3
Sardeesa Woosa Keethi
1 “Sardeesa woosa keetha kiitanchuwas haysada yaagada xaafa.
Laapun Xoossaa ayyaanatanne laapun xoolintota oykidaysi haysada yaagees: Taani ne oosuwa erayis; asi nena paxa de7ees giikoka, ne hayqadasa.
2 Barka; attida guuthabanne hayqanaw matidaba mintha. Ne oosoy Xoossaa sinthan polo gidonnaysa demmas.
3 Hiza, ne ekidabaanne si7idaba akeeka; naaga; ne nagaraape simma. Neeni barkonna ixiko ta kaysoda yaana; ta ay wode yaaneko ne eraka.
4 Shin banta ma7uwa qitayonna guutha asati Sardeesan de7oosona. Entaw bessiyaba gidiya gisho bootha ma7o ma7idi enti taara hemetana.
5 Xooniya oonika entaysada bootha ma7o ma7ana. Taani iya sunthaa de7o maxaafape quchike. Taani ta Aawa sinthaninne iya kiitanchota sinthan I tabaa gideysa markatana.
6 Geeshsha Ayyaanay woosa keethatas giyaba si7iya haythi de7iya oonika si7o.
Filaadelfiya Woosa Keethi
7 “Filaadelfiya woosa keetha kiitanchuwas haysada yaagada xaafa.
Geeshshaynne tumanchoy, Dawita qulpiya ba kushen oykidaysi, haysada yaagees: I gordin oonika dooyanaw danda7enna; qassi I dooyin oonika gordanaw danda7enna.
8 Taani ne oosuwa eras; Heko ta ne sinthan oonika gordanaw danda7onna dooya penge wothas. Ne wolqay guutha gidikoka, ta qaala naagadasa; tana kaddabaaka.
9 Ayhude gidonashin, bantana Ayhude giya wordotanne Xalahe baggata neeko ehananne ne sinthan gulbatisana. Ta nena doseysa entana erisana.
10 Neeni, ‘Genca’ gada ta kiitida kiitaa naagida gisho, kumetha alamiya paacanaw yaa waaye wodiyape taani nena naagana.
11 Taani ellesada yaana; oonika ne kallachaa ekonna mela new de7iyaba minthada oyka.
12 Xoonidaysa ta xoossa keethan tuussu oothana; I yan merinaw daana. Taani ta Xoossaa sunthaanne ta Xoossaa katamaa sunthaa iya bolla xaafana; iyaka ta Xoossaa matape wodhiya ooratha Yerusalaame. Qassi taani ta ooratha sunthaaka I bolla xaafana.
13 Geeshsha Ayyaanay woosa keethatas giyaba si7iya haythi de7iya oonika si7o.
Loodoqe Woosa Keethi
14 “Loodoqe woosa keetha kiitanchuwas haysada yaagada xaafa.
Amin7i gidida ammanetida tuma markay, Xoossaa medhetetha haareysi haysada yaagees:
15 Taani ne oosuwa ubba erayis; neeni irxa woyko misha gidaka; neeni nam7aafe issuwa gidiko lo77o!
16 Neeni irxa woyko misha gidonashin, bol7o gidiya gisho ta nena ta doonape cuttana hanayis.
17 Hiza, neeni, ‘Taani dure, shallora de7ayis, taw aybibayka pacibeenna’ yaagasa. Shin neeni metootancho, manqo, qooqenne kallotida asi gideysa eraka.
18 Hessa gisho, ne duretanaw taman geeyida worqaa, ne yeella kalluwa kammanaw bootha ma7onne loytha xeellanaw danda7isiya ayfe dhale taape shammana mela nena ta zorayis.
19 Ta doseysa seeraysinne hanqayis; hiza minna; ne nagaraape simma.
20 Heko, ta karen eqada xeegayis. Oonika ta xeessaa si7idi, wulaa dooyiko, iyako gelana; iyara issife kathi maana; ika taara issife maana.
21 Ta xoonada ta Aawara iya araatan uttidaysada xooniday taara ta araatan uttana mela maata immana.
22 Geeshsha Ayyaanay woosa keethatas giyaba si7iya haythi de7ey oonika si7o” yaagis.