3 San Juan
1
Gayoimburab tab waminchib
1 Na, Tiusweimburabelan pera marøb pasrabig, nai tab linchibig Gayon pørar, newan ciertonigu na undaaraigwan.
2 Nai undaaraig, nabe ñuyasig Tiuswan miappe, ñui møsig Tiusweimburab tab køb lataitøwei, chiyutøgucha tab pub attraimba, katø ñui asrugucha kwanrrø kømø, tab unamig kønrraimba miabig kur.
3 Nabe truba truba kasraarar møiløgøsrøn namui nunelø amrrua, tru newan ciertonig maig køben ñibe truyutø pasrab, katø treegutø ñi maig unigwan nan eshkaben.
4 Tru newan ciertonig maig køben, nai ureemera treeg amønan taig wammøramibe, katøgan chi peg wammøri lataitøguen kømø, purø nu tab køtan.
5 Nai undaaraig, namui nunelan ñi tabig purugub pasraibe, ñi purø tabig marig køn, ñuimbe asiimeelø kuingucha katøguchinguen tabig marøb.
6 Truiløbe iglesiayuelai merrab ñi treeg undaguig køn cha wamindan. Ñi nømui ambamigwan ambub amrrai puruguabe, Tiuswan kasrag kømdiig kønrrai, tabig martrabguen.
7 Kaguende nømbe Jesucristoi munchin undag køb webambamig køn, Tiuswan ashmø misaamerane chigucha chi purugúig utømø.
8 Inchawei treekkurri nambe treeg marøb møguelane purugub asamig nebunrrun, Tiuswei tru newan ciertonigweimburab namgucha purugúig kørrømisrtrai.
Diótrefes søl marmø kaig marøb
9 Nabe iglesian kan kilga pørig kuig køn. Inchendø Diótrefesbe na karuilan mørmíig køn, kaguende nømui utu chiyutøgucha ke nø karub pasrønrrab inchibig kua.
10 Inchawei treekkurri nabe ippe, nø chi mariilan ñim isunrrai wamindamønrrun, tru nø namun isa wamincha wam kusruigwan. Incha trutø kømøtø, nøbe nunelan utømøwei, katø utønrrab inchibelan meramba, iglesiayugurri webetamba inchibig køn.
11 Nai undaaraig, kaig mariilan asha marmøtø, tabigwan asha mar. Tabig marøbiibe Tiuswein køn. Inchen kaig marøbiibe Tiuswane ashmíig køn.
12 Mayeeløba Demetrioimburappe tabig waminchibelø køn. Tiuswei tru newan ciertoniitøweinguen nune treeg marøbig køn cha eshkan. Inchen namgucha truigweimburappe ‘treegwein køn’ chib eshkab waminder. Inchen nam ‘treeg køn’ cha wamindiibe, isa kømø trendaig kuig ñibe ashibig køn.
Srabe wamindiilø
13 Nabe ñun eshkamig truba truba tøgagøbendø kilgayu tintatøga pørøg kømøtan.
14-15 Nabe maya yanayutø ñun ashchab attrab isur malaugue waminchab.
Chi isumgaig tab købiibe ñiba pasrønrrai isur. Tru tab lincha amøñibeløbe ñune ‘ka uñgu’ tan. Katø ñigucha namui asiilan kanun kanun nømunashib treetøweih chirrunrrig.