19
Birriwern kabirrih‑ni kure kubolk‑mak Heaven kabirri‑burlume Kod
1 Kune yakminj rowk, wanjh ngayi Djon nga‑bekkang yiman bininj birri‑djalwern rowk kure kaddum heaven birri‑kayhmeng kumekke birri‑yimeng, “Halleluyah! Karri‑manjbun Kod ngadberre nawu nakudji Namakkaykenh Duninjh mak Nangudj‑kimuk Duninjh! Nakudji nawu ka-karrme kunngudj bu ngad kandi‑darrkidwon kadberre. Nakudji nawu kan‑kukmarnbom kunngudj bu ngad kandi‑darrkidwon kadberre. Nawu kan‑kange-marnbom kadberre bininj.
2 Nungka wanjh kan‑djadme bu woybukki kure mandjad duninjh! Nungka bi‑djadmeng mak bi‑warreweng ngalekke ngalwarre duninjh ngalbu daluk ka‑ngeyyo Babylon ngalu ben‑bengwarrewong birridjalwern bininj rowk kure kondanj kukurlk, wanjh birriwarre duninjh. Ngaleng ben‑bom nawu Kod nuye bininj, wanjh Ngabbard bi‑bom bu ben‑kangdurndiweng.”
3 Wanjh bininj kure Kaddum birrih‑ni birri‑yawoyh‑kayhmeng, bu birri‑yimeng, “Halleluyah! Ngalekke Babylon kah‑rung, wanjh kundolng ngalengarre makka wam kaddum bu munguyh munguyh.”
4 Wanjh birrimekke nawu bininj 24 Dabborrabbolk mak nawu 4 mayh nawu birri‑darrkidni, birri‑marne‑mankang nuye Ngabbard nawu kah‑ni kure throne mak birri‑manjbom nuye. Bedda birri‑yimeng, “Wanjh bonj! Halleluyah! Karri‑manjbun Kod”
5 Wanjh kumekke kam‑wokdi kure ningih‑ni throne nuye yimeng, “Karri‑djal‑manjbu kadberre Kod nawu ngudda ngurri‑marne‑durrkmirri mak nawu ngurri‑djare ngurri‑wok‑marrkmang, ngudda nawu wurduh‑wurdurd mak nawu ngurri‑kihkimuk!”
6 Wanjh kumekke nga‑bekkang yiman bininj birri‑kaberrk‑wern birri‑kayhmeng wernkih duninjh, kure wokyimeng yiman kunronj kure kam‑bowarrhme kam‑bokoluy, mak wokyimeng yiman namarrkon ka‑ngurdulme.
Kumekke wanjh birri‑yimeng, “Halleluyah! Kod nawu kadberre nawu Ngudj‑kimuk Duninjh kure Yi‑worhnan rowk kunred!
7 Wanjh ngad karri‑djurrkwo mak karri‑njilng‑makmen kure karri‑mulewan bu Kod nawu Namakkaykenh, Nangudj‑kimuk kadberre.
Wanjh Lamb bu kabene‑marren ngalu daluk kah‑di kure kaddum wanjh ngalekke ngalbininjkobeng nuye. Wanjh bi‑yingkih‑marne‑marnburrinj bu nungka nuye kabene‑marren.
8 Nungka bi‑wong kunmadj nawu namak manburrba nawu linen nawu ka‑bame nawu nabele duninjh, bu kure ngaleng ka‑djongburren.”
(Kaluk nawu linen manburrba, nakka wanjh kabi‑kodjmulewan kure njalehnjale kunmak birri‑kurduyimeng kure Kod nuye bininj.
9 Wanjh andjel ngan‑yawoyh‑marneyimeng, “Mane yi‑bimbu rowk: “Kure kabirri‑njilngmak kure Lamb kaben‑kayhme kabirrim‑re kabirri‑djarrk‑ngun manme kure mulil ngalengarre bu kabene‑marren kure nawu Lamb nuye daluk.” Nawu andjel yawoyh‑yimeng, “Mane wanjh woybukki kunwok nuye Kod.”
10 Wanjh kune nga‑bekkang ngayi nga‑mankang kure kurrenge nuye andjel wanjh nga‑boddi, wanjh ngan‑marneyimeng, “Yun ngayi kan‑marne‑boddi! Ngayi nga‑rrurrkmirri nuye Kod yiman ngudda kure mak ngurri‑danginj kure birri‑karrme kunwok kure manwoybuk nuye Jesus. Birrikare birri-mulewam manekke kunwok manwoybuk nawu kure Jesus.
Mah, wanjh Kod yi‑marne‑boddin!”
Nakudji Bininj Ka‑barndi kure Djarrang nawu Kuk‑beleni
11 Ngayi Djon nga‑nang kaddum dang‑marrhmey kure kumirrk ngardduk. Nga‑nang djarrang dingihdi nawu kuk‑bele. Wanjh nga‑nang bininj barndi kure djarrang. Nungka nawu ngeyyoy “Na‑kange‑woybuk”, mak warridj ngeyyoy “Nawoybuk Duninjh”. Nungka wanjh kan‑djadme kadberre bininj rowk kure mandjad duninjh mak minj kan‑bangmibun kure ngad bininj, kaben‑bun birriwarre bininj.
12 Kure kumim nuye makka yiman kunrak kah‑rung. Kure kukodj mak ka‑kodj‑djongburren nawern kodjkolng. Mak kunngey nuye bimdi kure nungka, minj nangale ka‑bengkan, nungka wanjh nadjalkudji ka‑bengkan.
13 Nungka kuk‑djongburrinj kunmadj madj‑kuyeng kunkurlba dorreng djuhmeng. Nungka bininj ka‑ngeyyo “Kunwok nuye Kod”.
14 Nawu djawirna kabirrih‑ni kure kaddum nawu Kod nuye djuram rowk. Bedda wanjh birri‑munkekadjuy namekke bininj nawu barndih‑barndi ngal‑kuk‑bele djarrang. Bedda wanjh birri‑djarrk‑barndi kure birri‑kuk‑bele djarrang. Birri‑djongburrinj namakkaykenh kunmadj nawu madjbele .
15 Kaluk kure nuye kurrang‑beh bebmeng nuye mandjawak mirrhmak, nawu ka‑karrme kure kaben‑bun bininj nawu kubolk‑bubuyika rowk. Kaluk nungka kaben‑marne‑worhnan kumekke kure kunred kabirrih‑ni. Nungka ka‑karrme kundulk yiman miyarrurl manekke kunngudj dorrengh.
Nungka kaben‑djuyme bedberre yiman grapes. Nungka ka‑kurduyime kure kunkange‑rid nuye God Ngabbard nawu ngudj‑kimuk duninjh.
16 Kaluk kure kunmadj nuye ka‑djongburren mak kure kundad nuye ka‑ngeydi “Nakodjkimuk nawu Ka‑djalwernhworhnan Rowk.”
17 Wanjh nga‑nang andjel dingih‑di kure kundung. Wanjh ben‑marne‑kayhmeng wernkih duninjh bedberre marram, warrk, djawurndu. Ben‑marneyimeng, “Ngurrim‑ray. Ngurri‑kaberrk‑raworrinj kure mankimuk mulil manme nuye Kod.
18 Ben‑marneyimeng, “Ngurrben‑kukngun bininj nawu birrikodjkimuk 'kings', mak bininj nawu birri‑worhnan kure army, mak birri‑kihkimuk bininj. Mak ngurrben‑kukngun nawu djarrang mak nawu bininj bindi‑mornekang, mak kunburrk bedberre bininj kabirri‑dukkayindi, mak birribuyika rowk, bedda nawu birri‑yawuyawurd mak nawu birrikimuk bininj.”
19 Ngayi nga‑nang Nabang Mayh mak nawu kondanj kukurlk kabirri‑worhnan. Mak nawu bedberre djuram birri‑kaberrkdi wanjh kabirri‑burren namekke nawu bininj kah‑barndi kure ngal‑kuk‑bele djarrang mak nawu nuye binihbininj.
20 Namekke nawu Nabang Mayh mak Dabborrabbolk nawu Kurrikurrinj, wanjh Jesus nuye bininj bene‑darrkid‑mey. Namekke dabborrabbolk bi‑marne‑durrkmirri nawu Mayh Nabang, bu bi-wok-mulewam, kurduyimeng kunngudj dorrengh kure birri‑kange‑barrhmeng bininj.
Mak bininj nawu ben‑wurrhkeng birri‑karrmeng nawu kunmorninj nuye Nabang Mayh, wanjh birri‑marne‑bard‑durrungkulhdanj nuye kundulk birri-marnbom yiman Nabang Mayh nuye. Wanjh bonj, Nabang Mayh mak namekke dabborrabbolk bindi‑weng kure kunrak mankimuk, kundolng-banjinj yiman nud-no.
21 Wanjh djuram berrewoneng ben‑bom, namekke nawu kah‑barndi kure djarrang nawu kuk‑bele. Wanjh ben‑bom rowk mandjawak dorrengh nawu kam‑bebmeng kure kurrang nuye. Kaluk wanjh kumekke birrim‑koluy marram, warrk, djawurndu, wanjh bindi‑kuk‑nguneng rowk, wanjh, birri‑worrkminj.
Wanjh kumekke nga‑nang bonj.