4
Na Mane
1 Na vanga rerei dou nomoa na rereimu igoe niqu udu;
me mamauriga manana nomoa na matamu i murina na polo o tsavuginia na ngoramu.
Ma na ivumu ara gavai vaga moa na alaala na naniqoti
ara tsipu lekaleka tsuna tana tetena ni Gilead.
2 Migira na livomu ara sere maka vaga moa na sipi
ara vasini moa putsia na ivuqira mara tsagi malegira.
Me tau goto nanga sa vidaqira;
ara totu dou sui saikesa.
3 Ma na tutubena mangamu ara ka tsitsi dou vaga moa na polo tsitsi marara;
mara ka rerei dou rago kalina igoe o goko.
Ma na ngoramu e maka dou saikesa i murina na polo o tsavuginia na matamu.
4 Ma na liomu e rereidou vaga moa nina kusudato a David,
kolua gamu liolio vaga moa ti kesa na toga gaqira tako na mane vaumate ara tsauragini polia na liomu.
5 Ma na tsutsumu kaira ara ka vaga moa ruka na dia batso
ara ka mutsamutsa i laoqira na vulevule.
6 Igoe o vaga kesa na vungavunga i tana ara totu danga na bulunagai sisigini dou.
Mi tana inau sauba kau ba totu poi tsau kalina ke votumai na unikô
me ke nanga lê na rodona na bongi.
7 !Na vanga rerei dou nomoa na rereimu igoe niqu udu;
me tagara goto sa tuputupu bau tana kokoramu!
8 Igoe niqu aneane galugaluve ko dulikoluau,
mi kaita ka tsuna tania na Vungavunga Lebanon.
Ko tsuna mai tû i kelana na Vungavunga Amana,
ma na Vungavunga Senir ma na Vungavunga Hermon,
i tana ara totu igira na laeone ma na kusi atsi.
9 Niqu udu galugaluve o resea na kosuqu.
Mi kalina au reia na matamu
ma na liolio o sagelia
me sekolia na papadaqu.
10 Nimu galuve e naua mau gini mage loki sosongo,
igoe na kosuqu popono ma na tauqu.
Ma nimu galuve e dou liusia bâ na uaeni;
ma nimu sede e sigini dou liusigira bâ pipi na papasa sisigini dou.
11 Niqu udu galugaluve,
nimu goko e rorongo dou sosongo vaniau,
vaga moa na puina na bulumitsua
ma na tsetserena na miliki tana mangaqu;
ma na polomu ara sigini dou vaga moa na siginina na gai ni Lebanon.
12 Igoe na kosuqu popono ma niqu aneane,
igoe o vaga kesa na uta ara barapoliginia na vatu me totu totongo,
me kesa na vuravura tabu e totu i laona.
13-14 Mi tana ara dato magobu dou na gai tsukatsuka sui.
Visana na gai e gani dou na vuaqira,
mara visana ara sigini dou.
Visana ara aqosiginia na sede sisigini dou,
mara visana ara tsonia tana mutsa me gini pui dou.
Visana ara aqosiginia na inilau mamarega levolevo,
mara visana ara aqosiginia na bulunagai uruuru,
me danga goto na vatana na ko sisigini dou.
15 Igoe o vaga na vuravura na kô e lesoviginia na uta,
ma na okookona na ko tatave,
ma na masarina na kô e tsuna bâ tana Vungavunga ni Lebanon.
Na Daki
16 Ko mamata igoe na Guguri ni Vava.
Migoe na Guguri ni Ata ko liuvia niqu uta;
me ke gini tavosa bamai na vuruna dou niqu uta.
Tamivania niqu udu ke mai tana nina uta
me ke gania gana vuana gai puipui dou bâ.