Ⅱ
Ogokuurerwa kw’erituko ri’Omonene goetera ase chingige
Ⅰ Bugia egetureeri ase Sayoni,
ee, bugia egetureeri ki’ogotabobora ase egetunwa egechenu.
Tiga abanto bonsi ba Yuda baiguswe,
ekiagera rituko ri’Omonene ngocha rire; nigo rire ang’e.
Ⅱ Nigo rirabe rituko ri’omosunte na eri’amataturi,
rituko ri’amare na omosunte ekerima.
Omoganda omonene bw’echingige nochiche,
nigo orarande buna omosunte igoro ase ebitunwa.
Omogwekano bw’amang’ana ayio tana koba korwa kare,
gose takoba nonya ng’ake ase ebigori bigochi‐gocha.
Ⅲ Buna koreng’ana omorero ogosamba noboigo omoganda oyio ogosaria kera egento kere bosio bwaye,
na magega gotiga kera egento gekoyia; ekero chitaraeta, ense eyio nigo enga buna omogondo o Eden, korende ekero chiaetire yatigara erooro bosa
ase echio kende tikeri kerachitamboke.
Ⅳ Okororekana kwabo nigo konga buna ogwe chibarasi;
nigo chikominyoka buna chibarasi chi’okorwana esegi.
Ⅴ Ekero chigoeta igoro ase ebitunwa,
ebititiro biabo nigo binga buna ebie chigari,
naende nigo binga buna ogotoreka kw’omorero ogosamba amasakwe;
chirochio nigo chire buna abasikari bare ne chinguru baroberigwe.
Ⅵ Ekero chigocha abanto nigo bagoichorwa nobwoba,
amaiso ’abaanto bonsi nigo akoonchoka arachoka.
Ⅶ Nigo chikominyoka gochia korwana esegi buna abasikari chituoni;
nigo chikoriina chindwaki igoro buna abasikari.
Kera eyemo nigo eragenderere gochia bosio,
ende teri eragobere esire enchera ebwatetie.
Ⅷ Tichikomigererania,
kera eyemo nigo egoeta omong’ororia oye;
nigo chigoeta gati‐gati y’ebirwanero, tichigotangeka.
Ⅸ Nigo chikorindokera omochie,
na kominyoka ase chindwaki igoro;
nigo chikoriina ase chinyomba chisoa ime
na chietera ase chitirisa buna abaibi.
Ⅹ Ense nigo egotengecha bosio bwabo,
na igoro yanyegerigwa.
Erioba na omotienyi nabibekwe omosunte;
ne ching’enang’eni tichikobara.
Ⅺ Eriogi ri’Omonene nigo rikoigugwa bosio bw’omoganda oye bw’esegi,
ekiagera omoganda oye bw’esegi oyio okomoigwera nigo ore omonene mono;
Rituko ri’Omonene nigo rire eri’okoirokia.
Ning’o oranyare koriremereria?
Okorangerigwa kw’ogoonchoka
Ⅻ Omonene oteebire,
“Nonya mbono ng’iranere ne chinkoro chiaino chionsi,
ase okweng’ata, na okorera, na okweng’ereria.
ⅩⅢ Tandora chinkoro chiaino ase ogweitia,
gose tari ogotandora chianga chiaino.”
Irana gochia ase Omonene, Nyasae oino,
ekiagera ere nomuya na omonyamaabera;
ere tari omwango ase okoba nendamwamu;
obwanchani bwaye nobwa botambe,
nigo akoonchoka otiga kobarentera amabe.
ⅩⅣ Ning’o omanyete, ande gose Omonene naonchoke atige kobarentera amabe,
korende abatigere ogosesenigwa,
erinde moruere Omonene, Nyasae oino, okoruegwa kw’endagera, na ogw’ekenyugwa?
ⅩⅤ Bugia egetureeri ase Sayoni;
raria engaki y’okweng’ata,
rangeria omosangererekano bw’ogosasiima!
ⅩⅥ Sangereria abanto amo,
ochene omosangererekano oyio;
sangereria abagaaka,
sangereria nabana, nonya nabakogonka.
Tiga nonya mbaria banyuomanire bwango iga basoke korwa mwabo,
ⅩⅦ Abakuani abwo bakomokorera Omonene
tiga barere ase egati y’egesona na egesasiimero,
bakwane iga, “Aye Omonene, rorera abanto bao amaabera;
totiga abanto abwo bare omwando oo bachecherigwe,
bakwanwe bobe ase egati y’abanto b’ebisaku.
Nase ki abanto baraborie:
Ng’ai Nyasae obo are”?
Nyasae okoirania obotobu ase ense
ⅩⅧ Erio Omonene akaba ne risemi ase engencho y’ense yaye,
akarorera abanto baye amabeebe.
ⅩⅨ Omonene akairaneria abanto baye, akabateebia,
Rora, nkobatomera nde endagera, na edivai, na amaguta,
na inwe namoisaneke;
tinkobatiga mogenderere gochaywa ase egati y’abanto b’ebisaku.
ⅩⅩ Ninserie omoganda bw’echingige okorwa sugusu orue ase more, obeere are korwa ase more,
ninyoserie ogende ase ense enyomo ere bosa,
ensemo etang’aine egende gochia ase Enyancha y’omonyo,
na ensemo ekorwa magega egende gochia ase Enyancha ya Mediterania.
Ogotioka kw’ebitondo biabo nkoimokerere igoro,
ekiagera okorire ayare amanene mono.
ⅩⅪ Aye ense, toiroka!
Korende goka na gochenga,
ekiagera Omonene okorire ayare amanene.
ⅩⅫ Inwe ching’iti chi’orosana, timoiroka,
ekiagera amarisio are ase erooro amerire obonyansi;
emete yamire amatunda,
emeko na emesabibu yamire okwama kwabo okonene.
ⅩⅩⅢ Inwe abanto ba Sayoni, goka,
mochenge ase ay’Omonene, Nyasae oino abakoreire,
ekiagera obaeire embura entang’ani ebaisaine;
nere okobatweria embura botambe,
eye ritang’ani na ey’okwamia endagera.
ⅩⅩⅣ Ebiooreri bikoorerwa mbiichorwe ne chindagera;
na ebimitero mbiichore nedivai na amaguta goika biiteke.
ⅩⅩⅤ Nimbairanerie ebi’emiaka eria biasaretigwe,
ne chingige, na ebisase, ne chingeeti,
omoganda oyio omonene natomete gocha ase egati yaino.
ⅩⅩⅥ Bono monyore endagera enyinge mokoria moigote,
erio motogie erieta ri’Omonene, Nyasae oino,
oyio obakoreire amakumia.
Abanto baane tibagochaywa naende.
ⅩⅩⅦ Erio namomanye ng’a inche nigo inde ase egati yaino inwe Abaisraeli,
naende ng’a inche ninche Omonene, Nyasae oino,
naende Nyasae onde omoao tari.
Abanto baane tibagochaywa naende.
Rituko ri’Omonene
ⅩⅩⅧ Nebe ase amatuko agochi‐gocha,
nimbaiterere abanto bonsi Omoika one;
abana baino, abamura na abaiseke, inabaabaane,
na abagaaka baino nabarote chindoto,
na abamura baino nabarore amaroro.
ⅩⅩⅨ Naboigo ase amatuko ayio nimbaiterere abasomba baane,
abasacha na abakungu, Omoika one.
ⅩⅩⅩ Ning’orokie ebikone igoro na ase ense;
amanyinga, na omorero, ne rikundesi ri’erioki.
ⅩⅩⅪ Erioba narionchoke ribe omosunte,
na omotienyi noonchoke obe buna amanyiga,
ekero rituko riria ri’Omonene,
erire rinene, na eri’okoondokia, ritaracha.
ⅩⅩⅫ Naende nebe ng’a kera oyorarangerie erieta ri’Omonene
natoorigwe, ekiagera ase egetunwa gia Sayoni, na ime ya Yerusalemu,
mbabe aroro abanto baratooreke,
buna Omonene atebiire,
na ase egati y’abwo baratigare nigo barabe abwo Omonene achorire.