Yohaanisa Qoncethi
Gaatha Qofa
Yohaanisa qoncethay xaafetiday, ammaniya asay Yesuus Kiristoosa bantaw Goda oothidi, geeshshatethan de7ida gisho, metoynne waayey gakida wodena. Xaafey wudidi xeellida ayfe qofay, ammaniya asaa ufaysay kumethi gidana mela enta minthethidi, enta gakida goodanne metuwa giddon banta ammanuwan minnidi eqana mela denthethanaasa.
Maxaafan dariya kifiley daronne kaalli kaallidi yida qoncethata oykees. Ha qoncethati he wode de7iya asaas gelees, shin haratas xuura gididi gam7is. Enti odetidaynne qonciday leemiso odana. Ha maxaafan de7iya tayboti, maka miishetinne do7ati deretanne ayyaana medhetethata leemiso. Mazmure azmaachey simmi simmidi yexeteysada, ha maxaafan de7iya huuphe qofati dumma dumma qoncethata baggara dumma dumma ogen simmi simmi shiiqidosona. Ha maxaafa birshethas dumma dumma qofay de7ikoka, iyaw huuphe qofay qonce. Hessika, “Xoossay Godaa Kiristoosa baggara zaarethonna ogen ba morketa, Xalahera gujidi, issitohonne wursethi xoonana. He xoonuwape guye, iyaw ammanetidi de7ida ba asaa ooratha salonne ooratha sa7a anjo laatisana” yaagees.
Maxaafa Ayfe Qofata
Yohaanisa haasaya (1:1-8)
Yesuusi laapun woosa keethata giddon (1:9-20)
Laapun woosa keethatas xaafetida kiita (2:1—3:22)
Salon hanida goyinno qoncethaa (4:1-11)
Xaatha maxaafanne laapun maatameta (5:1—6:17)
Xoossa araata sinthan goyinno maara (7:1-17)
Laapun moyzeta (8:2—11:19)
Dawiyanne nam7u do7ata (12:1—13:18)
Dumma dumma qoncethata (14:1—15:8)
Laapun hanqo xuu7ata (16:1-21)
Babiloone kundethi, do7anne wordo nabe (17:1—20:10)
Wursetha pirda (20:11-15)
Ooratha salonne sa7a (21:1-8)
Ooratha Yerusalaame (21:9—22:5)
Kiristoosi simmidi yaana (22:6-21)
1
1 Eeson hananaw de7iyaba ba aylleta bessaana mela Xoossay iyaw immida Yesuus Kiristoosa qoncethay haysa. Yesuusi ba kiitanchuwa kiittidi, ba aylliya Yohaanisas qoncisis.
2 Yohaanisi Xoossaa kiitaa, Yesuus Kiristoosi oothidabaanne odidaba ubbaa markatis.
3 Ha ubbay hananaw wodey matida gisho, ha tinbite qaala nabbabiya oonika anjetidaysa; qassi ha qaala si7eysatinne xaafetida kiitaa naagiya ubbay anjetidaysata.
Woosa Keethatas Kiitetida Sarotho
4-5 Ha dabdaabey, Yohaanisape, Iise biittan de7iya laapun woosa keethatas xaafetis. Kaseka, ha77ika de7iya, sinthafeka yaanaw de7iya Xoossaafe, qassi iya araata sinthan de7iya laapun ayyaanatape, hessadaka, hayqope dendon koyro gididaysafe, sa7aa kawota haariya ammanetiya marka gidida Yesuus Kiristoosape, aadho keehatethaynne sarotethay hintew gido.
Yesuusi nuna siiqees, qassi ba suuthan nagara aylletethaafe nuna la77a kessis.
6 Nuuni Xoossaa iya Aawas oothana mela nuna kawotethaa kahine oothis. Iyaw merinaape merinaa gakanaw bonchoynne wolqay gido. Amin7i.
7 Heko, Yesuusi shaarara yees. Asa ubbay hari attoshin, iya caddida asayka iya be7ana. Sa7an de7iya asa ubbay iya gisho yeekana. Hessi tuma hanana! Amin7i.
8 “Kaseka, ha77ika de7eysi, sinthafeka yaana Goday, Ubbaafe Wolqaama Xoossay, Alfanne Omegi tana” yaagees Godaa Xoossay.
Godaa Qoncethi
9 Taani, Yohaanisi, hinte ishay, hintera issife Yesuusan waayiya, iya kawotethaanne iya danda7aa be7as. Taani Xoossaa qaala gishonne Yesuusaba markatida gisho, yuushoy abban teqetida biittan, Paximon de7ayis.
10 Godaa gallasan ta Geeshsha Ayyaanan haaretada de7ayis; taape guyera moyze puno mela gita girsi si7as.
11 He girsay tana, “Ne be7eysa maxaafan xaafada, Iisen de7iya laapun woosa keethatas, Efesoona, Samirneesa, Phargamoona, Tiyatiroona, Sardeesa, Filadelfiyanne Loodoqe yedda” yaagis.
12 Taani taw odiya girsaa be7anaw guye simmada xompe wothiya laapun worqa kocata be7as.
13 He kocata giddon asa na7a daaneysa be7as. I adussa afila ba tohuwa gathi ma7is, worqa dancon ba tiraa dancis.
14 Iya huupheynne iya binaanay bootha dorsa ikise mela woyko shacha mela boothi; iya ayfey tama laco daanees.
15 Iya tohoy taman seeridi zo77ida naase birata daanees; iya girsayka gita shaafa kooshincha mela.
16 I ba ushacha kushen laapun xoolintota oykis. Iya doonape nam7u baggara qaratida mashshay keyees. Iya som7oy seeta gallasa awa ayfe daanees.
17 Taani iya be7ida wode hayqida asada hanada iya tohuwa matan kundas. I ba ushacha kushiya ta bolla wothidi, “Yayyofa; Koyroynne Wursethay tana.
18 Taani de7on de7ayis; taani hayqas, shin Heko meri merinawuka de7on de7ayis. Hayqonne Si7oole qulpey ta kushena.
19 Hiza, ha77i haniyabanne sinthafe hananaba ne be7idaba xaafa.
20 Neeni ta ushacha kushen be7ida laapun xoolintotanne laapun worqa kocata birshethay haysa: Laapun xoolintoti laapun woosa keethata kiitanchota; laapun worqa kocati laapun woosa keethata.”