6
Igira na Alaala na Daki
1 Igoe o uluvao laka liusigira na daki sui.
?Laka iava vaga e vano nimu udu?
Ko tsarivanigami iava tana e liu bâ nimu udu,
migami kami sangago na laveana.
Na Daki
2 Niqu udu e vano nogo tana nina uta,
i tana ara dato na gai sisigini dou.
Mi laona nogo nina uta aia e ba palagira nina sipi,
me angunikolugira na vulevule.
3 Aia niqu mane nogo inau, minau nina daki nogo aia.
I levugaqira na vulevule aia e palagira nina sipi.
Na Tsegenina Linge
Na Mane
4 Niqu udu igoe o rereidou sosongo vaga moa na verabau ni Tirsa,
mo uluvao laka vaga moa na Jerusalem,
mi kalina au morosigo igoe e datokesa na mamagoqu
vaga moa ti kalina au morosia kesa na omea rereidou sosongo liuliu bâ.
5 Ko moroligi taniau igoe
rongona na matamu ara bulesiau.
Na ivumu ara gavai vaga moa na alaala na naniqoti
ara tsipu lekaleka tsuna tana tetena ni Gilead.
6 Migira na livomu ara sere maka vaga moa na alaala na sipi
ara vasini moa tsagi malegira.
me tau goto nanga sa vidaqira;
mara totu dou sui saikesa.
7 Ma na ngoramu e maka dou rago i murina na polo o tsavuginia na matamu.
8 E dou moa ti vaga na taovia tsapakae ke tamanigira kara ono sangavulu na savana daki taovia,
ma kara alu sangavulu na savana lê,
me ke utu na tsokoraeaqira nina daki vaolu.
9 Minau, e kesa lelê moa na daki au galuve sosongolia,
maia e uluvao laka vaga moa na kulukulu.
Maia segeni lelê moa ngiti dalena daki na tinana
maia e padaloki sosongolia bâ liusigira na dalena mane.
Migira sui na daki vaolu ara morosia mara tsonikaea;
migira goto na daki taovia ma na savana lê na taovia tsapakae ara tsonikaea.
10 ?Asei vaga aia e maka vaga na marara tana matsaraka?
Aia e uluvao laka me maka dou sosongo na matana,
me toratora vaga moa na aso se na vula,
me gini datokesa na mamagoqu kalina au reia.
11 Minau au liu tsunamai i laoqira nogo na gai na gatsoga
na reiaqira na omea tsukatsuka vaolu i laona na poi,
ma na morosiana na rauqira vaolu na itai na uaeni,
ma na latseqira na gai mutsamutsa.
12 Ma na padaana niqu udu e dato susuliga i tobaqu inau
me naua mau gini pada laka au loki liuliu bâ i laoqira niqu tinoni.
Na Alaala na Daki
13 Baka daki ni Sulam ko visumai, ko visumai,
ma kami morosigo.
Na Daki
?Na rongona gua ti amu ngaoa laka kamu morosiau inau
vaga moa ti au gavai i mataqira na tinoni?