Ⅲ
Nyasae nagambie abanto b’ebisaku
Ⅰ “Rora, ase amatuko ayio, na ase engaki eyio,
inche Omonene ning’iranerie Abayuda,
na abanto ba Yerusalemu, bare ase obosomba, amaya abo.
Ⅱ Ninsangererie abanto b’ebisaku bionsi,
mbatirimbokie gochia ase Rikura ri’ekegambero ria Jehoshaphat;
aroro agwo nimbanachere ekiina,
ase onsi eria bakorerete abanto bane. Ekiagera mbasiarerete Abaisraeli,
gochia ase egati y’abanto b’ebisaku,
naende baatananire ense yane Israeli.
Ⅲ Baakeire abanto baane obomera, erio korigia ning’o okoira abooswa
baoonirie abana abamura, erinde banyore abakungu abatayayi,
na baoonirie abana abaiseke,
erinde banyore edivai bakonywa.
Ⅳ “Inwe Turo na Sidoni, ne chingongo chionsi chi’Abafilisti, ngento ki mogonkorera? Inee! Nigo moganetie kong’iraneria egento? Moise korusia egesiomba igoro yane, nimbairanerie ogokora kwaino kobe igoro yaino bwango mono.
Ⅴ Inwe mwaimokirie chifeta ne chitaabu chiane, na mwairire ebinto biane ebiya bingwenerete gochia ase chikalu chiaino.
Ⅵ Mwarusirie Abayuda na abanto ba Yerusalemu korwa ase chingongo chiabo, mwabaoonirie ase Abagiriki.
Ⅶ Korende bono nimbarangerie barue aase aria mwabaoonetie gochia, erinde mbairanerie inwe ogokora kwaino kobe igoro yaino.
Ⅷ Inche Omonene, ning’oonie abana baino, abamura na abaiseke, ase Abayuda, na barabwo baabaoonie ase abanto ba Seba, abwo bamenyete aare mono. Ninche Omonene nakwanire ayio.”
Ⅸ Raria amang’ana aya ase egati y’abanto b’ebisaku:
Ebeke ang’e ase esegi!
Seegeta abarwani chituoni!
Tiga abarwani bonsi bachiche bebeke ang’e basuke motwe.
Ⅹ Tura amakombe aino abe emioro,
na emeyio yaino chinkuro ebe amatimo!
Tiga oyore omworo atebe, “Nainche nigo inde etuoni.”
Ⅺ Inwe abanto b’ebisaku momenyete ase chinsemo chionsi,
ayerera bwango mooche,
sangererekana amo agwo ase rikura.
Aye Omonene, renta abarwani bao b’esegi babaumokere!
Ⅻ Tiga abanto b’ebisaku baseegetane,
bache ase Rikura ri’ekiina ria Yehosafati.
Aroro agwo nao ndanachere abanto b’ebisaku bionsi baabaetanaine ekiina.
ⅩⅢ Ekiagera obobe bwabo bwabeire obonene, soyia emeyio chinkuro mogondo, mobagese, ekiagera rigesa riaikire.
Soa ime mobatindache, buna ekemitero gi’edivai giaichoire.
Chinyongo chiaichoire na goiteka
ⅩⅣ Emeganda na emeganda nigo ere ase Rikura ri’ekiina,
ekiagera agwo ase Rikura ri’ekiina nao rituko ri’Omonene rirache bwango.
ⅩⅤ Erioba na omotienyi mbibekwe omosunte,
ne ching’enang’eni tichikobara.
Nyasae nasesenie abanto baye
ⅩⅥ Omonene narume korwa Sayoni,
aake eriogi riaye korwa Yerusalemu;
igoro na ense nchitengechigwe.
Korende Omonene nabe obotamero bw’abaanto baye,
na eburi enkong’u y’Abaisraeli.
ⅩⅦ “Erio namomanye ng’a inche ninche Omonene, Nyasae oino,
imenyete Sayoni, egetunwa kiane egechenu.
Yerusalemu nobe omochie omochenu,
na abanto b’ebisaku ebigeni tibagosoa aroro nonya ng’ake.
ⅩⅧ “Ase rituko erio ebitunwa mbitonyie edivai enyansu,
na ebigoro mbiichore amabeere,
ne chindooche chionsi chi’Abayuda nachiichorwe namaache.
Ensoko netuboke korwa ase enyomba y’Omonene,
enyiyie ense omweya ya Sitimu.
ⅩⅨ “Ense ya Misiri nesarigwe ebe bosa,
na Edomu nero nebe erooro ere bosa,
ekiagera abanto b’aroro mbakorerete Abayuda amabe;
nigo baiterete ase ense yabo amanyinga ’abaanto batarenge na komocha.
ⅩⅩ Korende ense y’Abayuda nemenywe kare na kare,
na Yerusalemu boigo, ekiaare ase ekiaare.
ⅩⅪ Nimbae egesusuro baria baiterete amanyinga y’abanto ba Yuda gose tinkobatigera abamochi.
Inche Omonene Nyasae nigo ngendererete komenya Sayoni.”