2
Efesoona Woosa Keethi
1 “Efesoona woosa keetha kiitanchuwas haysada yaagada xaafa.
Ba ushacha kushen laapun xoolintota oykidaysinne laapun worqa kocata giddora hemeteysi haysada yaagees:
2 Taani ne oosuwa, ne daaburanne ne gencaa erayis. Neeni iita asataba gencanaw danda7aboonaysa erayis. Qassi hawaare gidonashin bantana, hawaare geyisata pilga erada enti wordancho gideysa demmidaysa ta erayis.
3 Neeni gencadasa; ta sunthaa gisho meto danda7adasa; xoonetabaaka.
4 Gidoshin, ha77i ta nena boriyabay de7ees; hessika neeni, ne koyro siiquwa aggadasa.
5 Hiza, ne ay mela dhoqa bessaafe kundidaako akeeka! Ne nagaraape simma; neeni kase oothiya oosuwa ootha. Neeni ne nagaraape simmonna ixiko, ne xompe wothiya kocaa iya bessaafe ekana.
6 Ha77i ta nena nashshiya issibay de7ees; ta ixiya Niqolaweeta oosuwa neka ixadasa.
7 Geeshsha Ayyaanay woosa keethatas giyaba si7anaw haythi de7iya oonika si7o. Xooniya oonika Xoossaa gannatiyan de7iya de7o mithee ayfepe maana mela maata immana.”
Samirneesa Woosa Keethi
8 Samirneesa woosa keethaa kiitanchuwas haysada yaagada xaafa.
“Koyroynne wursethay, hayqidaysinne hayqope dendidaysi haysada yaagees:
9 Taani ne waayanne ne manqotetha erayis; gidoshin neeni dure. Ayhude gidonashin bantana Ayhude geysati cayiya cashshaa ta erayis, shin enti Xalahe maabaran de7oosona.
10 Neeni ekanaw de7iya waayiya babofa. Xalahey hintefe issota issota paacanaw qasho keethan yeggana; tammu gallas gakanaw hinte waayetana. Hayqana gakanaw ammanetidaysa gida; ta new de7o kallacha immana.”
11 “Geeshsha Ayyaanay woosa keethatas giyaba si7anaw haythi de7iya oonika si7o. Xooniya oonika nam7antho hayquwan qohetenna.”
Phargamoona Woosa Keethi
12 “Phargamoona woosa keethaa kiitanchuwas haysada yaagada xaafa.
Nam7u baggara qaratida mashshay de7eysi haysada yaagees:
13 Taani ne de7iya bessaa erayis; neeni Xalahe araatay de7iya bessan de7aasa; ta sunthaa mintha naagadasa. Hari attoshin, Xalahey de7iya hinte kataman hayqida ta ammanetida markay, Antiphaasi, de7iya wodeka ammanuwa aggabaaka.
14 Gidoshin, ta nena boriya guuthabati de7oosona. Hessika Isra7eele asay eeqas yarshetida kathaa midi tunana melanne laymatetha nagara oothana mela Balaaqa tamaarsida Balaama timirtiya ekida issi issi asati neera de7oosona.
15 Hessadaka, Niqolaweeta timirtiya tamaariya asati neera de7oosona.
16 Hessa gisho, neeni ne nagaraape simma. Hessi hanonna ixiko, ta neeko ellesa yada he asata ta doonape keyiya mashshan olana.”
17 Geeshsha Ayyaanay woosa keethatas giyaba si7anaw haythi de7iya oonika si7o. Xooniya oodeska qosetidi de7iya mannafe immana. Qassi ekiya uraape attishin, hara asi eronna ooratha sunthay xaafetida bootha shuchu taani iyaw immana.
Tiyatroona Woosa Keethi
18 “Tiyatiroona woosa keethaa kiitanchuwas haysada yaagada xaafa.
Tama laco daaniya ayfey de7eysi, qassi taman seerida naase birata daaniya tohoy de7eysi, Xoossaa na7ay, haysada yaagees:
19 Taani ne oosuwa, ne siiquwa, ne ammanuwa, ne oosuwanne ne gencaa erayis. Neeni koyro ootheysafe ha77i aathada ootheysaka erayis.
20 Gidoshin, ta nena boriya issibay de7ees; bana nabe giya maccasiw, Elzabeelo, aykoka gabaaka. He maccasiya eeqas yarshetida kathaa midi tunanaadanne laymatanaada oothada ta aylleta balethasu.
21 Iya ba nagaraape simmana mela ta iw wode immas, shin iya simmanaw koyabuku.
22 Enti I bala ogiyape simmonna ixiko, ta iyo iita hargen yeggana; iira laymateysatika iita waaye waayetana.
23 Taani I nayta wodhana; qassi woosa keetha ubbay ta asa qofanne asa wozana ereysa gideysa erana. Ta issuwas issuwas hinte oosuwada oosuwada immana.”
24 Shin Tiyatiroonan de7iya harata, he iita timirtiya ekiboonaysatanne, “Xalahe gita xuura” geetetiya ha timirtiya tamaariboonna hintena hara deexo tooho toossike.
25 Gidoshin, ta yaana gakanaw hintew de7iyaba minthi naagite.
26 Xooneysasinne wursethi gakanaw taw kiitetiya oodeska kawotethata haarana mela maata immana.
27 “I enta birata xam7an haarana;
meqa miishedaka mentherethana.”
He maatay taani ta aawape ekida maata mela.
28 Qassi ta iyaw bakala xoolinto immana.
29 Geeshsha Ayyaanay woosa keethatas giyaba si7iya haythi de7iya oonika si7o.