EGETABU KIA
AMOSI
Ogochaakera
Amos nigo amenyete konya Ababani bande bonsi abwo twatigeretwe ebitabu biabo bataramenya.
Ere nigo aiboretwe ase oborwoti bwa Irianyi ya Yuda korende akarangerigwa gokora emeremo ase oborwoti bwa Sugusu ase omwaka 750 nyuma Yeso ataraiborwa.
Chingaki echio nigo chiarenge echi’ogosesenigwa n’okogenderera gw’ense eyio ase obonchoreria boigo n’oborendi obuya. Korende Amos akarora nga okogenderera okwo nigo kwabwenerete abanda boigo n’okonyora okuya nigo gwachete ase engencho y’okounereria abataka. Okogendereria amang’ana y’edini nigo kwarenge ogw’enchera embe, n’oborendi bw’amang’ana y’ense tikwarenge kuya. Nigo kwaburukaine na kera engencho embe ase eamate.
Amos agatogonyera ebikorwa ebio, agakurera abanto igoro y’ogotakorera ekeene ase eamate. Amos agateebia abanto ng’a Nyasae nabae egesusuro. Okorangeria kwaye ase abarai gokorera ekeene tigwancheranetwe buya. Agakanigwa gokora emeremo yaye y’obobani aria Betheli.
Okobagwa kw’egetabu eke
Abanto baetanaine Abaisraeli bakonacherwa ekiina 1:1—2:5
Abaisraeli bakonacherwa ekiina 2:6—6:14
Amaroro atano 7:1—9:15
Ⅰ
Ⅰ Aya naro amang’ana Amos, oyomo bw’abarisia ba Tekoa, arooche. Nyasae nigo amoorokeretie Amos amang’ana aya onsi igoro ya Israeli emiaka ebere ekero omotengecho bw’ense konya otaracha. Ekero ekio Usia nere orenge omorwoti bw’Abayuda, na Yeroboamu, mosinto o Yehoasi, nere orenge omorwoti bw’Abaisraeli.
Ⅱ Amos agateeba,
“Omonene natogonye korwa Sayoni,
aake eriogi riaye korwa Yerusalemu.
Amarisio ’abarisia naichane,
obonyansi bw’egetunwa gia Karimeli igoro mbwome.”
Ekiina kia Nyasae ase abanto basinyaine n’Abaisraeli
Siria.
Ⅲ Aya naro Omonene ateebire: “Ase engencho y’ogosaria kw’ abanto ba Damesiki ara gatato, ee, ara kane, tingotanga egesusuro tikebanyora, ekiagera barabwo baoorire Abagileadi nebioorero bi’ebioma.
Ⅳ Ase ayio nintome omorero ase enyomba ya Hasaeli; oro nosambe osirie kegima chinyomba chinkong’u chia Beni‐Hadadi.
Ⅴ Nimbune emekorogoto y’ebiita bia Damesiki; ninsirie abanto bamenyete ase ense omweya y’Aveni, na oyio obwate enyimbo y’omogaambi agwo Beti‐Edeni. Abanto ba Siiria mbairwe ase obosomba gochia ase ense ya Kiri.” Nabo Omonene ateebire.
Filisiti.
Ⅵ Aya naro Omonene ateebire: “Ase engencho y’ogosaria kw’ abanto ba Gasa ara gatato, ee, ara kane, tingotanga egesusuro tikebanyora. Barabwo nigo bairete abanto egesaku ekegima gochia ase ense ya Edomu, bakabakora abasomba.
Ⅶ Ase ayio nintome omorero ase chindwaki chia Gasa; oro nosambe insirie chinyomba chinkong’u chi’aroro.
Ⅷ Ninsirie abanto bamenyete Asidodi, na oyo obwate enyimbo y’obogambi agwo Asikeloni. Ning’onchore okoboko kwane kobe mamincha ya Ekironi, na abatigari b’Abafilisti mbasirigwe.”
Turo.
Ⅸ Aya naro Omonene ateebire: “Ase engencho y’ogosaria kw’ abanto ba Turo ara gatato, ee, ara kane, tingotanga egesusuro tikebanyora. Barabwo nigo bairete abanto egesaku ekegima ase ense ya Edomu, tibainyorete okobwatana kw’ogotianania kw’obomwabo.
Ⅹ Ase ayio nintome omorero ase chindwaki chia Turo; oro nosambe osirie chinyomba chinkong’u chi’aroro.”
Edomu.
Ⅺ Aya naro Omonene ateebire: “Ase engencho y’ogosaria kw’ abanto ba Edomu ara gatato, ee, ara kane, tingotanga egesusuro tikebanyora. Barabwo nigo babwatetie abamwabo bare nemioro, tibabete namaabera nonya ng’ake; nigo bagendererete koba nendamwamu na ekeririanda botambe.
Ⅻ Ase ayio nintome omorero ase omochie o Temani; oro nosambe osirie chinyomba chinkong’u chia Bosira.”
Amoni.
ⅩⅢ Aya naro Omonene ateebire: “Ase engencho y’ogosaria kw’Abaamoni ara gatato, ee, ara kane, tingotanga egesusuro tikebanyora. Barabwo nigo boorete abakungu ba Gileadi barenge barito, ekero barenge kogareyia orogongo rwabo.
ⅩⅣ Ase ayio nintongie omorero ase chindwaki chia Raba; nisambe insirie chinyomba chinkong’u chi’aroro. Ase rituko erio ebikuuro bi’eseegi mbiigugwe, boigo ndibe rituko ri’omwaga na ekembugu‐mbugu.
ⅩⅤ Omorwoti amo nabagaambi b’oborwoti bwaye mbooswe bairwe ase obosomba.” Nabo Omonene ateebire.