39
Bu Ngad Bininj Karridarrkid Bu Djal Kundedjumbung.
1 Ngayemandeleng ngamarneyimerren, “Ngaye nganahnarren, dja ngabawon bu ngawokdikenh kunwok kunwarre. Ngaye yiman ngarrangkarrmerren bu ngarrihdjarrkdi nawu birriwarre bininj.” Kuhni ngayime kore kunkangebeh.
2 Bu ngadjaldi wokyak, minj njale ngayime. Minj ngawokdiwirrinj, kore kunwok kunwarre, dja mak kunmakkenh. Djal burrkyak, bonj, ngaye ngadjalnjilngwarre.
3 Kaluk ngadjalkangewurlhmeng. Wanjh ngayeman ngawokdanginj kunwok ngardduk.
4 Ngaye marneyime, “Ngudda nawu Yawey, ngadjare kanbukkan kore baleh kabolkyimerranj bu ngaye ngayakmen ngarrowen. Ngaye baleh kayimerranj bu mandjewk ngardduk? Kanbukkan ba ngawernhburrbun nawu ngad bininj wanjh woybukkih minj kunkuyeng ngarridarrkiddi.
5 Ngudda kanmarnbom ngaye yiman djal yeng. Ngarranginj, dja mak werrk bu ngayakmen. Ngudda nawu yibenwon bininj rowk kunngolek ke, wanjh bonj. Bedda kabirridjalngolekngurdme bu kabirridarrkid kundedjumbungkenh.
6 Ngad nawu bininj, yiman kunwoyik. Ngarridjalwohre kore baleh ngarrire, bu burudjang. Nawu ngarrihmang njalenjale, dja ngarriburrbun bu ngarrbenmarnebawon nawu nangale bu kamang.”
7 “Ngudda nawu Kanmarnewohrnan, bolkkime ngaye ngadjawarren. Wanjh bonj, ngaye ngakurrmerren kore ngudda, dja mak madbun munguyh.
8 Kanngehkemen, kore kunwarre ngakurduyime manwern bu ngayeman ngawarreworrinj. Yuwn kanbawon, nawu birrimayaliwarre bininj bu ngandidjekmiwon.
9 Minj njale mak ngawokdi, dja mak minj ngamulewarremeninj. Ngudda kankurrmeng ngahdi bu bolkkime kore kunyid ngarre.
10 Ngadjare ngudda yingurdme kore ngaye kandung, dja kunbid ke yiman nganwidjbihke bu darnkih ngarrowen!
11 Ngudda nawu kandung ngad bininj rowk, dja mak kanbun kore kunwarrekenh ngadberre. Kaluk bedda yibenmarneburriwe nawu njalehnjale bedberre namakmak nawu bininj birrikuken. Ngad bininj rowk wanjh yiman kunngolek werrk kadjalyakmen.”
12 “Ngudda Yawey, kanbekka bu ngahdi yiwarrudj ke. Kanwokbekka bu ngaye djawan dja kanbidyikarrme. Ngaye nawu marnenalkbun, dja yuwn bu kanmarnemirrkborledme. Ngaye nawu djarrehbeh ngamwam kore ngudda, ngaye yiman ngawokbuyika, nawu mawahmawah ngardduk warridj.
13 Yuwn kanwernhnan. Ba bu ngaye nganjilngmak. Kaluk darnkih ngaye ngarrowen dja mak ngayakmen, djal bonj.”