabaaka. Enti biya ogiya poo7isana mela gallas shaara tuussan, qamma tama tuussan enta kaalethadasa.
20 Enta tamaarsana mela ne lo77o Ayyaana entaw immadasa. Maanaw manna, uyanaw haathe entaw immadasa.
21 Oytamu laythi kumethi mela biittan hemetiya wode entaw koshshiyabaape issibaaka pacisabaaka. Enta ma7oy wuribeenna; enta tohoy kixibeenna.
22 Ne enta kawotethatanne dereta hari attoshin haahon de7iya biittata xoonidi oykana mela oothadasa. Kawoy Sihooney haariya Haseboona biittanne kawoy Oogey haariya Baasane biitta entana laatisadasa.
23 Enta kochaa taybuwa salo xoolintoda darsadasa. Enta mayzatas immana gada caaqida biitta enta laatisadasa.
24 Enta nayti Kanaane biitta laattidosona. He biittan de7iya Kanaane asaa enta sinthan neeni kawushadasa. Enti Kanaane asaa bolla, enta kawota bollanne biittan de7iya asaa bolla dosidaba oothana mela enta kushen aatha immadasa.
25 Enti yuushoy gimbetida katamatanne aradda biitta xoonidi ekidosona. Lo77oba ubbay kumida keethata, booketida haatha ollata, woyne bessata, shamahonne hara ayfe ayfiya daro mithata laattidosona. Iyape midi kallidi ordidosona; ne gita keehatethan ufaytidosona.
26 Gidoshin, enti kiitetonna ixidi, ne bolla makallidosona; ne higgiya bolla zoko zaaridosona. Neeko simmanaada entaw minthidi odida ne nabeta wodhidosona. Daro iita cashshi nena cayidosona.
27 Hessa gisho, enta un7ethiya morketa kushen aatha immin, morketi enta un7ethida wode neeko waassidosona. Enta waasuwa salon gidada si7adasa; ne maarotethaa daruwan enta, enta morketa kushepe ashshiya asata kiittadasa.
28 Shin enti shempo demmi simmidi zaaridi ne sinthan nagara oothidosona. Ne zaarada enta morketa kushen aathada immin, enta morketi enta haaridosona. Shin ha77ika enti neeko waassin, enta waasuwa salon gidada si7adasa. Ne maarotethan enta zaara zaaradaka ashsha ekadasa.
29 Ne higgiyako enti simmana mela entaw minthada odadasa, shin enti otortidosona; new kiitetonna ixidosona. Asi kiitetidi de7o demmiya ne higgiya menthidosona. New zoko zaaridi si7onna ixidosona; kiitetonna ixidosona.
30 Gidikoka ne enta daro laythi danda7adasa; ne Ayyaanan nabeta baggara entaw odadasa, shin enti si7ibookona. Hessa gisho, shooro kawotethati enta haarana mela aatha immadasa.
31 Shin neeni keehanne maariya Xoossi gidiya gisho, ne gita maarotethan enta aggabaaka; burxora dhaysabaka.
32 Hiza nu Xoossaw, gitaw, wolqaamanne yayetida Xoossaw, ne merinaa siiqo caaquwa naageyso, beni Asoore kawotethaafe hachi gakanaw nu bolla, nu kawota bolla, nu halaqata bolla, nu kahineta bolla, nu nabeta bolla, nu mayzata bollanne ne asa ubbaa bolla gakida metoy ne sinthan laafaba daanopo.
33 Nuna gakidaba ubban neeni xillo. Nuuni nena naaqikoka ne ammanetetha aggabaaka.
34 Nu kawoti, nu halaqati, nu kahinetinne nu mayzati ne higgiya naagibookona. Qassi ne entaw immida kiitaanne naagisuwa si7ibookona.
35 Ne enta kawotethan entaw gita anjuwa immadasa; dalganne aradda biitta entaw immadasa. Shin enti nena goyinnibookona; banta iita oosuwape simmibokona.
36 “Hiza, hachi nuuni aylle gideysa be7a. Nu mayzati he biitte ayfiyanne iya immiya anjuwa ubbaa maana mela ne immida biittan nu hachi aylle gidida.
37 Nu nagaraa gisho, ne nu bolla denthida kawoti biittay immiya ayfiya ubbaa go77etoosona. Nu bollanne nu mehiya bolla banta koydaba oothosona; nuuni gita meto giddon de7oos” yaagidosona.
38 Hanidaba ubbaa gisho, nuuni haasayidi, he haasaya xaafidi qoncisanaw qofa qachida. Xaafetida xuufiya bolla nu halaqati, nu Leewetinne nu kahineti banta maatame wothidosona.