4
ಕ್ರಿಸ್ತಾಚ಼ ಸೇವಕ್
1 ಲೊಕ ಆಮಾನಾ ಕ್ರಿಸ್ತಾಚ಼ ಸೆವಕ್ ಮನ್ಹುನ್ ದೇವಾಚೆ ಗುಟಚ಼ ಖರ‍್ಯಾ ಆರ್ತಾಂಚೆ ಗುಸ್ಟಿತ್ ದೇವಾಚಾ ಗರ‍್ಹಾತ್ಲಾ ಸೇವಕ್ ಮನ್ಹುನ್ ಸಮ್‍ಜು಼ಂತ.
2 ಆಸ್‌ಲ್ಯಾ ಸೇವಕಾನಿ ಆಪ್‌ಲ್ಯಾ ದನ್ಯಾಲಾ ಇಸ್ವಾಸಾಚಾ಼ ವ್ಹವುನ್ ರಾಹ್ಯಾ ವ್ಹಯಿ.
3 ಮನಾತರಿ ತುಮ್ಚಿಪ್ನಿವ್ಹವುನಿ ನಾಹಿತ ಮಾನ್ಸಾನಿ ಕೆಲ್ಯಾಲಾ ಇಚಾರ್ ಮನಾ ಮೊಟಾ ನವ್ಹ. ಮಾಜಾ಼ ಮೀಸ್ ನ್ಯಾಯಿ ತಿರ್ಮಾನ್ ಕರುನ್ ಗಿಹಿತ್ನಾಹಿ.
4 ಮಾಜಿಪ ದೊಸ್ ಹಾ ಮನ್ಹುನ್ ಮಾಜಾ ಮನಾಲಾ ದಿಸತ್ನಾಹಿತರಿ ಮೀ ದೊಸ್ ನಸ್ನಾರಾ ಮನ್ಹುನ್ ಥರ್ವಿಸಾನಾಹಿ. ಮಾಜಾ಼ ನ್ಯಾಯಿ ತಿರ್ಮಾನ್ ಕರ್ನಾರಾ ಪ್ರಭು ಯಕ್ಲಾಸ್.
5 ಮನ್ಹುನ್ ಪ್ರಭು ಯಯಾಚಾ ಯಳಾಚೆ ಆಂದಿ ಕಶಾಚಾ಼ ನ್ಯಾಯಿ ತಿರ್ಮಾನ್ ಕರುನಕೊಸಾ. ತ್ಯೊ ಆಂದಾರಾತ್ ಆಸಲ್ಯಾಲಿ ಕಾಮ ಉಜಿಡಾಸ್ ಆನ್ನಾರ್. ಮನಾತ್ಲಿ ಯವಜ಼್ನಾ ಉಗಡ್ನಾರ್. ತವಾ ಪರತೆಕಾಲಾ ಯನಾರಿ ಮರ‍್ಯಾದ್ ದೇವಾಪ್ನಿ ಗಾವ್ನಾರ್.
6 ಬನ್ಹಿ ಬಾವ್ಹಾನು, ಮೀ ತುಮ್ಚಿಸಾಟಿ ಮನಾಬಿ ಅಪೊಲೊಸಲಾಬಿ ಹೇ ನೇಮ್ ಸಗ್ಳ ಸಮ್‍ಜು಼ನ್ ಸಾಂಗ್‌ಲ್ಯಾತ. ಮನ್ಹುನ್ ತುಮಿ “ದರ್ಮಶಾಸ್ತಾರಾತ್ ಲಿವಲ್ಯಾಲ ವಲ್ಯಾಂಡುನ್ ಜಾ಼ಯಾಚ಼ನಾಹಿ,” ಮಂತ್ಯಾಲ್ಯಾ ಹ್ಯಾ ವಾಕ್ಯಾಚಾ಼ ಆರ್ತ ತುಮ್ಚಿಪ್ನಿ ಶಿಕುನ್, ತುಮ್ಚಿಪ್ಲಾ ಕೊನ್ತರಿ ಯಕಾಲಾ ಇರೊದ್ ಕರುನ ಆನಿ ಯಕಾಪ ಜಾ಼ವುನ್ ಗರ್ವಿ ಕರುನಾಹಿ.
7 ತುಲಾ ಸಗಳ್ಯಾಂಚಿವ್ನಿ ಮೊಟಾ ಕೆಲ್ಯಾಲಾ ಕುನಿ? ದೇವಾಪ್ನಿ ಗೆತಲ್ಯಾನಸಲ್ಯಾಲ ತುಜಿಪ ಯಾಕ್ತರಿ ಹಾಕ್ಯಾ? ಗೆತಲ್ಯಾನಂತರ್ ಗೆತಲ್ಯಾನಸಲ್ಯಾಚೆಗತ್ ಕಾ ಬಡಾಯಿ ಕರತೊಸ್?
8 ಯವ್ಡೆ ಬಿಗಿ ತುಮಿ ತ್ರಪ್ತಜಾ಼ಲಾಸಾ!. ಯವ್ಡೆ ಬಿಗಿ ಸಾವ್ಕಾರ್ ಜಾ಼ಲ್ಯಾಸಾ. ಆಮ್ಚಿ ಮಜ಼ತ್ನಸ್ತಾನಾ ರಾಜಾಂಚೆಗತ್ ಜಾ಼ಲಾಸಾ!. ತುಮಿ ಖರ‍್ಯಾನಿ ರಾಜ್ಬಾರ‍್ಕರತ್ಯಾಲಿ ಆಸ್ಥಾಸಾತ ಮನಾ ಸಮಾದಾನ್‍ ಜಾ಼ಲಾ ಆಸ್ಥಾ!. ತವಾ ಆಮಿಸಾಹಿತ್ ತುಮ್ಚಿಸಂಗ ರಾಜ್‍ ಚಾ಼ಲ್ವಿತಾವ್!.
9 ತಸವ್ಹಯಾಚೆಆಂದಿ ದೇವಾನಿ ಆಪೊಸ್ತಲ್ ಜಾ಼ಲ್ಯಾಲ್ಯಾ ಆಮಾನಾ ಮರ್ನಾಚಾ಼ ತಿರ್ಮಾನ್ ಜಾ಼ಲ್ಯಾಚೆಗತ್ ದ್ಯಾವಲ್ಯಾ ಮನ್ಹುನ್ ಮನಾ ವಾಟ್ಯಾ. ಆಮಿ ದುನೆತ್ ದೇವ್ದುತಾನಾ, ಮಾನ್ಸಾನಾ ದುನೆಲಾಸಗಳೆ ಹಾಸಾಯಾ ಜಾ಼ಲಾವ್.
10 ಆಮಿತರಿ ಕ್ರಿಸ್ತಾಸಾಟಿ ಖುಳಜಾ಼ಲ್ಯಾವ್. ತುಮಿ ಕ್ರಿಸ್ತಾಪ್ನಿ ಶಾನಜಾ಼ಲ್ಯಾಸಾ. ಆಮಿ ಬಳ್‍ಮೊಡ, ತುಮಿ ಬಳಿ, ತುಮಿ ಮರೆದಿಚ಼, ಆಮಿ ನಿಂದದಾರ್.
11 ಹೆ ಯಳಪರ‍್ಯಾತ್ ಆಮಿ ಬುಖಚ಼, ತಾನಚ಼, ಕಪ್ಡನಸ್ನಾರ, ಮಾರ್ಖಾನಾರ, ಗರ್ಹನಸ್ನಾರ,
12 ಆಮಿ ಸ್ವತಾ ಕಾಮ್ ಕರುನ್ ಪ್ವಾಟ್ ಬರ್‌ತ್ಯಾಲ ಜಾ಼ಲ್ಯಾವ. ಸರಾಪತ್ಯಾಲ್ಯಾನಾ ಆಶೀರ್ವಾದ್ ಕರ್ತಾವ್. ಲೊಕ ಜಾ಼ಚ಼್ ಕರ್ತಾನಾ ಸುಸ್ವುನ್ ಗೆಥಾವ್.
13 ಚು಼ಕ್ ವಾವ್‍ತ್ಯಾಲ್ಯಾನಾ ಮಾಯೆನಿ ಬುಲಿವ್ತಾವ್. ಆಮಿ ಆಜು಼ನ್ಪರ‍್ಯಾತ್ ದುನೆಚಾ಼ ಕ್ಯೊರ್ ಸಗಳ್ಯಾವ್ನಿ ಖಾಲ್‍ ಮಂತ್ಯಾಚೆಗತ್ ಜಾ಼ಲ್ಯಾವ್.
14 ತುಮಾನಾ ಲಾಜ಼್ ವಾಟಾಯಾಸಾಟಿ ನವ್ಹ ಮಾಜೆ ಮಾಯೆಚಿ ಪೊರ ಮನ್ಹುನ್ ಸಮಜು಼ನ್ ತುಮಾನಾ ಶಾನ್ಪನ್ ಸಾಂಗಾಯಾಸಾಟಿ ಹೆ ಸಬಾತ್ ಲಿವಲ್ಯಾತ.
15 ತುಮಾನಾ ಕ್ರಿಸ್ತಾಪ ಸಿಕಿವ್ನಾರ ಧಾಹಾಜಾ಼ರ್ ಜಾ಼ನ್ ಆಸ್ಲತರಿ ಬಾಸ ಖುಬ್ ಜಾ಼ನ್ ನಾಹಿತ ಮೀಸ್ ತುಮಾನಾ ಬರೆಖಬರಿನಿ ಕ್ರಿಸ್ತ ಯೆಸುಪ್ನಿ ಗೆತಲ್ಯಾಲಾ ಆತ್ಮಿಕ್ ಬಾ ಜ಼ಾಲ್ಯೊ.
16 ಮನ್ಹುನ್ ಮಾಜಿಗತ್ ಚಾ಼ಲಾ ಮನ್ಹುನ್ ತುಮಾನಾ ಸಾಂಗ್ತೊ.
17 ಹ್ಯಾ ಕಾರ್ನಾಸ್ಲಾಗುನ್ ಪ್ರಭುಪ ಮಾಜೆ ಮಾಯೆಚಾ಼ ಆನಿ ಇಸ್ವಾಸಾಚಾ಼ ಲ್ಯೊಕ್ ಜಾ಼ಲ್ಯಾಲ್ಯಾ ತಿಮೊತ್ಯಾಲಾ ತುಮ್ಚಿಪ ಲಾವುನ್ದಿಲ್ಯಾ. ಮೀ ಪರ್ತೆಕ್ ಸಬೆತ್, ಕುಠಬಿ ಸಾಂಗತ್ಯಾಶಾರ್ಕ ಕ್ರಿಸ್ತಾಪ ಆಸ್‍ಲ್ಯಾಲಿ ಮಾಜಿ ಚಾ಼ಲ್ನುಕ್ ತ್ಯೊ ತುಮಾನಾ ಯಾದ್ ಕರ್ನಾರ್.
18 ತಮ್ಚಾತ್ ಥುಡಿಜ಼ನ ಪೌಲ್ ಆಮ್ಚಿಪ ಯಯಿತ್ನಾಹಿ ಮನ್ಹುನ್ ಸಮಜ಼ುನ್ ಬಡಾಯಿಕರತ್ಯಾತ.
19 ಫನ್ ದೇವಾಚ಼ ಚಿತ್‍ಜಾ಼ಲ್ಯಾವ ಮೀ ಬಿಗಿನಿ ತುಮ್ಚಿಪ ಯವುನ್ ಬಡಾಯಿ ಕರ್ತ್ಯಾಲ್ಯಾಂಚ಼ ಸಬಾತ್ ತ್ಯವ್ಡಸ್ನವ್ಹ ತ್ಯಂಚ಼ ಬಳ್ ಮಿ ಬಗ್ತೊ.
20 ಕಾ ಮಂಜೆ ದೇವಾಚ಼ ರಾಜೆ ಸಬ್ದಾವ ನವ್ಹ ಬಳಾವ ಹಾ.
21 ತುಮ್ಚ಼ ಮನ್ ಕ್ಯಾ? ಯತ್ತಾಟಿಗಿಹುನ್ ತುಮ್ಚಿಪ ಯವು ಕ್ಯಾ? ಮಾಯೆನಿ ಥಂಡ್ಮನಾನಿ ಜಾ಼ಲ್ಯಾಲಾ ವ್ಹವುನ್ ಯವು ಕ್ಯಾ?