22
Kure Kubolkmak Heaven Mankabo Manbu Kaben-darrkidwon Bininj
1 Ngayi ngan‑bukkang andjel nga‑nang mankabo manbu bininj ka‑rrarrkid‑won. Nga‑nang manbo‑bele kabo‑narren, kam‑koluy kure Kod nuye ‘throne’, nawu mak nuye Lamb.
2 Ngayi nga‑nang bo‑yoyomeng kure kubuldjdjarn manbolh mankimuk‑ken kure kubolk‑kimuk.
Mak manbu kundulk kaben‑darrkid‑won bininj kabene‑bebbe‑di kure mankabo ka‑bo‑rlobme kure kubuldjdjarn. Manekke wanjh manme ka‑marnburren munguyh munguyh, dird la dird. Mak manbu kunworr ka‑worr‑bebme kure kundulk, makka kaben‑marnbun bininj kure kubolk‑bubuyika.
3 Minj kan‑yawoyh‑walkwon bininj. Nungka Kod nuye ‘throne’ ka‑djal‑di kure kubolk‑kimuk. Mak Lamb kumekke kabene‑djarrk‑ni.
Mak bininj nawu kabirri‑marne‑durrkmirri wanjh bedda kabirri‑marne‑bard‑durrungkulhdan nuye kumekke.
4 Kaluk bedda kabirri‑kebnan mak kunngey nuye ka‑ngey‑di kure kumilh bedberre.
5 Kunkak minj ka‑rri, mak bininj nawu kumekke kabirrih‑ni minj kabirri‑yawan kundung mak birlino. Kod nawu Kaworhnan Rowk nungan ka‑bolk‑wayalhme bedberre. Nawu bedda wanjh kabirri‑worhnan yiman ‘kings’ rerrih bu munguyh munguyh.
Jesus Yimeng, “Ngayi bolkkime ngam-re!”
6 Kaluk nawu angel ngan‑marneyimeng, “Mane kunwok manwoybuk, ngurri‑woybukwon. Kod nawu Kaworhnan Rowk, ben‑wong Nawaralmakkayken nuye birrikare ‘prophet’. Bi‑munkeweng andjel nuye bu kan‑bukkang kadberre ba karri‑marne‑durrkmirri kure baleh bolkki ka‑kurduyimerran.
7 Wanjh Jesus yimeng, “Ngurri‑bekka! Ngayi bolkki ngam‑re! Ngayi kunmak nga‑marneyime nangale bininj nawu ka‑wernh‑karrme kunwok ngardduk nawu kure nane djurra ka‑wok‑bimdi.”
8 Ngayi Djon ngayeman nga‑wok‑bekkang mak nga‑nang kure njalehnjale rowk nga‑bimbom. Bu kumekke nga‑nang nga‑bekkang, nga‑mankang kure kurrenge nuye andjel, wanjh nga‑burlumeng nuye angel nawu nganh‑bukkang kure ngah‑nang.
9 Wanjh ngaleng andjel ngan‑marneyimeng, “Yun ngayi kan‑marne‑mankang! Ngayi nakka nga‑durrkmirri yiman ngudda. Mak nawu ngurri‑danginj nawu birrikare ‘prophets’ mak bininj rowk kure kabirri‑marrkmang kunwok kure nawu djurra ka‑wok‑bimdi. Yi‑marne‑bard‑durrungkulhda nuye God.”
10 Wanjh andjel ngan‑yawoyh‑marneyimeng ngardduk, “Manekke kure yih‑bimbom kure djurra, makka minj yi‑warlkkan, korroko wanjh darnkih kamh‑re ngalengarre bu kone rowk ka‑kurduyimerran.
11 Wanjh nangale bininj nawu ka‑kurduyime kure kunwarre, nakka wanjh kunwarre djal‑kurduyimen munguyh. Nangale nawu kange‑kurduk munguyh nakka wanjh kange‑kurduk munguyh. Mak nangale nawu ka‑kurduyime kunmak, wanjh nakka kunmak munguyh ka‑djale, nangale nawu ka‑kuk‑djamunworren wanjh kuk‑djamunnin munguyh.
12 Wanjh Jesus yimeng, “Kandi‑bekka! Ngayi wanjh bolkkime ngam‑yawoyh‑durndeng! Birriwern nawu kandi-marne-durrkmirri bedda wanjh birri-winhme kure ngayi.
13 Ngayi nawu nga‑ngeydi “Alpha mak Omega” nane kunngey ka-yime “Kunyungki mak Rerre”. Nga-rredjmang rowk, mak nga-ngurdme rowk.
14 Kod nungan kaben-marne-kurduyime kunmak bedberre bininj kure kaben‑madj‑djirridjbun bedberre ba kabirri‑ngun kure barnem‑no manme kure kundulk‑beh ba kaben‑darrkid‑won mak kabirri‑ngimen kure kunrurrk‑dangmaye ngalengarre kured kubolk‑kimuk.
15 Kure kuberrk kubolk‑kimuk kure kabirrih‑di nawu birri‑warre bininj,
mak bininj nawu bedda birri‑marrkidjbu,
mak nawu kabirri‑djirdmarren bininj, daluk,
mak bininj nawu kabindi-bun birribuyika bininj
bininj nawu ‘idols’ kabirri‑marne‑mankan,
mak kabirri‑kurren kabindi‑wurrke birri‑buyika bininj.”
16 Ngayi Jesus nga‑munkeweng ngardduk andjel bu ka‑yolyolme koneng kunwok kunwoybuk kure nawu yiwarrudj bedberre. Ngayi nawu Deybid (David) nuye mawahmawah. Ngayi nga‑rranginj kure nuye namud. Ngayi nakudji ngun‑kangekarrmeng bu ngan‑munkeweng. Ngayi yiman ka‑yime kinhkinh kure ka‑bolk‑wayalhme kure kamh‑barrhbun djarreh.
17 Wanjh Nawaralmakkayken ka‑yime “Yim‑ray!” Ngalekke daluk ngalu kam‑re kure nabininjkobeng ngalengarre wanjh ka‑yime, “Yim‑ray!” Wanjh ngurri‑wern nawu kandi‑bekkan wanjh ngurri‑yimen “Yim‑ray!”
Nangale nawu ka‑kombukdowen wanjh ngayi marneyime, “Yim‑ray.” Wanjh nangale nawu bininj ka‑djare, wanjh kam‑re ka‑bongun kunronj kure kabi‑kange‑darrkid‑won, nakka minj njale ka‑karremulewan. Mane kunronj nuye Jesus, wanjh kan-bo-won kadberre, kabirri-bongun.
18 Wanjh ngayi ngaben‑bengdayhke nawu kabirri‑bekkan kunwok kure djurra wok‑bimburrinj kure yingkih‑yoy. Bu nangale ka‑karre‑wern‑won kure kunwok nuye, wanjh nakka Kod kabi‑marnbun ka‑djak‑bekkan kundjak kure nane djurra ka‑bimdi ka‑yolyolme kure kundjak.
19 Mak birri‑ngale kabirri‑wok‑bularrbun manekke kunwok kure ka‑wok‑bimdi wanjh Kod nakka kaben‑kaybun manekke mandjoleng kure kundulk‑beh manbu kaben‑darrkid‑won bininj, mak minj kabirri‑ngimen birrimekke bininj kure kubolk‑djamun nuye, kure nane djurra ka‑mulewan.
20 Kaluk Jesus mulewam manekke kunwok makka manwoybuk duninjh, wanjh ka‑yime, “Yoh. Bolkkime ngayi ngam‑durndeng.” Ngayi nawu Djon nga‑yime, “Mah, wanjh yim‑ray ngudda nawu Jesus Yi‑worhnan Rowk.”
21 Wanjh ngayi nga‑djare Jesus nawu Kaworhnan Rowk bu ngun‑kongibun ngudberre, mak ngurri‑djarrk‑di nawu Kod nuye binihbininj rowk. Wanjh Bonj.