5
Na Mane
1 Igoe na kosuqu popono ma niqu aneane,
inau au sage bâ nogo i laona niqu uta.
Au angunikolugira nogo niqu omea sisingini dou;
mau gania gaqu bulumitsua,
mau inuvia gaqu uaeni ma gaqu miliki.
Na Alaala na Daki
Eo, kagamu gamu udu kamu ka mutsa ma kamu ka inu,
poi tsau kalina kamu ka masu dou.
Na Vatinina Linge
Na Daki
2 Mi kalina au maturu, ma na kosuqu e mamata moa.
Mau bolea laka niqu udu e mai kidikidi i matsapa.
Na Mane
Niqu udu, igoe na kosuqu popono, ma niqu kulukulu,
ko sangavi vaniau na matsapa ma kau sage bâ.
Na lovaqu e porisinogoa na kolobu,
ma na lavo e tsavu poponoa na ivuqu.
Na Daki
3 Inau au tsoraliginogoa na poloqu,
?Ma na rongona gua kau sagelitugua?
Inau au vulimalenogoa na tuaqu.
?Ma na rongona gua ti kau bausitugua?
4 Niqu udu e tatangomai tana matsapa,
me gini pidi na kosuqu rongona aia e mai varangi nogo.
5 Mau tû laka kau ba sangavi vania na matsapa me ke sagemai.
Ma na sede tana limaqu e porisia na tatangolina na matsapa.
6 Mau sangavia na matsapa vania niqu udu,
maia e vano kiki nogo.
Mau padavisua moa nina goko, me gini seko na tobaqu.
Mau lave bamaia, mau tau goto ba tsodoa;
mau soâ, maia e tau goto kiki gokovisu vaniau.
7 Migira na mane matali baravatu ara tsodoau kalina ara liu polia na verabau;
mara tangoliau mara labu bokaliau;
mara tsoraligia na poloqu tsavugotu.
8 Igamu na daki ni Jerusalem, kamu veke vaniau
laka ti vaga kamu tsodoa niqu udu
me sauba kamu tsarivania laka au gini maluku sosongo na padangaoana.
Na Alaala na Daki
9 Igoe o uluvao laka liusigira na daki sui.
?Ko tsarivanigami laka nagua e tavosi i konina nimu udu tanigira na mane sui tavosi?
?Ma nagua e gini tavosi i konina aia te o ngaoa igami kami veke vanigo vaga ia?
Na Daki
10 E uluvao laka na rereina niqu udu me susuliga;
aia e dou liuliu bâ i laoqira na sangavulu na toga.
11 Ma na ngorana e madao dou me angaanga vaga moa na qolumila;
me sasala dou mate na ivuna,
me bau vaga moa na ivuna na kaokao.
12 Mi kaira na matana ara ka maka dou vaga moa na ivuna na kulukulu e leso sui me tutû tana liligina ko tatave.
13 Ma na ngolana e vaga moa na uta i tana ara totu danga na omea sisigini dou.
Ma na mangana e vaga moa na vulevule,
ma na mamagona e sigini dou vaga moa na sede.
14 Mi kaira na limana ara ka patsotso dou,
me moloa tana kakauna na ringi e totu na vatu angaanga i laona,
ma na konina e madao dou vaga moa na livona na elepani
ara baruginia na vatu bora angaanga loki matena.
15 Mi kaira na kakabana ara vaga moa ruka na tuguru ara aqosiginia na vatu sere,
mara ka tukae bâ tana tuguta qolumila.
Me rerei dou sosongo vaga moa na Vungavunga ni Lebanon,
kolugira nina gai na sida katsi.
16 Me tangi dou rago nomoa nina goko
me pipi na omea i konina au reingao sosongolia inau.
Maia saikesa nogo na rereina niqu udu galugaluve,
igamu na daki ni Jerusalem.