San Judas
1
Na Judas, Santiagoi nuneg, Jesucristoi marøb megabiibe Tius Møskai wamiilø undaarailan, Jesucristobe chi kømønrrai ashib tøga pasrailan na pørar. Purø lastima asigwanba, chi isumgaig tab købigwanba, undag købigwanba ñim uncha tøgagønrraimab isur.
Isa peetø kusrenanøbelø
Nai undaarailø, ñim lata, na lata kanguelarrøtø tru nam kaigyugurri wesraig pønrraigweimburab ñimun pørtrab truba truba isuig kuig køn. Inchendø truburab pørmøtø, ‘øyeeg, øyeeg melay’ chib waminchib pøramig truba palai ashar, tru Tiuswei misaameran Tiuswei tru tabig srø wamwan Jesucristoimburab managatigweyasig treetø kønrrai kanmaytø tranig købigwane mur tranrrab pønrrai chinrrab. Kaguende møiløgøben mu ashmøwatø ñimui utu nilø kebambin køn. Truiløbe kaigyu pønrramig kønrrai manasrøwei treeg mariilø købig køn. Tru Tiuswan ashmeelø kaig møgueløbe namui Tiuswei ka yandø tab indigwane nømun maig marøg køben maramigweyasig merrarrawa tøgagøn. Katø, tru nøtø kandø Mayeelaim Pala Pasrabig, namui Señor Jesucristone nømbe ‘ashmeelø ker’ chibelø køn.
Ñimbe yandø ashibelø kuindøgucha, nabe katø isungarunrrab inchar, Israel misaameranma Egipto piraugurri Señorbe wesrappe, wesrabendø, wendøsrømbe nun tru køremeelane pinisaig købigwan. Katø ángelesmeran chigucha nømune srøsrø chiyu pønrrønrrai pønsrøben, truyutø pønrrømøtø, trunun elachippa, tarømisrøbelane purø trømbø løstiigu pønrrønrrai Tiusbe managatig cadenastøga merrarrawa pønsraig køn, tru maig maramigwan asha maramig purø nu kwalømweyasig. Katø Sodoma misaameraba, Gomorra misaameraba, tru puluwan ciudameraba treetøwei, ishumburba, møgueløba trømbøig kaig marøb, katø møgueløbe nøm møgueløasiyaitø trømbøig marøb kømig, trutø srua ambiilan managuen kwamø nagu møra melønrrai kebeta, pønsraig køn, trunun katøganelø isua asha kømig kønrrai.
Katø øyeeg købenguen tru møguelø piaig lataigutø amøñibeløbe nømui asrwan kaig kønrrai marøb, katø ashib karub purrabelane mørmø, kaashib, katø tru srømbalasreelø truba nørreelanguen tsalø wamab inchibelø køn. Trune tru arcángel Miguel købenguen, tru nugwaimandziiba Moiséswei asr cha aleguiyab kua, truikken tsalø wamab kaig nebubash chinrrab inchimøtø: “Øyeebe maramig kømøn chib, Señor ñun namubash” cha. Trutøh taig købig køn. 10 Trune tru i møgueløbe nøm chigúinguen mørmubendø, tsalø wamabelø køn. Nømun tre lataig asønaigutø nøm chigúi mørigwane, animalmera chugúi mørmeelø lataig trømbøig marøbelø køn, nømasiitø minchib treramig.
11 ¡Ay, nømuimbe maig kønrrerah! Kaguende nømbe Caínwei maywan merrarrawa amban. Nømbe an kanag købiitø Balaam kebeninuutøwei kegørra, katø mørmuikkurri Coréwan pinisailø lataitøwei pinisailø køn. 12 Ñim Tiuswei undag købigwan tøga kasraatø lincha mab waramig tøgagúiløyube, nømbe ke ka trømbøig mindishibelø treelø køn. Nømbe chigucha kørikkar ka nømuimburab øska mab, øska muchibashtø inchibelø. Nømbe wañimera chi pigarwan ambumay imay isig srua ambig latailø køn. Katø mamig nigamig puben, niimø tusrmera latailø, srølbañau kitiilø, pamay kwailø køn. 13 Nømbe maryu pi welarmera namig latøgushib kurrab arrubigu, kan pichall weguchib latailø køn, tru nømui trømbøig ashikken kønrrabgaig mariiløbe. Estrellasmera nømui ambamwan kømø, pella ambub latailø køn. Truilaimbe purø trømbøig løstøyu managatig pønrrønrrai pønsramig tamariilø pønrran.
14 Adánweinukkurrimbunø misaamera srøig, srøig kurrab arrubig siete nemisren arrubig tru Enockucha, tru i kaig misagweimburab manawei trencha eshkawa pasrig købig køn: “Au, Señorbe nui tarømari ángelesmeran purø nørrø søtø peraig arrun cha, 15 maya misaameran maig kønrrabigwan asha marøb, nøm chu pønrramigwan pønrrønrrai pønsrønrrab, tru larrø kailane nøm kailø kuimaytø larrø kaig mariilan mundøgucha treeg martrab. Katø tru larrø kailø chigurrimbunø mørøbguen møram kaig wamindi wammeratøga nun waminchibelan treeg kørrømartrappa arrun taig køn.” 16 Nømbe chiwandøgucha kaig køtangøba chib, chiwandøgucha søl marmø, kalø marangøba chib waminchibelø køn, nømui kaig isuilø maig køben, nømbe treeg amøñibelø kua. Katø nømui triitøgabe nømasiitø purø nørreelø misrøb wamindamba, katøganelane truba tabzhig misrøb wamindamba inchibelø køn, nømuyasig chigøben tøgagug købiitø.
Tiuswei misaameran isuatø amøñinrrai waminchib
17 Trune ñim, nai undaarailøbe, namui Señor Jesucristo nøashib karua øriilø merrabsrøwei wamindigwan isua kuy. 18 Kaguende truiløbe ñimune øyeeg taig købig køn: “Yandø srabe kwalømmerawane misaamera tabigwane ke ka indzatø mørøbelø, nømun maig amøñig køben treeg trømbøig marøb amøñibelø kønrrun” taigwan. 19 Iiløwein køn, tru misaameran ka nøørøtø marøb pirisha pønsrøbelø. Nømbe nømui asr maig palai inchen, treeg marøbelø, Tiuswei Espíritune chigar køn.
20 Trune ñim, nai undaarailøbe, ñimui isubig newan chishchig Tiusweinuutø tøga pønrraigu katøguchinguen nørrørab ambay, Espíritu Santo maig wamindingaruben trumay Tiusba waminchib. 21 Ñimbe Tiuswei undag købigutø amøñippe, truyutø amønay, namui Señor Jesucristoi lastima asiitøga managatig øsig kømigwan tranrraitamab isua muniirab.
22 Møiløgøben treeg kuitamab isumba, katø treeg kømuitamab isumba inchibelane ñimbe lastima tøgaguy. 23 Katøganelane nagugurri wesruy, trumay kaigyugurri wesrub. Inchen katøganelane lastima tøgagømig køn. Inchendø purø ashiptø maray, trømbøig marøg købigu nøm trømbøig mariiløtøga chillig inchib kewa llirab pønrrailanguen ashikken kømui inchib.
Tiuswan tabig wamindiilø srabeig
24 Tru ñim kaigyu kørrømønrrai asamig maramburab maramig tøgaig, katø truba truba kasrag nui tørguegwalmabiisrø chigucha chi tamgailø chishchig ñim kemalla pønrramig kønrrai tøga pasrabig, 25 Tius kandø wabig, namun Kaigyugurri Wesrabigwan namui Señor Jesucristogurri tørguegwalmabiiba, purø nuig muguen nebua isumgaiba, mayeelaim pala asamburab ashib pasraiba, mugucha manchinrraingaig karuiba, iilan nuin kønrrai inder, manasrøngurri, møiya lata, katø managatig. Treeg kønrrun.